රුපියල් කෝටි හතහමාරක ලොතරැයි දිනුම ඇදුණු බව පැවසෙන අකුරණ ප්‍රදේශයේ පුද්ගලයකු පැහැරගෙන විත් දින දහයක් පුරා පහරදෙමින් ගම්පොළ රත්මල්කඩුව ප්‍රදේශයේ නිවාස දෙකක වරින්වර සිර කර සිටියදී ගම්පොල විශේෂ කාර්ය බළකා නිලධාරීන් පිරිසක් හා ගම්පොල කොට්ඨාස අපරාධ විමර්ශන අංශයේ නිලධාරීන් පැමිණ ඔහුව මුදාගෙන ඊට සම්බන්ධ කල්ලියේ සිව් දෙනෙකු අත්අඩංගුවට ගෙන ඇත.
මෙසේ පැහැරගෙන සිරකර සිට ඇත්තේ මහනුවර අකුරණ ප්‍රදේශයේ පදිංචි මොහොමඩ් හසීම් නැමති පුද්ගලයෙකි.
මොහු සිරකරගෙන සිටියැයි පැවසෙන ලී මෝල් හිමියකු ඇතුළු සිව් දෙනෙකු මෙසේ අත්අඩංගුවට ගත් බව පොලිසිය පවසයි.
ගම්පොළ රත්මල්කඩුව ප්‍රදේශයේ පුද්ගලයකු සිරකරගෙන සිටින බවට විශේෂ කාර්යය බලකා බුද්ධි අංශ වෙත ලද තොරතුරකට අනුව ගම්පොල විශේෂ කාර්ය බළකා නිලධාරීන් එම ස්ථානයට ගොස් සිද්ධිය තහවුරු කර ගැනීමෙන් පසු ඒ පිළිබඳ ඉහළ නිලධාරීන් දැනුවත් කර තිබේ.
ඒ අනුව ගම්පොල කොට්ඨාස අපරාධ විමර්ශන අංශ නිලධාරීන් ද එම ස්ථානයට පැමිණ මෙම පුද්ගලයා මුදා ගෙන තිබුණි.
මෙම පුද්ගලයා දඹුල්ල ප්‍රදේශයේ සිටියදී ගම්පොලින් ගිය සිව් දෙනෙකු ඔහු පැහැරගෙන මෝටර් රථයක දමා ගෙනැවිත් ගම්පොල ප්‍රදේශයේ මෙසේ සිර කරගෙන සිට ඇතැයි පොලිසිය හෙළිකරගෙන තිබේ.
එම පුද්ගලයා පවසන්නේ ඔහුට දරුණු ලෙස පහර දෙමින් මුදල් ඉල්ලා සිටි බවය.
දිනුම් ලද මුදල් සඟවා ඇති තැන් අසා පහර දුන් බවත් ඔහු පවසයි.
පොලිසිය පවසන්නේ මෙම පුද්ගලයා හා ප්‍රධාන සැකකරු අතර මුදල් ගනුදෙනු සම්බන්ධ ආරවුලක් ඇති බවය.
මෙම පුද්ගලයා ඔවුන් සමග කැමත්තෙන් සිට ඇති බවද පොලිසිය පවසයි.
නමුත් මෙම පුද්ගලයා පවසන්නේ තමාට පහර දී ඔවුන් සමග කැමැත්තෙන් සිටින බවට ලියුමක් ලියා ගත් බවත් එය පොලීසියේ උපදෙස් මත සිදු කළ බව පහර දෙමින් තමාට පැවසූ බවත්ය.
දිනුම් ඇදුනු මුදල ආරක්ෂා කර ගැනීම සඳහා වෙනත් පුද්ගලයෙකුට ලබා දී ඇති බවද ඔහු සඳහන් කර සිටියි.
පොලිසිය මේ පිළිබඳ සොයා බැලීමේදී එම මුදල් ලබාගත් පුද්ගලයා ජපානයට ගොස් ඇති බවද පොලිසිය සඳහන් කරයි.
ජූලි මස 27 දින දඹුල්ලේ දී පැහැරගෙන රත්මල්කඩුව ප්‍රදේශයට රැගෙන ගොස් දින 6 ක් ප්‍රධාන සැකකරුගේ නිවසේත් ඉතිරි දින කිහිපය ඔහුගේ මස්සිනා ගේ නිවසේත් මොහු තබාගෙන ඇති බව අනාවරණය වී ඇත.
මෙම පුද්ගලයා වැඩිදුරටත් පවසන්නේ කුරුණෑගල කෙනෙකු සමග තමා ගනුදෙනු සිදුකර ඇති බවත් ඔහුද මෙම ස්ථානයට පැමිණ රුපියල් කෝටි තුනක් ගත් බවට වැඩි මුදලක් දමා තමා ගෙන් ලියුමක් ගත් බවත්ය.
මෙම සැකකරුවන් ද තමන් ඔවුන්ට ලක්ෂ 90ක් ණය වී ඇති බවට තමාගෙන් ලියුම් ගත් බව ඔහු කීවේය.
මෙම පැහැර ගැනීම පිළිබඳව ගැටළු සහගත තැන් තැන් රැසක් ඇති බව ගම්පොල පොලිසිය පවසයි.
ගම්පොල කොට්ඨාස අපරාධ විමර්ශන නිලධාරීන් ඒ පිළිබඳව වැඩිදුරටත් පරීක්ෂණ පවත්වයි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
අත්අඩංගුට ගත් සිවුදෙනා අද (6) අධිකරණයට ඉදිරිපත් කිරීමට නියමිතව තිබිණි.