දංඕවිටදී පසුගියදා පොලීසිය කොල්ලකරුවන් පිරිසක් ගමන්ගත් වෑන් රථයකට තැබූ වෙඩිල්ලකින් උපාධිධාරී තරුණියක් මරණයට පත්වූ කථාව දැන් මුළු රටම දන්නා මෙන්ම කථාබහට ලක්වන කරුණකි.
එහෙත් පොලීසිය එම කොල්ලකරුවන් ගමන්ගත් වෑන් රථය පසු පස හඹාගොස් අල්ලන්නට උත්සාහ නොගත්තේ ඇයි දැයි කවුරුත් කථා කරන්නේවත් සොයා බලන්නේවත් නැත.
ලංකාසර මේ ගැන සොයා බැලීමේදී පෙනි ගියේ දැන් පොලීසියට අපරාධකරුවන් හඹා යාමට විදිහක් නැති බවය. පොලීසියට දැන් සිදුව ඇත්තේ ත්‍රීරෝද රථවලින් ගමන් බිමන් යන්නටත් රාජකාරියේ නිරතවන්නටත් ය.
දැන් බොහෝ පොලිස් ස්ථානවල මුර රාජකාරි සිදුවන්නේ ත්‍රීරෝද රථයෙනි. සොරුන් මංකොල්ලකරුවන් අධිබලයතුරුපැදි වෑන් රථ වැන වාහන පාවිච්චි කරද්දී හොරු අල්ලන පොලිසිය ත්‍රි රෝද රියේ වකුටු වී ඔවුන් ලුහුබඳන තත්වයට පත්ව ඇත. දංඕවිට කොල්ලකරුවන් අල්ලන්නටද පොලීසිය යන්නේ ත්‍රීරෝද රථයෙනි. පොලීසිය දුටු කොල්ලකරුවන් පළායන විට වෙඩි තැබීම හැර වෙන කරන්නට විකල්පයක් පොලීසියට නොවීය. ඒ වෑන් රථය පස්සේ ත්‍රීරෝද රථයට හඹා යා නොහැකි නිසාය. අමාරුවෙන් හරි පැන්නුවා යැයි කියමු. එහෙත් ත්‍රීරෝද රථයට වැඩිදුරක් නම් යන්නට විදිහක් නැත. ඒ තෙල් තිබෙනේ අන්තිම අඩියේ වන බැවිනි. හේතුව මේ වනවිට පොලිසිවල ඉන්ධන පරිභෝජනයට දමා ඇති තහංචි , මාංචු නිසාය.
පොලිස් ස්ථාන මට්ටමින් කළ සොයා බැලීමේදී අනාවරණය වන්නේ පොලීසියේ ත්‍රිරෝද රථවලට පොලිස්පතිවරයා විසින් අනුමත කරනු ලැබ ඇත්තේ මාසයටම ඉන්ධන ලීටර් 50කි. නමුත් පොලිස්පතිවරයාට පහළින් සිටින ලොක්කන් එයද කප්පාදු කර ඇත. එ අනුව මේ ත්‍රි රෝද රථයට මාසයකට ලැබෙන්නේ ලීටර් 25ක් වන ලෙසය. ඒ කියන්නේ දවසකට ඉන්ධන ලීටරයක්වත් පොලීසියේ ත්‍රීරෝද රථයට ලැබෙන්නේ නැති බවය.
එපමණක් නොව, පොලීසිවලට ලබාදී ඇති ඉන්ධන කෝටාවේ ප්‍රමාණය දෙස බැලීමේදී පැමිණිල්ලක් විභාග කිරීමට පොලීසිය එන්නට මැළි කමක් දක්වන්නේ ඇයි දැයි පැහැදිලිය.
පොලීසිය A සිට D. දක්වා වර්ගීකරණයකට ලක්කර ඇත. මූලස්ථාන පොලීසි වැටෙන්නේ ඒ ගණයටය. මෑතකදී විවෘත කළ පොලිස් ස්ථාන වැටෙන්නේ D ගණයටය.
දංඕවිට පොලිස් ස්ථානයත් මෑතකදී විවෘතකරන ලද ඩී. ගණයේ පොලීසියකි. එහි පොලිස් නිලධාරීන්ගේ රාජකාරිය සඳහා ඇත්තේ ජිප් රථයක් සහ ත්‍රීරෝද රථ දෙකක් පමණි.
ජිප් රථය පරිහරණය කරන්නේ ස්ථානාධිපතිවරයාය. මෙයට අමතරව රථවාහන රාජකාරි සඳහා පොලිස් යතුරු පැදි කිහිපයක් පමනක් එහි ඇති බව සඳහන්ය.
පොලිස් තොරතුරු සඳහන් කරන ආකාරයට අනුව D ගණයේ පොලිස් ස්ථානයක ඇති සියළුම පොලිස් වාහනවලට ඉන්ධන ලබාගැනීමට පොලිස් වෙන්කර ඇත්තේ මාසයකට රුපියල් 80,000ක් පමණි.
A ගණයේ පොලිස් ස්ථානයකට වෙන්වන්නේ රුපියල් ලක්ෂ 2කට අඩු මුදලකි. නමුත් මේ මුදලින්ද සියයට 20ක් ඉතිරි කළ යුතු බවට වූ නියෝගයක්ද තිබේ. මේ අනුව බලන විට පොලීසිය මෙහෙම හරි දුවන එක පුදුමයකි.
ඒ වගේම තමයි පොලීසියේ සියයට 80 කට වැඩි වාහන ප්‍රමාණයක් ඇත්තේ වසර 10 ඉක්මවූ ඒවාය. ඒවා හොඳ ධාවන තත්ත්වයේද නැත. පොලසිය අද රාජකාරි කරන්නේ මෙසේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
හැබැයි ලෝකෙට පේන්න නම් ලොකු ලොකු සංදර්ශන පවත්වන්නටනම් පොලීසියේ ඇතැම් ලොකු මහත්වරු මෙන්ම දේශපාලනඥයන්ද දක්ෂය.