මහනුවර නගරයේ පාසල් වල දුවා දරුවන්ට covid වැළැක්වීමේ ප්‍රතිශක්තිකරණ එන්නත් දෙවැනි මාත්‍රාව ලබා දීමට ඉකුත් සතියේ සිට නැවත කටයුතු යොදා තිබේ.සෞඛ්‍ය අංශ විසින් කඩිමුඩියෙ මෙවන් තීරණයක් ගනු ලැබූයේ ඇයිද යන්න පොදු මහජනතාවට ම ගැටලුවක් වී ඇත. ලංකාවට ගෙන එන ලද කොවිඩ් ප්‍රතිශක්තිකරණ එන්නත තොගය කල් ඉකුත්වීමේ දින ආසන්න ව ඇතැයි මතයක් ද සමාජය තුළ පැතිරෙමින් තිබේ.
එහෙයින් මේ සම්බන්ධයෙන් මහනුවර නාගරික සෞඛ්‍ය දෙපාර්තමේන්තුවේ ප්‍රධාන වෛද්‍ය නිලධාරී පසන් ජයසිංහ සම්බන්ධ කරගෙන ඊට නිසි පිළිතුරක් ලබා ගැනීමට උත්සාහ කළෙමු.
ප්‍රශ්නය – covit වසංගතයක් ලෙස නැති සමයෙක පාසල් දරුවන්ට එන්නත් ලබා දීමට තීරණය කළේ ඇයි.?
පිළිතුර – කොවඩ් වසංගතය නෑ කියා කිසිවෙක් තහවුරු කළ ප්‍රකාශයක් කොතැනක හෝ ඇත්තේ නැහැ . නමුත් කොවිඩ් තියෙනවා කියා තහවුරු කළ ප්‍රකාශයක්ද මේ කාලයේ නැහැ.
කොවිඩ් ඇතිද නැතිද යන්න කිසිවෙකුටත් මේ කාලේ නිශ්චිත නිගමනයක් සහිත ප්‍රකාශයක් කිරිමේ හැකියාවක් ද නැහැ
කොවිඩ් තියෙන බවට අනුමාන කරමින් එය මර්දනය සඳහා කටයුතු කිරීමේ වරදක් මා දකින්නේ නැහැ. මා විශ්වාස කරන ආකාරයට මේ සිදුවන්නේ එයයි.
ප්‍රශ්නය – පාසල් දරුවන්ට එන්නත ලබාදීමට හිටි හැටියේ තීරණය කළේ ඇයි…?
පිළිතුර – මෙය හිටිහැටියේ ගත් තීරණයක් ලෙස මා දකින්නේ නැහැ. මේ වන විට මහනුවර දිස්ත්‍රික්කය තුළ වැඩිහිටියන්ගෙන් සියයට 80 කට ආසන්න පිරිසක් කොවිඩ් බූස්ටර් එන්නත් මාත්‍රාව ලබා ගෙන තිබෙනවා. රටේ සෙසු නගරවල මේ තරම් ප්‍රමාණයක් බූස්ටර් මාත්‍රාව ලබා ගෙන ඇතැයි තහවුරු වී නැහැ. මේ වන විට වුවත් වැඩිහිටියන්ට බූස්ටර් මාත්‍රාව ලබා දීම නතර කර නැහැ. ඕනෑම අයෙකුට සෞඛ්‍ය අංශ මගින් එම එන්නත ලබා ගැනීමේ හැකියාවක් තිබෙනවා.
වයස අවුරුදු 12 ත් 15 ත් වන පාසැල් දරුවන්ට මෙතෙක් ලබා දී ඇත්තේ කොවිඩ් ප්‍රතිශක්තිකරණ එන්නත් වලින් එක් මාත්‍රාවක් පමණයි. දෙවන මාත්‍රාව ලබා දීමට තීරණය කළේ ඒ නිසයි.
ප්‍රශ්නය – මතයක් තිබෙනවා ප්‍රතිශක්තිකරණ එන්නත් මාත්‍රාවල කල් ඉකුත් වීමේ දිනය ආසන්න වෙමින් තිබෙන බව. එහෙයින් කඩිමුඩියේ එන්නත් කරණ වැඩසටහන නැවත ආරම්භ කරන බව..?
පිළිතුර – එන්නත් වල කල් ඉකුත් වීමේ දිනය නිශ්චිතව ම දන්නේ කොළඹ මධ්‍යම බෙහෙත් ගබඩාව පමණයි. නුවරට පැමිණෙන මාත්‍රා සම්බන්ධයෙන් අප දැනුවත්. ඒවාහි කල් ඉකුත්වීමේ දිනය හරිහැටි බලා ගන්නට වෙන්නේ එන්නත් කරන වැඩසටහනක් තිබෙන දිනෙකදී. මොකද මේ ලබාදෙන එන්නත සෙල්සියස් අංශක ඍණ හැත්තෑවක් තුළ ගබඩා කොට තැබිය යුතුයි.
මහනුවර නගර සීමාව තුළට නැවත මැයි 28 දින එන්නත් තොගයක් පැමිණෙනවා. එවිට කල් ඉකුත්වීමේ දිනය පිළිබඳ අවශ්‍ය නම් දැන ගත හැකි යි.
ප්‍රශ්නය – එන්නත ගබඩාවෙන් පිටතට ගෙන දින 28 ක් ඇතුළත මිනිස් සිරුරට ඇතුළු කළ යුතුයි එසේ නොවන ඕනෑම අවස්ථාවක එන්නත කල් ඉකුත් වන්න පුළුවන් නේද?.
පිළිතුර – එය සත්‍යයක්… එන්නත නිෂ්පාදනය කළ මොහොතේ සිට කල් ඉකුත් වන දිනයේ තෙක්ම -70 C කියන සීමාව තුළ ගබඩා කොට තැබිය හැකි නම් කිසිම විටෙක එන්නතෙහි වලංගු භාවයට හානියක් වන්නේ නැහැ. ශීතදාමය ආරක්ෂා කරගනිමින් එන්නත ශරීරගත කිරීමේ දී ඉතා සැලසුම් සහගත ලෙස සැලකිලිමත්ව කළ යුතු යි.
ප්‍රශ්නය – පශ්චාත් එන්නත් කරණය සම්බන්ධයෙන් සෞඛ්‍ය අංශ හොඳ සූදානමකින් සිටිනවාද?.
පිළිතුර – ප්‍රතිශක්තිකරණ එන්නත් ලබා දුන් මුල් අවස්ථාව මෙය නොවේ.
ශ්‍රී ලංකාවේ 1928 ඉඳන් මේ වනතුරු ප්‍රතිශක්තිකරණ එන්නත් ලබාදීමේ ක්‍රියාවලිය ඉතා ඉහල තත්වයෙන් සිදුකෙරෙනවා. කක්කල් කැස්ස ගලපටලය පෝලියෝ ඇතුළු රෝග සඳහා ප්‍රතිශක්තිකරණ එන්නත් ලබාදීමේ වැඩසටහන් ක්‍රියාත්මක කෙරෙනවා. එවන් පුහුණුවක් සූදානමක් ඇති සෞඛ්‍ය අංශ කොවිඩ් එන්නත් කරණයේ දී නොසලකා හැරීම් කරන්නෙ නැහැ. පශ්චාත් ආවේක්ෂණය ඉතාම ඉහළ මට්ටමින් පවත්වාගෙන යන්න සෞඛ්‍ය අංශ කටයුතු කරනවා.
කොවිඩ් එන්නත් මාත්‍රා ලබා දීමෙන් සුළු උණ තත්ත්වයක් හෝ ඇති නොවන තැනට සාර්ථක සෞඛ්‍ය සේවා ක්‍රියාවලියක් සිදු කෙරිලා තිබෙනවා.
ප්‍රශ්නය – රටේ පවතින දහසකුත් සෞඛ්‍ය ප්‍රශ්න හමුවේ කොවිඩ් එන්නත් කරන වැඩසටහන නැවත ක්‍රියාත්මක වීම අත්‍යවශ්‍ය නොවන දෙයක් ලෙසට මා යෝජනා කරන වා.
පිළිතුර – මේ වෙලාවේ රටේ පවතින ලොකුම ප්‍රශ්නය සමාජ ආර්ථික ගැටළු හමුවේ අත්‍යවශ්‍ය ඖෂධ හිඟ වීම. කොවිඩ් වසංගත තත්වය හේතුවෙන් මියයන සංඛ්‍යාව 0 දක්වා ක්‍රම ක්‍රමයෙන් හීන වී ගොස් තිබෙනවා. රටේ මේ වන විට වැඩි පිරිසක් මිය යන්නේ පවතින රෝග තත්ත්වයන්ට අදාළ ඖෂධ හිඟ වීම මතයි. ඒ නිසාම අවම සම්පත් උපරිමයෙන් පාවිච්චි කිරීමේ වගකීම සෞඛ්‍ය අංශ වෙත පැවරී තිබෙනවා.
ප්‍රශ්නය – එසේනම් කොවිඩ් ප්‍රතිශක්තිකරණ එන්නත ලබාදීම මේ මොහොතේ අත්‍යවශ්‍ය කාරණාවක් නොවෙයි නේද?
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
පිළිතුර – එන්නත් ප්‍රමාණාත්මක ලෙස ලංකාවේ ගබඩා කොට ඇත්නම් ඒවා දරුවන්ට ලබා දී වසංගත තත්ත්වයෙන් දුරස් වීමට පියවර ගැනීම වරදක් නෙවෙයි. මේ සම්බන්ධයෙන් වෙන කිසිවක් කීමට හැකියාවක් නැහැ.