ලලිත් චාමින්ද –
ලංකා ඛණිජවැලි සමාගම විසින් ඉල්මනයිට් මෙට්‍රික්ටොන් 85000ක් විකිණිමේ ටෙන්ඩරය ඉහළම මිල ඉදිරිපත් කළ ලංසුකරුට ප්‍රදානය නොකොට තෙවන මිල ඉදිරිපත් කළ ලංසුකරුට ප්‍රදානය කිරිම නිසා ඇමරිකානු ඩොලර් 1,547,000ක පාඩුවක් ඛණිජවැලි සමාගමට සිදුවි ඇති බැව් ජාතික විගණන කාර්යාලය මගින් නිකුත්කොට ඇති විගණන වාර්තාවක සදහන් වේ.
පසුගිය වර්ෂයේ මුල්‍ය වාර්තා ඉදිරිපත් කළයුතු වුවද එම වාර්තා ඉදිරිපත්කොට නොතිබියදිත් ඉල්මනයිට් මෙට්‍රික්ටොන් 01කට ඇමරිකානු ඩොලර් 147කට එකඟවු ලංසුකරුට ටෙන්ඩරය ප්‍රදානය කොට තිබු බවද විගණනය මගින් අනාවරණය කොට ඇත.
ඉල්මනයිට් මෙට්‍රික්ටොන් 85000ක ටෙන්ඩරය සඳහා ලංසු 04ක් ලැබි තිබුණි. ඉල්මනයිට් මෙට්‍රික්ටොන් 01කට ඇමරිකානු ඩොලර් 165.20ක ඉහළම මිල ලංසුව ඉදිරිපත් කළ ලංසුකරුගේ මිල ලංසුව නිසි වගකිමකට බැදුණු ලංසු සුරක්ෂණයක් නොවන බව දක්වමින් ප්‍රතික්ෂේපකොට තිබුණි. එමෙන්ම ඇමරිකානු ඩොලර් 163 ඉදිරිපත් කළ දෙවන මිල ලංසුව ඉල්මනයිට් මොට්‍රික්ටොන් 5000ක් සඳහා පමණක් බව දක්වමින් ප්‍රතික්ෂේපකොට තිබුණි.
ඇමරිකානු ඩොලර් 147 බැගින් මෙට්‍රික්ටොන් 85000ක් දින 130ක් ඇතුළත නිදහස් කිරිමට එකඟව තෙවන ලංසුකරුට 2020 ඔක්තෝබර් මස 28 වැනිදින ඉල්මනයිට් විකිණිමේ ටෙන්ඩරය ප්‍රදානය කොට තිබුණි.
එහෙත් ඉල්මනයිට් මෙට්‍රික්ටොන් 25000කට ඇමරිකානු ඩොලර් 3 675 000ක් ගෙවා 2020 වර්ෂයේ අවසානයට නිදහස්කරගෙන ඇත්තේ ඉල්මනයිට් මෙට්‍රික්ටොන් 5 032.86කි.
එමෙන්ම 2021 වර්ෂයේ මාර්තු මාසය අවසන්වනවිට තවත් ඇමරිකානු ඩොලර් 2 940 000 ක ගෙවා ඉල්මනයිට් මෙට්‍රික්ටොන් 30000ක් පමණ ප්‍රමාණයක් ඉවත්කරගෙන ඇති බව විගණන වාර්තාවේ සඳහන් වේ. ඇමරිකානු ඩොලර් 5 880 000 ක්වූ ඉතිරි මුදල 2021 මාර්තුමස අවසන්වන තෙක් ගෙවා නොතිබු බවද විගණන වාර්තාවේ වැඩිදුරටත් සදහන් වේ.
කෙසේවුවද මේ සම්බන්ධව කළමණාකාරිත්වයේ අදහස් දැක්විමේ දි සඳහන් කොට ඇත්තේ අධ්‍යක්ෂක මණ්ඩලයේ හා කැබිනට් අනුමැතියෙන් ඇමරිකානු ඩොලර් 147කට එකඟව ලංසුකරුට ටෙන්ඩරය ප්‍රදානය කරඇති බවය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
උපරිම තරගකාරිත්වයක් තුළින් ඉහළ මිලක් ලබාගැනිමට කටයුතු කළයුතු අතරම ආයතනයට වාසිදායක වන පරිදි තිරණ ගතයුතු බව විගණනය මගින් නිර්දේශකොට ඇත.