කොවිඩ් 19 රෝගය සම්බන්ධයෙන් සමාජය තුළ පවතින වැරදි වැටහීම සහ පිළිගැන්ම හේතුවෙන් අදට ද රෝග ලක්ෂණ සහ අවදානම් තත්ත්වවල පසුවන්නන් රෝහලක් පැත්ත පළාතේ නොයන්නට පරෙස්සම් වෙති. එසේම පී.සී.ආර් පරීක්ෂණයක් වෙත යොමු වීමෙන් මඟ හරින්නට උත්සාහ කරති. එවැනි තත්ත්වයන්ට උඩගෙඩි දෙන අප්‍රසන්න අත්දැකීමක් අප වෙත පැවසූයේ රෝගියකු බැලීම සඳහා පසුගියදා ශ්‍රි ජයවර්ධනපුර රෝහලට ගිය සෞඛ්‍ය ක්ෂේත්‍රයේම ඉහළ තනතුරක් දරන පුද්ගලයෙකි. ලංකාසරට ඔහු මේ අයුරින් තමන් ලද අත්දැකීම විස්තර කළේ මේ අයුරිනි.
“ මම පසුගිය බ්‍රහස්පතින්දා ගියා ශ්‍රි ජයවර්ධනපුර රෝහලට. ඒ මගේ පෞද්ගලික රෝගියකු බැලිමට. මා යන විට වාට්ටුවලට ඇතුඑ වීමට ජනතාව සූදානමින් තමන්ගේ වාරය එන තෙක් එහි රැඳී සිටියා. එක පාරටම PPE කිට් එකක් ගහපු (පෞද්ගලික ආරක්ෂක ඇඳුම් කට්ටල පැළඳි) ඇටෙන්ඩන්ට් කෙනෙක් කෑ ගහගෙන ආවා.
“අයින් වෙන්න. අයින් වෙන්න. කොරෝනා කාරයෙක් ගේනවා. ඈත් වෙන්න ඉක්මනට… මිනිහාගේ සද්දෙට ඔක්කොම අයින් වුණා. සමහරු ඈතට යනව මම දැක්කා. නමුත් ඒ අය අර පෙරහැර බලනවා වාග් මේ දර්ශනේ දිහා බලාගෙන ඉන්නවා. ඒ වෙලාවේ රාජකාරියේ සිටි වෛද්‍යවරුන් පවා එතනින් අයින් වෙනවා මා දුටුවා.
මම දැක්ක අර පෙර ගමන් යන උපස්ථායකයා සමහර අයට කියනවා අයින් වෙන්න .අයින් වෙන්න මැරෙන්ටද හදන්නේ. දැන් ගේන්නේ කොරෝනාකාරයෙක් කියල.
ඒ එක්කම ට්‍රොලියකින්. එක රෝගියකුත් මුව ආවරණ දැමූ තවත් පා ගමනින් ආපු රෝගියකුත් ඔවුන් මේ සෙනඟ මැදින් ගිලන් රථයක් වෙත රැගෙන ගියා. අර පා ගමනින් ආපු රෝගියා මිනිස්සු ඉදිරියේ හරි අසරණ තත්ත්වයකට පත් වෙනවා මම දුටුවා. ඒ දර්ශනය දැකපු කෙනෙක් ආයේ කොරෝනා හැදිල මළත් මේ වගේ රෝහල්වලට එන එකක් නෑ. අපිට සෞඛ්‍ය අංශ හැටියට පරීක්ෂණ සඳහා මිනිස්සු යොමු වීම පසුබාන්නට මේක විදිහට කටයුතු කිරීම විශාල බාධාවක්.“ ඔහු කීවේ මෙය ශ්‍රි ජයවර්ධනපුර පමණක් කොව තවත් රෝහල්වලද සිදුවිය හැකි නිසාය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මේ පිළිබඳව සොයා බැලූ අපට තොරතුරු කියූ සෞඛ්‍ය අංශ නිලධාරියා පැවසුවේ පරීක්ෂණ වාර්තාවලින් කොවිඩ් ඇති හෝ නැති බවට තහවුරු වන තෙක් ඔවුන් වෙන් කර තබන විශේෂිත වාට්ටුවේ සිට කොවිඩ් ආසාදිත වූ රෝගීන් මෙසේ ජනතාව වැඩි වශයෙන් රැඳී සිටින ප්‍රදේශයක් හරහා ප්‍රතිකාර සඳහා වෙනත් ප්‍රතිකාර මධ්‍යස්තාන වෙත රැගෙන යාම සිදුවන බවය. ඔහු එහිදී දැනගත් තවත් කරුණක් වන්නේ අවම වශයෙන් ඔවුන් ගෙන යන විදුලි සෝපාන පවා නිසි ලෙස විෂ බීජ හරණයට ලක් නොකරන බවය.