ඒ.ජේ.ඒ. අබේනායක –
කෝටිපති ව්යාපාරික මොහොමඩ් ෂියාම් ඝාතන චෝදනාවට වරදකරු කර කොළඹ විශේෂ ත්රිපුද්ගල මහාධිකරණය විසින් නියම කළ මරණීය දණ්ඩන තීන්දුව අභියෝගයට ලක්කරමින් ගොනුකර තිබූ අභියාචනා පෙත්සම් සම්බන්ධයෙන් ශ්රේෂ්ඨාධිකරණය ලබාදුන් තීන්දුව හිටපු නියෝජ්ය පොලිස්පති වාස් ගුණවර්ධන ඇතුළු විත්තිකරුවන්ට ඊයේ (20) කොළඹ ප්රධාන මහාධිකරණ විනිසුරු ආදිත්ය පටබැඳිගේ ඉදිරියේදී කියවා දෙන ලදී.
එකී විත්තිකරුවන් හය දෙනාගේම අභියාචනා පෙත්සම් විභාග කළ ශ්රේෂ්ඨාධිකරණ පංච පුද්ගල විනිසුරු මඬුල්ල 2024.8.8 වැනිදා තීන්දුව නිකුත් කළ බවත් එමඟින් කොළඹ විශේෂ ත්රිපුද්ගල විනිසුරු මඬුල්ල 2015.11.27 වැනිදා නිකුත් කළ තීන්දුව තහවුරු කර ඇති බවත් විත්තිකූඩුවේ සිටි වාස් ගුණවර්ධන, ඔහුගේ පුත් රවිඳු ගුණවර්ධන ඇතුළු විත්තිකරුවන්ට ප්රධාන මහාධිකරණ විනිසුරුවරයා පහදා දුන්නේය.
2013 වසරේ අප්රේල් මස සිදු වූයේ යැයි කියන කෝටිපති ව්යාපාරික මොහොමඩ් ෂියාම් ඝාතනය සම්බන්ධයෙන් හිටපු නියෝජ්ය පොලිස්පති වාස් ගුණවර්ධන ඇතුළු විත්තිකරුවන් හයදෙනකුට එරෙහිව නීතිපතිවරයා විසින් පවරා තිබූ නඩුව විභාග කළ ලලිත් ජයසූරිය, සරෝජනී කුසලා වීරවර්ධන හා අමේන්ද්ර සෙනවිරත්න යන විනිසුරු මඬුල්ල විත්තිකරුවන් හයදෙනාටම මරණීය දණ්ඩනය නියම කර තිබිණි.
ශ්රේෂ්ඨාධිකරණය හමුවේ අභියාචනා පෙත්සම් විභාගය පැවැත්වෙන අතරතුර එම නඩුවේ තුන්වන විත්තිකාර පොලිස් සැරයන් සරත්චන්ද්ර අසනීප තත්ත්වයක් නිසා බන්ධනාගාරය තුළදී මියගොස් තිබීම නිසා ඔහු හැර අනෙක් විත්තිකරුවන් පස්දෙනාම ඊයේ (20දා) මහාධිකරණය හමුවට ඉදිරිපත් කිරීමට බන්ධනාගාර නිලධාරීන් පියවර ගෙන තිබිණි.
මහාධිකරණ ත්රිපුද්ගල විනිසුරු මඬුල්ල නියම කළ දණ්ඩන නියෝගයක් ශ්රේෂ්ඨාධිකරණය තහවුරු කරමින් අභියාචනා පෙත්සම් නිශ්ප්රභ කර ඇති නිසා මහාධිකරණ තීන්දුව ක්රියාත්මක විය යුත්තේ යැයි ද ප්රධාන මහාධිකරණ විනිසුරු ආදිත්ය පටබැඳිගේ විවෘත අධිකරණය හමුවේදී පෙන්වා දුන්නේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
නීතිඥ අසිත විපුලනායක පස්වන විත්තිකරු වෙනුවෙන් පෙනී සිටියේය.
