වර්ෂ 2012 -13 වකවානුවේ මේ රටේ කෘෂිකර්ම ක්ෂේත්‍රයේ විද්වත් වෘත්තිකයින් එක්වී ජාතික පොහොර උපදේශක කමිටුවේ දී සම්භාවනීය සංවාදයක් ඇති කළේය. ඒ සංවාදය හරහා නිර්දේශ කළ ජාතික ප්‍රතිපත්තිය වූයේ කාබනික පොහොර පිටරටින් නොගෙන්විය යුතුයි යන්නය. අහිතකර දිලීර, වෛරස, බැක්ටීරියා සහිත කාබනික ද්‍රව්‍ය ආනයනයේ ව්‍යසනකාරී ප්‍රතිඵල ඔවුහු එදා පෙන්වා දුන්හ.
ඒ අනුව පිටරටින් කාබනික පොහොර නොගෙන්වන ප්‍රතිපත්තිය මත පිහිටා රට තුළ නිශ්පාදනය වන කාබනික දියර පොහොරවල ප්‍රමිතිය තීරණය කිරීමට SLS 1702 ප්‍රමිතිය සකස් කරනු ලැබුවේය.
එහෙත් රට ව්‍යසනයට හෙළමින් මෙම ප්‍රමිතිය සකස් කළ මූලික පදනම විනාශ කර ආනයනික කාබනික පොහොර රට තුළට ගෙන්වා ගැනීම සඳහා උක්ත ප්‍රමිතිය භාවිත කිරීමට උමතු ඇමතිවරයා කටයුතු කරමින් සිටී. නිදහස් අධ්‍යාපනයටත් නිගා දෙමින් ස්වකීය වෘත්තීයභාවය අවලමේ යවන කොඳු බිඳගත් අවස්ථාවාදී උගතුන් පිරිසක් සිදුවන්නට යන ව්‍යසනයට ඉඩ දී සිටිති. ඒ අතර කාබනික පොහොර ගෙන්වීමට වර්ෂ 2013 දී එරෙහි වූවෝද වෙති.
එවන් පසුබිමක කාබනික දියර පොහොර ආනයනයේ ප්‍රතිඵල පිළිබඳව පේරාදෙණිය විශ්ව විද්‍යාලයේ කෘෂිකර්ම පීඨයේ පාංශු විද්‍යා දෙපාරත්මේන්තුවේ අංශ ප්‍රධානී මහාචාර්ය සමන් ධර්මකීර්ති විමසුවෙමු. මේ ඔහු ඒ සම්බන්ධයෙන් ලංකාසරට කී කතාවය.
මහාචාර්ය සමන් ධර්මකීර්ති-
පිට පිටම පරීක්ෂා කළ පොහොර සාම්පල වල අහිතකර ක්ෂුද්‍ර ජීවීන් හමුවීම නිසා චීනයේ Shindao Biotech සමාගමෙන් ඝන කාබනික පොහොර ආනයනය නොකිරීමට කෘෂිකර්ම අමාත්‍යාංශය ගත තීරණය ඉතා විශිෂ්ට එකකි. ඒ අහිතකර ක්ෂ්ද්‍ර ජීවීන් කවුරුන්ද යන්න රසායනාගාරවල කරන පරීක්ෂණ වලින් තහවුරු කර ගත නොහැකි නිසාවෙනි.
මේ පිළිබඳව ප්‍රාමාණික දැනුමක් ඇති විද්‍යාඥයින් සමාජ මාධ්‍ය වලද අනෙකුත් මාධ්‍ය වලද ඇතිතරම් කරුණු දක්වා ඇත. නමුත් අවාසනාව නම් ඔවුන් පවසන විද්‍යාත්මක කරුණු ප්‍රතිපත්ති සම්පාදකයින්ට තවමත් තේරුම් ගැනීමට බැරිවී තිබීමයි. ඒ ගරු කෘෂිකර්ම ඇමති තුමාම ප්‍රකාශ කරන පරිදි මේ වෙනුවට දැන් කාබනික දියර පොහොර පිටරටින් ආනයනය කිරීමේ සූදානමක් ඇති නිසාය.
කාබනික දියර පොහොර ආනයනය කාබනික ඝන පොහොර ආනයනය වාගේම රටට අහිතකරය. ඒ ඇයි?
කාබනික අපද්‍රව්‍ය කාබන් උපස්ථර ලෙස භාවිතා කරමින් සරල පැසවීම ක්‍රියාවලීන් මඟින් දියර කාබනික පොහොර නිපදවනු ලැබේ. ඒවා ස්වායු හෝ නිර්වායු තත්ත්ව යටතේ නිෂ්පාදනය කළ හැකිය.
පැසවීමේ ක්‍රියාවලියේදී උපස්ථරයන් දිරාපත් වීමේදී ක්ෂුද්‍ර ජීවීන්ට වැදගත් කාර්යභාරයක් ඇත. පැසවීම ක්‍රියාවලිය අවසානයේදී දියර කාබනික පොහොර වල ශාක පෝෂක වලට අමතරව, ඔක්සින් සහ සයිටොකිනින් වැනි කායික අම්ල සහ ශාක වර්ධන ප්‍රවර්ධක වැනි ෆයිටෝහෝර්මෝන පවතී. (මෙයට අමතරව රසායනික ක්‍රියාවලි මගිනුත් දියර කාබනික පොහොර නිපදවා ගත හැක).
පෝෂක පදාර්ථ ඉතාම අඩුයි.
මේ දියර පොහොරවල අඩංගු පෝෂක ප්‍රතිශතයන් ඉතා අඩු බැවින්, ඒවා රත්කර සාන්ද්‍ර කරගැනීමෙන් හෝ රසායනික පොහොර එකතුකර පෝෂක ප්‍රතිශතය ඉහල දැමීමට හෝ නිෂ්පාදකයන් බොහෝවිට උපක්‍රමික වේ. කෙසේ වෙතත් ශාක පත්‍ර වලට ඉසියහැකි සාන්ද්‍රණය ඉතා පහත් අගයක් වන බැවින්, ශාකයකට අවශ්‍ය කරන පෝෂක ද්‍රව්‍ය ප්‍රමාණය ලබාදීමට දියර පොහොර නිතර නිතර ඉසීමට සිදුවේ.
එබැවින් ආරක්‍ෂිත ගෘහ වල කරන වගාවන්හිදීමෙන් නොව ක්ෂේත්‍රයේ දී මෙම දියර පොහොරවල පෝෂක කාර්යක්ෂමතාවයද ඉතා පහළ අගයක් ගනී.
වස තොගයක් තිබිය හැකියි
නමුත් වඩා බැරෑරුම් තත්වය මෙය නොවේ.
ශාක කොටස් සහ මුහුදු පැලෑටි හැරුණකොට බොහෝවිට දියර කාබනික පොහොර නිපදවීම සඳහා භාවිතා කරනුයේ කොම්පෝස්ට් හෝ සත්ව අපද්‍රව්‍යය. මාළු අපද්‍රව්‍යත් මේ සඳහා භාවිතා කරනු ලැබේ. එමනිසා යොදා ගන්න ප්‍රභවයේ පිරිසිදු බව අනුව කාබනික දියර පොහොර වල ද ඝන කාබනික පොහොර වල අඩංගු විය හැකි අහිතකර ක්ෂුද්‍ර ජීවීන්, බැර ලෝහ, පිළිකා කාරක මෙන්ම ප්‍රතිජීවක වර්ග ද අඩංගු විය හැකිය.
මෙම කරුණු සහ සිදුවිය හැකි විනාශය සැලකිල්ලට ගෙන 2012 හෝ 2013 වසර වලදී සිට ජාතික පොහොර උපදේශක කමිටුව විසින්, පිට රටින් කාබනික පොහොර ආනයනය කිරීමට අවසර ලබානොදීමට තීරණය කරණ ලදී. එහෙත් අපේ මිනිසුන් අවාසනාවන්තය. එදා එම උපදේශක කමිටුවේ සාමාජිකයින්ව සිටිමින් පිට රටින් කාබනික පොහොර ගෙන එමේ දැවැන්ත අනතුරු වැළැක්වීම වෙනුවෙන් පෙනී සිටි විද්‍යාඥන් දැන් කාබනික උපදේශක කමිටුවේ දී මුනිවත රකිති. එසේ වන්නේ ඇයි දැයි මම තවම කල්පනා කරමි.
ප්‍රතිපත්ති බිඳ දමා ප්‍රමිතිය අවභාවිත කිරීම
දැනට පවතින කාබනික දියර පොහොර සඳහා වූ ප්‍රමිතිය (SLS 1702) සැකසුවේ මූලිකවම පිටරටින් කාබනික පොහොර ගෙනුවන් නොලැබේ යන ප්‍රතිපත්තිය මත පිහිටමිනි.
දැන් පැහැදිලි කරගත යුතු කාරණාව මෙයය. ඒ වනවිට රටේ මූලික ප්‍රතිපත්තිය කාබනික පොහොර ආනයනය කරනු නොලැබේ යන්නය. එවැනි වටපිටාවක SLS 1702 ප්‍රමිතිය සැකසුවේ දේශීයව නිපදවිය හැකි කාබනික දියර පොහොරෙවල ප්‍රමිතිය ආරක්ෂා කිරීමටය.
එහෙත් දැන් මේ ප්‍රමිතිය භාවිත කරන්නට හදන්නේ එය සකස්කල ප්‍රතිපත්තිමය පදනම විනාශ කරමින් වස විස හා අහිතකරවිය හැකි ආගන්තුක ක්ෂුද්‍ර ජීවීන් සහිත දියර පොහොර පිට රටකින් රට තුළට ආනයනය කිරීම සඳහා අවස්ථාව ලබා ගැනීමටය.
සැබෑ වෘත්තිකයින් මෙවැනි විනාශ නොකළ යුතුය. ඒ විනාශයන්ට හවුල් නොවිය යුතුය.
කළ යුත්තේ කුමක් ද?
යමෙකුට කාබනික දියර පොහොර ආනයනට අවශ්‍යම නම් පළමුවෙන්ම කළ යුත්තේ ඒ සඳහා රටත් එහි පරිසරයත් දෙකම ආරක්ෂා කර ගත හැකි සුදුසු ප්‍රමිතියක් සකස් කර ගැනීමය. එසේ නොමැතිව රටට හෙන ගැහුවත් දැනට ඇතිවී ඇති පොහොර අර්බුදයට විසඳුම් සෙවීම සඳහා නීතියේ ඇති අඩුපාඩු තුලින් රිංගා ගොස් ජාමේ බේරාගැනීම නොවේ.
මේ මුග්ධකම්වලින් සිදු වන්නේ රට තව තවත් අගාධයට ඇදවැටීමය. කිසිවෙකුට පස විනාශ කිරීමට බලපත්‍ර ලබා දිය යුතු නැත. මේ මහ පොළොව රැකබලාගෙන අනාගත පරම්පරාවට බාර මේ පොළොවේ ජීවත්ව ඉන්නා අපගේ යුතුකමය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මේ සිද්ධවෙමින් ඇති දේ පිළිබඳව ජනතාවත් දැනුම්වත් කළ යුත්තේ එබැවිනි.