විශිෂ්ට රාජ්‍ය තාන්ත්‍රිකයෙක් වූ රංජිත් ගුණරත්නයන්ය අප අතරින් නිකම ගොස්ය. වෘත්තීය ගර්වයෙන් මිදී මනුෂ්‍යය සංවේදනාවන් මුහුවන ගැඹුරු මානුෂීය මනෝභාවයන් ස්ඵර්ශ කළ හැකි විශාල හදවතක් සහිත මේ රාජ්‍ය තාන්ත්‍රිකයා විසින් සිංහල පාඨකයින් වෙත මාහැඟි දායාද කීපයක් ඉතිරි කළේය.
‘ජපානයේ ද්විතීය උසස් විද්‍යාලයීය සිසුවියකගේ ජීවන තොරතුරු’, ‘ජපානයේ ප්‍රාථමික විද්‍යාලීය සිසුවියකගේ දිවිය’, ‘ලී ක්වාන් යූ ගේ සිංගප්පූරු කථාව’වැනි පරිවර්තන කෘති ද, ‘සකුරා මල්’, ‘දෙවියන්ට අමතක වූ අය’, කෙටිකතා ද, අහස හරි දුරයි නවකතාව ද රචනා කර තිබිණි.
ඒ සියල්ල අතරින් ඔහුගේ ලේඛණ දිවියේ කූටප්‍රාප්තිය ‘තානාපතිවරයකුගේ දිනපොතින්’ තීරු ලිපි සංග්‍රහය බව හඟිමි.
ජපානය, සිංගප්පූරුව, ජර්මනිය, මෙන්ම මැදපෙරදි දුර්ග වකවානුවල ජාතිය වෙනුවෙන් රාජ්‍ය තාන්ත්‍රික මෙහෙවරක යෙදුනු රන්ජිත් ගුණරත්නයන් පුලුල් පරාසයක පැතිරුණු ඒ අත්කීම්වල අතිශය තියුණු සහ මානුෂික ඉසව් විචක්ෂණ සහ සියුම් ලෙස “තානාපතිවරයෙකුගේ දිනපොතින්“ කෘතිය තුළ සංගෘහිත කර තිබිණි.
මෙම තීරුලිපි සංග්‍රහය කලෙක “තානාපතිවරයෙකුගේ දිනපොතින්“ නමින් දිවයින ඉරිදා සංග්‍රහයේ පල වූයේය. එය මහත් වූ පාඨක සම්භාවනාවට ලක්වූවා මතකය. රංජිත් ගුණරත්නයන් ඉතාම තියුණු බස්වරහකින් ආකාර්ශනීය කතා රිද්මයෙන් යුතුව පෙළ ගැස්වූ එම අත්දැකීම් මින් පෙර කිසිම කළෙක පාඨකයින් හමුවේ විවර නොවුන ඒවාය.
ලෝකයේ විශිෂ්ට රාජ්‍ය තාන්ත්‍රිකයන් ඉදිරියේ තානාපති සේවයට පත් වී පැමිණි අපේ දේශපාලන බැලයන් නිටටෑවන් වූ ආකාරය විටෙක ඔහු නිරාවරණය කරන්නේ අත්දුටු සත්‍ය සිදුවීම් ඇසුරිනි. තමන් මුහුණ දුන් එක් එක් සංවේදී මානුෂික සිදුවීම් වචන දෙසීය පනහක කතාවකට ගොනුකර විටෙක සමස්ථ සංස්කෘතියක හැඩය අලෝකනය කිරීමේ විශ්මය ජනක ලේඛන පරිචයක් රංජිත් ගුණරත්නයට තිබිණි.
වරෙක තානාපතිවරයෙකුගේ දිනපොතින් කෘතිය සම්බන්ධව මාධ්‍ය ඔහුගෙන් මෙසේ ප්‍රශ්න කර තිබිණි.
තානාපති සේවයේ යෙදී සිටිය දී ඔබ ලත් අත්දැකීම් ඇසුරින් මේ කෘතිය රචනා වී තිබෙන්නෙ. එම අත්දැකීම් පාඨකයාට වැදගත් වෙන්නේ කොහොමද?
මෙහි සඳහන් වෙන්නේ, ටයි-කෝට් ඇඳගෙන, බෙන්ස් කාර්වල නැගලා, සාදවලට ගිහින් තමන්ට නැති පුරාජේරුවක් බලෙන් ආරෝපණය කරගෙන, හිස් වදන් දොඩන, තුන්වැනි ලෝකයේ හිස් මිනිසුන්ගේ මනෝභාව නෙමෙයි.
තුන්වැනි ලෝකයේ තානාපති නිලධාරියකු, තමන්ගේ වෘත්තීය ජීවිතයේ දී බටහිර ලිබරල්වාදය, මැදපෙරදිග මූලධර්මවාදයට බර චින්තනය හා ආසියානු චින්තනය විනිවිද අත්දුටු විවිධ අත්දැකීම් සමූහයක්, මේ මඟින් සාකච්ඡා කෙරෙනවා. ඒ අතර මම ඇසුරු කළ කුඩා මිනිසුන්, හමුවූ ශ්‍රේෂ්ඨ නායකයන් වගේ ම, මා හා ගනුදෙනු කළ රාජ්‍යතාන්ත්‍රික නිලධාරීන් පිළිබඳ බුද්ධිමය විවරණයක යෙදෙනවා. සමහර අත්දැකීම් හරහා පුහු මිනිසුන්ගේ හරසුන් අදහස් පිළිකෙව් කරන අතරෙම, අපූර්ව රාජ්‍යතාන්ත්‍රිකයන් හා රාජ්‍ය නායකයන්ගේ අදහස් ගෞරවයෙන් යුතුව අගය කරනවා.
විශේෂයෙන් ම මැදපෙරදිග ගෘහ සේවයට කොටු වූ ශ්‍රී ලාංකේය කාන්තාවන් ගෙන යන කටුක අරගලය හා ඔවුන් අනුදකින ලෝකය, ලේඛකයෙක් වශයෙන් මගේ භූමිකාව තුළ හිඳිමින්, මානුෂික බවකින් විවරණය කරන්නට මම උත්සාහ කළා.
කවුරුන් හෝ ඔවුන් ගැන කතා කළ යුතුයි. අප ඔවුන්ගේ ගැටලූ නොදැක්කා සේ සිටීම, එම ශ්‍රී ලාංකිකේයයන්ට කරන බලවත් අසාධාරණයක්. මේ සියලූ කරුණූවලට අනුව, මේ කෘතිය පාඨකයාට නව්‍ය අත්දැකීමක් වේවි.
මොකද සාමාන්‍යයෙන් තානාපති සේවයේ නිලධාරීන්, තමන්ගේ අත්දැකීම් අන් අය සමඟ බෙදා හදා ගන්නේ නැති තරම්. එක් පැත්තකින් ඔවුන්ට එසේ බෙදා හදා ගන්නට තරම් රසවත් හා අර්ථවත් අත්දැකීම් අල්ප වීම මීට හේතු විය හැකියි.
අනෙක තමන්ගේ වෘත්තිය හා බැඳුණු සිදුවීම්, ඉතා සියුම් ලෙස විග්‍රහ කරලා, විශ්ලේෂණය කිරීමේ හැකියාවක් කෙනෙක් තුළ තිබිය යුතුයි. ශ්‍රී ලංකාවේ සිටින බහුතරයක්, තානාපති සේවය ගැන එතරම් තොරතුරු දන්නේ නැහැ. විශේෂයෙන් ම මැදපෙරදිග සේවය කරන ශ්‍රී ලාංකේයයන්, තානාපති කාර්යාලවල සමහර අයගේ අඩුපාඩු නිසා, තානාපති සේවය දකින්නේ යහපත් දෘෂ්ටිකෝණයකින් නෙමෙයි.
මේ නිසා, මේ වෘත්තිය පිළිබඳ මහජනතාව තුළ තියෙන්නේ වඩාත් පැහැදිළි හා ළගන්නාසුළු චිත්‍රයක් නෙමෙයි. ශ්‍රී ලංකාවේ පොදු මහජනතාවගෙන් තරමක් ඈත්ව ඇති වෘත්තියක අත්දැකීම් ජනතාවට සමීප කරවීමෙන්, එක් පැත්තකින් විදේශ සේවය පිළිබඳ ඇති බොහෝ දුර්මත නිශේධනය කරන්න හැකි වෙනවා වගේ ම, අනෙක් පැත්තෙන් තානාපති නිලධාරියකුගේ වෘත්තීමය කාර්යභාරයේ ඇති වැදගත්කම, අවදානම හා විශේෂත්වය හෙළි දැක්වීමක් සිදු වෙනවා.
මේ කෘතිය පුරා විදහා දක්වන්නේ, අපේ සමාජය, තානාපති සේවය හා දේශපාලඥයන් තුළ නිරායාසයෙන්ම තිබිය යුතු ගුණාංග සමූහක් පිළිබඳ අර්ථාන්විත විවරණයක්. මෙය ලෝකයේ අප නොදකින පැතිකඩක්, වෙනත් තලයක් ඔස්සේ ප්‍රතිනිර්මාණය කර ඇති කෘතියක්.
රංජිත් ගුණරත්නයන් අද අප අතර නැත. මේ ඔහුවැනි මිනිසුන් ජීවත් වී සිටිය යුතු කාලයකි. රට ආර්ථිකව මෙන්ම පැහැසර චින්තන ධාරාවන් සහිත මිනිසුන්ගෙන් බංකොලොත් වෙමින් තිබේ.
එහෙත් රංජිත් ගුණරතන්යන් විසින් ජාතියක් අමතා කියූ ඒ කතාව තවමත් ඔහුගේ “තානාපතිවරයෙකුගේ දිනපොතින්“ කෘතියෙන් ජීවමානය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
හැකිනම් අරන් බලන්න… ඒක නියම පොතක්…