සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
කොරෝනා වසංගතය හේතුවෙන් ක්‍රිකට් පුහුණුව ආරම්භ කිරීමට නොහැකිව දැඩි අපහසුතාවකට පත්ව සිටින බංග්ලාදේශ ක්‍රිකට් ආයතනය ජූලි මසදී ශ්‍රී ලංකාවට නොපැමිණෙන බවට තීන්දු කර තිබේ. ඒ අනූව එම තරගාවලිය ඉදිරි කාලයකදී පැවැත්වීමට දිනයක් ලබාදෙන ලෙස බංග්ලාදේශ ක්‍රිකට් ප්‍රධානීන් ශ්‍රී ලංකාවෙන් ඉල්ලා තිබේ.
ජාතික කණ්ඩායමේ ජ්‍යෙෂ්ඨ ක්‍රීඩකයන් වන මුෂ්ෆිකර් රහීම් ඇතුළු පිරිසක් යළිත් ක්‍රිකට් පුහුණුව ඇරඹීමට අවස්ථාව දෙන ලෙස බංග්ලාදේශ ක්‍රිකට් ආයතනයෙන් ඉල්ලීමක් කළද ක්‍රිකට් ආයතනය එම ඉල්ලීම ප්‍රතික්ෂේප කර තිබේ.
ලබන සැප්තැම්බර් මස දි ශ්‍රී ලංකා බංගලාදේශ ටෙස්ට් තරගාවලිය පැවැත්වීම කෙරෙහි බංග්ලාදේශ ක්‍රිකට් ආයතනයේ අවධානය යොමුව තිබේ. නමුත් ශ්‍රී ලංකා ක්‍රිකට් ආයතනය ඒ සම්බන්ධව මෙතෙක් නිල වශයෙන් කිසිදු දැනුවත් කිරීමක් කර නැති බව ද බංග්ලාදේශ ක්‍රිකට් මෙහෙයුම් නිලධාරියා පවසයි.
කෝවිඩ් 19 වසංගතය පාලනය කළ රටවල් අතර ශ්‍රී ලංකාව ද ඉදිරියෙන් සිටින අතර ශ්‍රී ලංකා ක්‍රීඩකයන් මේ වන විටත් පුහුණුව ආරම්භ කර තිබේ. බංග්ලාදේශ ක්‍රීඩකයන්ට තවමත් පුහුණුවීමට අවසර නොතිබුණ ද මේ සතියේ සිට ඔවුන්ට තනි තනිව පුහුණුවීමට බංග්ලාදේශ ක්‍රිකට් ආයතනය අවසර දී තිබේ. නමුත් සියලුම ක්‍රීඩකයන් තනි තනිව කරන පුහුණුවෙන් ප්‍රයෝජනයක් ගනී ද යන්න බංග්ලාදේශ ක්‍රිකට් ආයතනය අවිශ්වාසයෙන් පසුවේ.
“ශ්‍රී ලංකාව ක්‍රිකට් ක්‍රීඩා කිරීමට සිතුවත් අපි අපේ පුහුණුවීම්වත් තවම ආරම්භ කරලා නැහැ. වඩාත් වැදගත් වන්නේ තත්ත්වය යහපත් අතට හැරෙන්නේ කවදාද යන්නයි. ඒක අපි කිව නොහැකියි. අපි තනි තනිව පුහුණු වීමට කැමැති අය විතරක් සොයනවා. නමුත් සෑම කෙනෙකුට එය කිරීමට කැමැතිද නැතහොත් එය ක්‍රිකට් ක්‍රීඩකයන් කිහිප දෙනෙකුට විතරක් සීමා වෙයිද කියන්න බැහැ.” යනුවෙන් බංගලාදේශ ක්‍රිකට් ආයතනය පවසයි.
ඉකුත් මාර්තු මස එංගලන්ත කණඩායම සමග පැවැත්වීමට නියමිතව තිබු ටෙස්ට් තරගාවලියද කෝවිඩ් 19 වසංගතය හේතුවෙන් ලබන ජනවාරි මාසය දක්වා කල් දැමුණි. අනතුරුව ඉන්දියානු කණ්ඩායම එක්දින තරග තුනකට සහ විස්සයි විස්ස තරග තුනකට මෙම ජුනි මාසයේදී ශ්‍රී ලංකාවට පැමිණීමට නියමිතව තිබුණද වසංගත තත්ත්වය හමුවේ එම තරගාවලියද කල් දැමීමට දෙරටේ ක්‍රිකට් බළධාරීන් තීරණය කළේය.