විදේශයක සිට පැමිණෙන පුද්ගලයෙක් දින 14ක් නිරෝධායනය කිරීමේ ජාතික නිරෝධායන ප්‍රතිපත්තිය මත පදනම්ව එල්.පී.එල්. පන්දුවාර විස්සයි විස්ස ක්‍රිකට් තරගාවලියේ දින දර්ශනය යළිත් සකස් කිරීමට තීරණය වීමත් සමග හෙට (01 දා) පැවැත්වීමට නියමිතව තිබූ ක්‍රීඩක වෙන්දේසිය ලබන 9 වන දා තෙක් කල් ගොස් තිබේ.
අයි.පී.එල්. තරගාවලිය නොවැම්බර් 10 වැනිදා දක්වා පැවැත්වෙන බවත්, අයි.පී.එල්. සහභාගී වන ක්‍රීඩකයනුත් එල්.පී.එල්. පැමිණෙන නිසා ඔවුන්ටත් නිරෝධානය සඳහා කාලයක් අවශ්‍ය බැවින් මෙවැනි තීන්දුවක් ගන්නට සිදු වූ බව එල්.පී.එල්. තරගාවලියේ අධ්‍යක්ෂක රවීන් වික්‍රමරත්න පැවසීය.
තරගාවලිය ලබන නොවැම්බර් 14 වැනිදා සිට 21 වැනිදා දක්වා කාල සීමාවේදී පැවැත්විමට මීට පෙර සැලසුම් කර තිබුණත් එය කල් ගියේ දෙවැනි වතාවටය. මීට පෙර ඉකුත් අගෝස්තු 28 වැනිදා සිට සැප්තැම්බර් 20 වැනිදා දක්වා තරගාවලිය පැවැත්වීමට සැලසුම් කර තිබිණි.
කණ්ඩායම් පහක සහභාගීත්වයෙන් පැවැත්වෙන එල්.පී.එල්. තරගාවලියට විදෙස් ක්‍රීඩකයන් 30 දෙනෙක් තෝරා ගැනීමට නියමිතය. අදාළ ක්‍රීඩකයන් තෝරා ගැනීමේ වෙන්දේසිය ලබන 9 වැනිදා දක්වා කල් දැමීමට කටයුතු කර ඇත.
ශ්‍රී ලංකා ක්‍රිකට් විසින් ක්‍රීඩක වෙන්දේසිය සඳහා විදෙස් ක්‍රීඩකයන් 270 ක නම් ලැයිස්තුවක් සකස් කර තිබුනි. එම ලයිස්තුවට විස්සයි විස්ස තරග රටාවේ ලොව නම් දැරූ ක්‍රීඩකයන් වන ක්‍රිස් ගේල් ඩැරන් සමී, ජොනී බෙයාස්ටෝ, කෙමාර් රොච්, ෂකීබ් අල් හසන්, ෂොයිබ් මලික්, ටේරන්ට් බෝල්ට්, ටිම් සවුති, ඇඩම් මිලන් සහ ෆෆ් ඩු ප්ලෙසිස් යන ක්‍රීඩකයන්ද ඇතුළත් වීම විශේෂත්වයකි. මීට අමතරව සහිඞ් අෆ්රීඩිව දැනටමත් ගාල්ල කණ්ඩායමේ විදෙස් ක්‍රීඩකයා වශයෙන් වෙන්කර ගැනීමට එම කණ්ඩායමේ අයිතිකරුවන් ක්‍රියා කර තිබේ.
නමුත් තරගාවලියේ දින වකවානු වෙනස් කිරීමෙන් එල්.පී.එල්. පැමිණීමට කැමැත්ත පළ කළ ක්‍රීඩකයන් කිහිප දෙනෙකුට තරගාවලියට සහභාගි වීමේ අවස්ථාව මග හැරෙනු ඇතැයි පැවසේ. වාර්තා වන පරිදි බංග්ලාදේශ ජාතික කණ්ඩායම නියෝජනය කරන ක්‍රීඩයන්ට එල්.පී.එල්. සහභාගීත්වය අවිනිශ්චිත තත්ත්වයකට පත්ව ඇත.
එල්.පී.එල්. සහභාගි වීමට බංගල්දේශ ක්‍රීඩකයන් වන ඉම්රුක් කයිස්, රුබෙල් හොසේන්, ෂකීබ් අල් හසන්, ටමීම් ඉක්මාල්, ලිටන් ඩෑස්, සබීර් රහමන් සහ මෙහෙදි හසන් කැමැත්ත පළ කර තිබුණි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
උද්ගතවී ඇති තත්ත්වය අනූව එල්.පී.එල්. තරගාවලිය මෙම 2020 වසරේදි පැවැත්වීම අවිනිශ්චිත තත්ත්වයක පවතින අතර එය ජනවාරි හෝ පෙබරවාරි මසදී පැවැත්වීමට ශ්‍රී ලංකා ක්‍රිකට් සහ තරගාවලිය අයිතිය දරන අයි.පී.ජී. ආයතනය අවධානය යොමු කර තිබේ.