දිනසේන රතුගමගේ –
ඉන්දියාවේ තමිල්නාඩුවේ මණ්ඩපම් සරණාගත කඳවුරේ සිට නීති විරෝධී ධීවර බෝට්ටුවකින් යාපනය බලා පැමිණෙමින් සිටි දෙමළ සරණාගතයින් තිදෙනෙකු සහ බෝට්ටුකරුවන් තිදෙනෙකු මණ්ඩතිව් පොලීසිය විසින් අත්අඩංගුවට ගෙන තිබේ.
පොලිස් විමර්ශනවලදී අනාවරණය වී ඇත්තේ මොවුන් යාපනය, ගුරුනගර් ප්රදේශයේ පදිංචි 48 හැවිරිදි පුද්ගලයෙකු, ඔහුගේ 47 හැවිරිදි බිරිඳ සහ 20 හැවිරිදි දියණිය බවයි. ආර්ථික දුෂ්කරතා හේතුවෙන් ජීවත් වීමට නොහැකි බව පවසමින් මොවුන් 2022 වසරේදී ධනුස්කොඩි වෙත බෝට්ටු මගින් පලා ගොස් මණ්ඩපම් සරණාගත කඳවුරේ රැකවරණය ලබා තිබේ.
උතුරු පළාතේ සිට මෙලෙස පලා ගිය පුද්ගලයින් 311 දෙනෙකු දැනට මණ්ඩපම් කඳවුරේ පසුවන අතර, ඔවුන් නැවත ශ්රී ලංකාවට එවන්නැයි ඉල්ලීම් කර ඇත. එහෙත් පවතින නීතිමය තත්ත්වයන් මත එම ක්රියාවලිය ප්රමාද වන බව ඉන්දීය බලධාරීන් දැනුම් දීමත් සමඟ, බොහෝ පිරිසක් නීති විරෝධී ලෙස බෝට්ටු මගින් යළි දිවයිනට පැමිණීමට උත්සාහ කරමින් සිටිති.
මෙලෙස පැමිණි පිරිස සහ ඔවුන්ට පහසුකම් සැලසූ ඉන්දීය බෝට්ටුකරුවන් තිදෙනාද අත්අඩංගුවට ගෙන ඇති අතර, සැකකරුවන් හය දෙනාම අධිකරණය වෙත ඉදිරිපත් කිරීමට නියමිතය.
