මීගමුව විශේෂ – ලංකාසර –
-
මීගමුව බන්ධනාගාරයේ සන්නද්ධ ප්රහාරය ගැන සොයන්න විශ්රාමික ශ්රේෂ්ඨාධිකරණ විනිසුරුවරයෙකුගේ ප්රධානත්වයෙන් ත්රිපුද්ගල කමිටුවක්!
මීගමුව බන්ධනාගාරය තුළ පුද්ගලයන් දෙදෙනෙකුට මරු කැඳවමින් තවත් 38 දෙනෙකුට තුවාල සිදු කළ දරුණු ගැටුම සහ එය පාලනය කිරීමෙන් අනතුරුව අද (06) උදෑසන බන්ධනාගාර නිලධාරීන් ඉලක්ක කර ගනිමින් එල්ල වූ සන්නද්ධ ප්රහාරය පිටුපස ප්රබල මත්ද්රව්ය ජාවාරම්කරුවෙකු සිටින බව විමර්ශන අංශ මගින් අනාවරණය කරගෙන තිබේ.
මෙම ගැටුම සැලසුම් සහගතව සිදු වූවක් ද යන්න පිළිබඳව විමර්ශන අංශවල දැඩි අවධානය යොමු වී ඇති අතර, සිද්ධිය සම්බන්ධයෙන් පුළුල් විමර්ශනයක් පවත්වා වාර්තාවක් ලබා දීම සඳහා අද (06) රැස් වූ කැබිනට් මණ්ඩල අනුමැතිය ඇතිව ත්රිපුද්ගල කමිටුවක් ද පත් කර ඇත.
විධිමත් හා පුළුල් විමර්ශනයක් සිදුකර, සිද්ධියට හේතු වූ කරුණු, ඒ පිළිබඳ ගත යුතු ක්රියාමාර්ග සහ එවැනි සිදුවීම් යළි ඇතිවීම වැළැක්වීම සඳහා ගත යුතු නිර්දේශ ඇතුළත් වාර්තාවක් ඉදිරිපත් කිරීම මෙම කමිටුවේ වගකීම වේ.
එම කමිටුවේ සභාපතිවරයා ලෙස විශ්රාමික ශ්රේෂ්ඨාධිකරණ විනිසුරු ප්රියන්ත ප්රනාන්දු පත් කර ඇති අතර, විශ්රාමික අතිරේක සොලිසිටර් ජනරාල්, ජනාධිපති නීතිඥ මිලින්ද ගුණතිලක සහ ජනාධිපති නීතිඥ මොහාන් වීරකෝන් සෙසු සාමාජිකයන් ලෙස පත් කර ඇත.
අදාළ කමිටුව විසින් සිද්ධිය පිළිබඳ සියලු කරුණු පුළුල් ලෙස විමර්ශනය කර, තම නිර්දේශ සහිත වාර්තාව රජයට ඉදිරිපත් කිරීමට නියමිතය.
ගැටුමට මුල් වූ ‘සුරේෂ් සහ බූරු මූණා’ සම්බන්ධය
විමර්ශන අංශ අනාවරණය කරගන්නා පරිදි මෙම ගැටුමේ මහමොළකරු වන්නේ බන්ධනාගාරය තුළ සිට රහසිගතව මත්ද්රව්ය ජාවාරම් මෙහෙයවූ සුරේෂ් පුෂ්පකුමාර නැමැති මත්ද්රව්ය ජාවාරම්කරුවෙකි. ඔහු දැනට බූස්ස අධිආරක්ෂිත බන්ධනාගාරයේ රඳවා සිටින, මිනීමැරුම් 29ක් සම්බන්ධයෙන් චෝදනා ලබා සිටින සංවිධානාත්මක අපරාධකරු වරුණ රංග හෙවත් ‘බූරු මූණා’ නැමැත්තාගේ සමීපතමයෙකු ලෙස හඳුනාගෙන තිබේ.
සුරේෂ් පුෂ්පකුමාර විසින් බන්ධනාගාරය තුළ සිදු කරන මත්ද්රව්ය ජාවාරම පිළිබඳව තවත් රැඳවියන් පිරිසක් විසින් නිලධාරීන්ට ඔත්තු ලබා දී ඇති බවට සැක කරමින්, බන්ධනාගාරයේ විවෘත ප්රදේශයක් තුළ දී එම පිරිසට ඊයේ දිනයේ සවස (05) ප්රහාරයක් එල්ල කිරීමත් සමඟ මෙම ගැටුම ආරම්භ වී ඇත.
තත්ත්වය පාලනය කිරීම සහ උදෑසන එල්ල වූ ප්රහාරය
ඊයේ රාත්රියේ ඇති වූ ගැටුමෙන් දෙදෙනෙකු මියගොස්, දෙදෙනෙකු බරපතල තුවාල ලබා තවත් 38 දෙනෙකු රෝහල්ගත කිරීමෙන් පසු නිලධාරීන් මැදිහත් වී තත්ත්වය පාලනය කර තිබුණි. කෙසේ වෙතත්, අද උදෑසන රැඳවියන්ට උදේ ආහාරය ලබා දී ඔවුන් අධිකරණය වෙත රැගෙන යාමට සූදානම් වන අවස්ථාවේ දී මෙම පාතාල කල්ලි දෙක අතර නැවතත් ගැටුම උග්ර වී තිබේ.
එය පාලනය කිරීමට බන්ධනාගාර නිලධාරීන් මැදිහත් වූ අවස්ථාවේ දී, නිලධාරීන් ඉලක්ක කර ගනිමින් ගිනිඅවි ප්රහාරයක් එල්ල වී ඇති අතර ඉන් බන්ධනාගාර කාර්යමණ්ඩලයේ නිලධාරීන්ට ද වෙඩි වැදී තුවාල සිදු වී ඇත.
වගකීම මම භාරගන්නවා – අධිකරණ ඇමති බන්ධනාගාරයට පැමිණෙයි
සිද්ධියෙන් පසු අද පස්වරුවේ මීගමුව බන්ධනාගාරයේ නිරීක්ෂණයක නිරත වූ අධිකරණ අමාත්ය හර්ෂණ නානායක්කාර, ඉදිරි ක්රියාමාර්ග පිළිබඳව උසස් නිලධාරීන් සමඟ විශේෂ සාකච්ඡාවක නිරත විය.
එහිදී මාධ්ය වෙත අදහස් දැක්වූ අමාත්යවරයා මෙසේ පැවසීය:
“අධිකරණ ඇමතිවරයා ලෙස මගේ භාරයේ තිබෙන ආයතනයකයි මේක වෙන්නේ. ඒ නිසා ඒ වගකීම මට ඒ ආකාරයෙන්ම භාරගන්න වෙනවා. ඊයේ රාත්රියේ මුලින්ම ගැටුම ඇති වන්නේ මත්ද්රව්යවලට සම්බන්ධ පාතාල කල්ලි කණ්ඩායම් දෙකක් අතරයි. නැතිව අපරාධකරුවන් සහ බන්ධනාගාර නිලධාරීන් අතර නොවෙයි.
අද උදෑසන ඔවුන් උසාවියට රැගෙන යන්න ලෑස්ති වෙනකොට කණ්ඩායම් දෙක අතර ගැටුම් උග්ර වුණා. එය පාලනය කරන්න බන්ධනාගාර නිලධාරීන් මැදිහත් වුණා. බන්ධනාගාරය ඇතුළේ සාපේක්ෂව විශාල සෙනගක් ඉන්නවා. මෙහිදී කාර්යමණ්ඩලයටත් වෙඩි වැදිලා තියෙනවා.”
බන්ධනාගාරය තුළට ගිනිඅවි ඇතුළු වූ ආකාරය පිළිබඳව විශේෂ අවධානය යොමු කර ඇති බවත්, පත් කළ විශේෂ කමිටුවේ නිර්දේශ මත පදනම්ව මෙවැනි සිදුවීම් නැවත ඇති වීම වැළැක්වීමට සහ ගැටලුව සම්පූර්ණයෙන් විසඳීමට කටයුතු කරන බවත් ඇමතිවරයා වැඩිදුරටත් අවධාරණය කළේය.
