හැටන් – රංජිත් රාජපක්ෂ
බගවන්තලාව, රාණිකාඩු ප්රදේශයේ සිට බගවන්තලාව නගරයේ පාසල් කරා ශිෂ්යයන් රැගෙන යමින් තිබූ පෞද්ගලික බස් රථයක් අද (28) උදෑසන දරුණු අනතුරකට මුහුණ පෑමෙන් එහි ගමන් ගත් පාසල් සිසුන් 34 දෙනෙකු තුවාල ලබා රෝහල්ගත කර තිබේ.
අද උදෑසන 7:30 ට පමණ මෙම අනතුර සිදුව ඇත්තේ රාණිකාඩුව – බගවන්තලාව ප්රධාන මාර්ගයේ කැම්පියන් වත්ත ප්රදේශයේදීය. බස් රථය අධික බෑවුම් සහිත මාර්ගයක ධාවනය වෙමින් තිබියදී එහි තිරිංග පද්ධතිය (Brakes) හදිසියේම අක්රිය වී තිබේ.
එම අවස්ථාවේදී බස් රථය පාලනය කරගත නොහැකිව ප්රපාතයකට පෙරළීමට තිබූ අවදානම වටහාගත් රියදුරු, ඉතාමත් සූක්ෂ්ම ලෙස බස් රථය මාර්ගය අසල වූ පස් කන්දක ගැටීමට සලස්වා නතර කිරීමට කටයුතු කර ඇත. රියදුරු ගත් මෙම ක්ෂණික සහ බුද්ධිමත් තීරණය හේතුවෙන් සිසුන් විශාල පිරිසකගේ ජීවිත බේරා ගැනීමට හැකි වූ බව ප්රදේශවාසීහු පවසති.
අනතුරින් තුවාල ලැබූ සිසුන් 34 දෙනාම වහාම බගවන්තලාව ප්රාදේශීය රෝහල වෙත ඇතුළත් කෙරිණි. බගවන්තලාව ප්රාදේශීය වෛද්ය නිලධාරී ඒ.එස්.කේ ජයසූරිය ප්රකාශ කළේ ඉන් දස දෙනෙකු වැඩිදුර ප්රතිකාර සඳහා දික්ඔය මූලික රෝහල වෙත මාරු කර යැවූ බවයි. සෙසු සිසුන් 24 දෙනා බගවන්තලාව රෝහලේ නේවාසිකව ප්රතිකාර ලබන අතර, ඔවුන්ගෙන් බහුතරයක් අනතුර හේතුවෙන් ඇති වූ දැඩි කම්පනය (Shock) නිසා ප්රතිකාර ලබන බවත් ඔවුන්ගේ තත්ත්වය බරපතල නොවන බවත් වෛද්යවරයා වැඩිදුරටත් තහවුරු කළේය.
වතුකරයේ දුෂ්කර මාර්ගවල ධාවනය වන පෞද්ගලික පාසල් ප්රවාහන රථ නිසි නඩත්තුවකින් තොරව ධාවනය වීම මෙවැනි අනතුරුවලට ප්රධාන හේතුව වී ඇති බවට දෙමාපියෝ චෝදනා කරති. රජයේ “සිසු සැරිය” බස් රථ සේවාව මෙවැනි දුෂ්කර මාර්ගවලට ක්රියාත්මක නොවීම හේතුවෙන් අනාරක්ෂිත පෞද්ගලික බස් රථ සේවාවන් ලබා ගැනීමට තමන්ට සිදුව ඇති බව ඔවුහු පවසති.
සිද්ධිය සම්බන්ධයෙන් බගවන්තලාව පොලීසිය වැඩිදුර විමර්ශන පවත්වයි.
