ලලිත් චාමින්ද –
ගාල්ල දිස්ත්රික්කයේ අස්වැසුම ප්රතිලාභීන් 4,972 දෙනෙකු සවිබල ගැන්වීමේ වැඩසටහන් සඳහා සම්බන්ධ වීමට අකමැත්ත ප්රකාශ කර ඇති බව ගාල්ල දිස්ත්රික් සමෘද්ධි අධ්යක්ෂිකා කාංචනා චතුරාණි පවසන්නීය.
සවිබල ගැන්වීමේ වැඩසටහන්වලට සම්බන්ධ වුවහොත් තමන්ට දැනට ලැබෙන අස්වැසුම ප්රතිලාභය අහිමි වේ යැයි පවතින අනියත බිය මෙයට ප්රධාන හේතුව වී ඇති බව ඇය පෙන්වා දෙයි.
අස්වැසුම ප්රතිලාභීන් සවිබල ගැන්වීමේ වැඩසටහන සඳහා සම්බන්ධ කර ගැනීමට පෙර ඔවුන්ගේ කැමැත්ත හෝ අකමැත්ත ලබා ගැනීමට විශේෂ අයදුම්පතක් මගින් තොරතුරු රැස් කරනු ලබයි. ඒ අනුව මේ වන විට ප්රතිලාභීන් 3,770 දෙනෙකු පමණක් වැඩසටහන සඳහා කැමැත්ත පළ කර ඇති බව දිස්ත්රික් සමෘද්ධි අධ්යක්ෂිකාව සඳහන් කළාය.
ගාල්ල දිස්ත්රික්කයේ තවත් ප්රතිලාභීන් 5,668 දෙනෙකු සවිබල ගැන්වීමේ වැඩසටහන සඳහා හඳුනා ගැනීමට නියමිතය. නියමිත නිර්ණායක අනුව මේ වන විටත් පවුල් 4,035ක් සඳහා පවුල් සංවර්ධන සැලසුම් සකස් කර අවසන්ව තිබේ.
ප්රතිලාභී පවුල්වල දරු දැරියන් වෘත්තීය පුහුණු පාඨමාලා සඳහා යොමු කිරීමට උත්සාහ කළ ද, එමගින් අස්වැසුම දීමනාව නතර වේ යැයි පවතින බිය නිසා බොහෝ පිරිසක් ඊට ඉදිරිපත් නොවන බව ද කාංචනා චතුරාණි වැඩිදුරටත් කියා සිටියාය. ගාල්ල දිස්ත්රික්කය තුළ මේ වන විට අස්වැසුම ප්රතිලාභීන් 98,000කට ආසන්න සංඛ්යාවක් සිටිති.
