මෙරට අපරාධවලට සම්බන්ධ පුද්ගලයින් තිදෙනෙක් ඉන්දියාවේ රැඳී සිටිය දී ඉන්දියාවේ බැංගලෝර්හි මධ්යම අපරාධ කාර්යාංශය විසින් අත් අඩංගුවට ගෙන තිබේ.
ඉන්දීයානු පොලිසිය උපුටා දක්වමින් ඉන්දීය මාධ්ය වාර්තා කරරන්නේ 2024 දී ඉන්දියාවට නීතිවිරෝධී ලෙස ඇතුළු වූ ශ්රී ලාංකික පුරවැසියන් තිදෙනෙකු දේවානහල්ලි පොලිස් බල ප්රදේශය තුළ ඇති මහල් නිවාසයකින් අත්අඩංගුවට ගෙන ඇති බවය. විමර්ශනවලින් හෙළි වූයේ විත්තිකරුවන් යාපනයේ සිට තමිල්නාඩුවේ රාමේෂ්වරම් දක්වා බෝට්ටුවකින් ගමන් කර ඇති අතර පසුව තවත් විදේශිකයෙකුගේ සහාය ඇතිව බැංගලෝරයට පැමිණ ඇති බවයි.
වසරකට වැඩි කාලයක් ඔවුන් විදේශ ගමන් බලපත්ර හෝ වීසා බලපත්ර නොමැතිව නගරයේ පදිංචිව සිට ඇත. මේ වනවිට මෙම පුද්ගලයින් තිදෙනාට එරෙහිව නඩුවක් ගොනු කර ඇති අතර ඔවුන් රැඳී සිටීම පිටුපස ඇති හේතුව තීරණය කිරීම සඳහා වැඩිදුර විමර්ශන සිදුවෙමින් පවතින බව පැවසීය.
මෙසේ අත් අඩංගුවට ගෙන ඇත්තේ රත්මලානේ පදිංචිකරුවෙක්වන ඉරේෂ් හංසක, කොටහේනේ පදිංචිකරුවෙක්වන සුගත් සවීන්ද්ර සහ දෙවුන්දර පදිංචිකරුවෙක්වන දිලීප් හර්ෂාන් යන තිදෙනෙකි. ඔවුන් සතුව තිබී විදේශ ගමන් බලපත්ර ඇතුළු වළංගු ලියකියැවිලි කිසිවක් හමු නොවූ බව ද එරට පොලිසිය සඳහන් කරයි.
ඉරේෂ් හංසක යනු මෙරට මත්ද්රව්ය ජාවාරම් නඩුවකට අවශ්ය කර සිටින පුද්ගලයෙකි. සුගත් සවීන්ද්ර පුද්ගල ඝාතන සහ වෙනත් වැරදි සම්බන්ධව චෝදනා ලැබ සිටින්නෙකි. සිද්ධිය සම්බන්ධව එරට පොලිසිය විසින් ශ්රී ලංකා මහ කොමසාරිස් කාර්යාලය වෙත දැනුම් දී ඇත. ප්රශ්න කිරීමෙන් පසු මෙම පුද්ගලයින් රටින් පිටුවහල් කිරීමේ ක්රියාවලිය ආරම්භ කරන බව ඉන්දීය මාධ්ය වාර්තා කර තිබේ.
