ජනාදරයට පත් ප්‍රවීණ සිනමා සහ ටෙලිනාට්‍ය රංගන ශිල්පී ඥානාංග ගුණවර්ධන අද (04) දිවි සැරියෙන් සමු ගත්තේය.
දැඩි සේ ගිලන් වී කොළඹ ජාතික රෝහලේ දැඩි සත්කාර ඒකකයේ ප්‍රතිකාර ගනිමින් සිටි ගුණවර්ධනයන් දිවියෙන් සමුගන්නා විට 78 වැනි වියේ පසුවූයේය.
ඔහුගේ දේහය බොරැල්ලේ පෞද්ගලික මල්ශාවක හෙට (5) පෙරවරු 8.30 සිට තැන්පත් කර තිබෙන අතර අවසන් කටයුතු බොරැල්ල කනත්තේදී අනිද්දා (6) සෙනසුරාදා පස්වරු 3.00 ට සිදුකෙරේ.
ටෙලිනාට්‍ය දහසකට අධික සංඛ්‍යාවකට සහ චිත්‍රපට 100 කට අධික සංඛ්‍යාවකට රංගනයෙන් දායක වී ඥානාංග ගුණවර්ධන පරාක්‍රම ද සිල්වාගේ “හෙවණැලි ඇද මිනිස්සු” චිත්‍රපටයෙන් සිංහල සිනමාවට පිවිසෙන්නේය. ඔහු “සප්ත කන්‍යා”, “කුලගෙය” සහ “සෙයිලම” වැනි චිත්‍රපටවල කළ රංගනයෙන් සිනමාව තුළ කාගේත් අවධානයට පාත්‍ර විය.
සම්පූර්ණයෙන්ම පැසුණු සුදු හිස කෙස්වලින් පිරීගිය හිසක් සහිත ඔහු වැඩිහිටි චරිත සඳහා නිතැතින්ම තෝරාගත් නළුවන් අතර ප්‍රමුඛයෙක් විය. “වීසිදැල” චිත්‍රපටයේ ඔහු කළ පොලිස් නිළධාරියාගේ චරිතය සහ “අනන්ත රාත්‍රිය” චිත්‍රපටයේ ස්ත්‍රී ලෝලියෙකු ලෙස කළ චරිතය ඔහුගේ සිනමා භාවිතාවේ නොමැකෙන මතකයන් ය.
“හිත හොඳ ගැහැණියක්”, “තරණය”, “මාරුතය”, “අන්තිම රැය”, “මන්දාකිනි”, “සත්‍යා දේවි” සහ “කිණිහිරියා මල්” ඔහු රංගනය කළ තවත් සිනමාපට කිහිපයකි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
“චාතූර්යා”, “තට්ටු ගෙවල්”, “නේත්‍රාංජලී”, “සිහින දනව්ව” සහ “සිහින පුරය” වැනි ජනප්‍රිය ටෙලිනාට්‍ය රැසකින් ඔහුගේ රංගන මතකයන් පිරෙයි.