කීර්ති ප්රනාන්දු –
එළැඹෙන උත්සව සමයට පෙර රජය මැදිහත් වී දේශීය පිටි සමාගම් දෙකෙහි තෙරිඟු පිටි මිල සහ ආනයනික මාගරින් මිල අඩු කරන්නේ නම් පාන් ගෙඩියක් රුපියල් 100 කට හා කේක් කිලෝවක් රුපියල් 800 ත් 900 ත් අතර මිලකට ලබා දිය හැකි බව සමස්ත ලංකා බේකරි හිමියන්ගේ සංගමයේ සභාපති එන් .කේ . ජයවර්ධන පැවසීය .
එසේම අනෙකුත් බේකරි නිෂ්පාදනයන්හි මිලද පාරිභෝගික ජනතාවට විශාල සහනයක් ගෙන දෙන අයුරින් මිල අඩු කළ හැකි බවද ඔහු පැවසුවේය.
මෙම මිල අඩු කිරීමට නම් අනිවාර්යයෙන්ම රජය මැදිහත් වී දේශීය පිටි සමාගම් දෙක මගින් රුපියල් 195 කට අලෙවි කරන තිරිඟු පිටි කිලෝවක් රුපියල් 150කටත් ,රුපියල් 1000 ක්ව පවතින ආනයනික මාගරින් කිලෝවක් රුපියල් 700ත් 800ත් අතර මිලකටත් මිල අඩු කිරීමක් සිදුකළ යුතු බවද සභාපතිවරයා පැවසීය . එසේම මේ වන විට තිරිඟු පිටි කිලෝවක් වෙනුවෙන් පනවා ඇති රුපියල් 45ක හා මාගරින් කිලෝවක් වෙනුවෙන් පනවා ඇති රුපියල් 600 ක බද්ද අඩු කිරීමෙන් තිරිඟු පිටි මිල හා මාගරින් මිල අඩු කළ හැකි බව පෙන්වා දෙන සභාපතිවරයා එසේ බදු අඩු කිරීම තුළින් රජයට කිසිදු පාඩුවක් සිදු නොවන බවද කීය .
එම නිසා එළඹෙන නත්තල් සහ අලුත් අවුරුද්දට පෙර පාන් , කේක් සහ අනෙකුත් බේකරි නිෂ්පාදනවල මිල අඩු කර පාරිභෝගික ජනතාවට සහනයක් ලබා දිය හැකි බවත් ඒ සඳහා රජය කඩිනමින් තිරිඟු පිටි මිල සහ මාගරින් මිල අඩු කිරීමට පියවර ගනු ඇති බවට විශ්වාස කරන බවද ජයවර්ධන පැවසීය
