පසුගිය 13 වැනිදා යාල ජාතික වනෝද්‍යානයේ යාල සංචාරක නිකේතනයක් තුළදී පෙදරේරුවෙක් විසින් සොරකම් කළ ලක්ෂ 22ක් පමණ වටිනා දියමන්ති සවිකළ මුද්ද ප්‍රසන්න රණතුංග ඇමතිවරයාගේ දියණිය ගේ මගුල් මුද්ද නොවන බවට ජාතික පුවත්පත් දෙකක් කීවේය.
අදාල නිවැරදි කිරීම පුවත්පතේ මුල් පිටුවේම සිදුකර තිබිණි.
මුද්ද පසුබිම් වූ සිද්ධියේ පෙළ මෙසේය.
යාල වනෝද්‍යානයේ යකදුරු කෑම්ප් සයිඩ්හි පාරිසරික නිවාඩු නිකේතනයකට තරුණයින් කණ්ඩායමක් පැමිණ සිටියහ. ඔවුන් කියන්නේ තමන්ගේ පුද්ගලික වාහනවලින් පැමිණි බවය. ඒ පසුගිය 12 වැනිදාය.
අලුත විවාහප්‍රාප්ත තරුණ යුවලක් ඒ අතර වූහ. හෝටලයේ සිටියේ මේ පිරිස පමණි.
13 දා රාත්‍රියේ කිරින්ද පොලිසියට දුරකථන ඇමතුමක් ලැබෙන්නේ ය. ඒ තරුණ සැමියාගෙනි. ඔහු මුලින්ම කියන්නේ සිය බිරියගේ මුද්ද නැතිවී ඇති බවය. එය ලක්ෂ 25ක් පමණ වටිනා එකක් බව පැවසෙන්නේය.
ඒ වනවිට පොලිසියේ පළාත් භාර ඉහලම පොලිස් නිලධාරීන් ද සිද්ධිය සම්බන්ධව දේශපාලන ප්‍රබලයෙක් මගින් දැනුම්වත් වී සිටියේය. සිය දියණිය මුහුණ දුන් තත්ත්වයක් සම්බන්ධව එම දේශපාලන ප්‍රබලයා පොලිසියට දැනුම් දී තිබිණි. ඒ නිසා කිරින්ද පොලිසිය වැරැද්දක් නොවන ආකාරයට සිය පරීක්ෂණ ආරම්භ කළේය.
මාධ්‍යයට මුලින්ම නිකුත් වන්නේ ඒ 13 දා රාත්‍රියේ සිදුවන ඒ සිද්ධියේ තොරතුරය. සියලුම මාධ්‍ය සිද්ධිය වාර්තා කරනු ලැබුවේ උක්ත තොරතුර පදනම් කරගනිමිනි.
14වනදා පාන්දර වනවිට පොලිසිය සැකකරු සොයා අත්අඩංගුවටත් ගත්තේය. වාර්තා වු තොරතුරට අනුව මුද්ද සඟවාගෙන ඇත්තේ පෙදරේරුවකි. එය එතනින් ඉවරය.
සංක්ෂිප්තය මෙසේය. නානකාමරයක උස් බිත්තිය මත අමතක වී ගිය මුද්දක් එම හෝටලයේ ඉදිකිරීම් කටයුත්තක් සඳහා පැමිණි පෙදරේරුවෙක් විසින් රැගෙන සඟවාගෙන ඇත.
එවැනි අමතකවීම් ස්වභාවිකය. එමෙන්ම මේ දුෂ්කර කාලයේ අමතක වී දමා ගිය වටිනා භාණ්ඩ සඟවාගෙන යෑම ද අරුමයක් නොවේ. මේ හාල් කිලෝ එකත් පරිප්පු කාලත් හොරකම් කිරීමට මිනිසුන් පෙළඹී සිටින කාලයකි.
මුද්දේ විටිනාකම ලක්ෂ විසිපහක් කීවත් විසි දෙකක් කීවත් එය වැදගත් ප්‍රවෘත්තියක් නොවේ. එය ඇමතිවරයෙකුට සම්බන්ධ පවුලේ අයෙකුගේ කීමත් අද දේශපාලකයන්ගේ හැටියට නොගිනිය හැකි දෙයකි.
එහෙත් එම සිද්ධිය වසන් කිරීමට උත්සාහ කිරීම කුහුල දනවන්නේය. මේ ටික ලියා තබන්නේ එබැවිනි.
අවසන් පැමිණිල්ල අනුව මුද්දේ හිමිකරු රාමනායක කංකානම්ලාගේ ජනික ධනංජය රාමානායකය. මුද්ද නැතිවීම සම්බන්ධව පැමිනිල්ල කරන්නේ ඔහුය. එම පැමිණිල්ල අනුව මුද්දේ වටිනාකම ලක්ෂ 22කි. පොලිිසිය ඉන් පසුව අපට කීවේ ව්‍යාපාරිකයෙකුගේ ලක්ෂ 22ක මුද්දක් නැති වී ඇතැයි වාර්තා වන බවය.
රාමනායක කංකානම්ලාගේ ජනික ධනංජය රාමානායක ව්‍යාපාරිකයෙක් බව කීවේය. එහෙත් ඔහුගේ ව්‍යාපාරික ක්ෂේත්‍රයේ භූමිකාව අපට පැහැදිලිව වාර්තා වන්නේ නැත.
ඔහුගේ තරුණ බිරිය ගැන වාර්තා වේ. ඇය ආකර්ෂා රණතුංග නැමැති අයෙකි.
මේ තිබෙන්නේ ව්‍යාපාරිකයාට අයත් බව කී ඒ නැතිවුන මුද්දය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
කෙසේ වෙතත් මාධ්‍ය අද වාර්තා කළේ මේ මුද්දේ සිද්ධියට ප්‍රසන්න රණතුංග ඇමති දියණිය කිසිසේත් සම්බන්ධ වන්නේ නැති බවය.