මැතිවරණ ප්රචාරක කටයුතුවල නියැලෙන දෙමළ නළු තලපති විජේගේ රැලියක් අතරතුර සෙනසුරාදා ඇති වූ තෙරපීමකින් අවම වශයෙන් පුද්ගලයින් 39 දෙනෙකු මිය ගොස් 50 කට වැඩි පිරිසක් තුවාල ලැබූ බව තමිල්නාඩු ප්රධාන අමාත්යවරයා උපුටා දක්වමින් රොයිටර් වාර්තා කරයි.
“මේ වන විට පිරිමින් 13 ක්, කාන්තාවන් 17 ක්, පිරිමි ළමයින් 4 ක් සහ ගැහැණු ළමයින් 5 ක් ඇතුළුව පුද්ගලයින් 39 දෙනෙකු මිය ගොස් සිටිති. පිරිමින් 26 ක් සහ කාන්තාවන් 25 ක් ඇතුළුව පුද්ගලයින් 51 දෙනෙකු දැඩි සත්කාර ඒකක තුළ ප්රතිකාර ලබති,” තමිල්නාඩු ප්රධාන අමාත්ය එම්.කේ. ස්ටාලින් ප්රකාශ කර ඇත.
විජේගේ පක්ෂයවන තමිලගා වෙට්රි කසාගම් විසින් පවත්වන ලද දේශපාලන රැලියක් අතරතුර සිද්ධිය මේ සිද්ධිය සිදු වූයේ තමිල්නාඩුවේ කරූර් දිස්ත්රික්කයෙය.
මීට පෙර, ප්රාන්ත නීති සම්පාදක සෙන්තිල් බාලාජි වාර්තාකරුවන්ට පැවසුවේ පුද්ගලයින් 58 දෙනෙකු රෝහල් ගත කර ඇති බවය.
මේ වනවිට තිරුචිරප්පල්ලි සහ සේලම් යන ආසන්න දිස්ත්රික්කවලින් අවම වශයෙන් වෛද්යවරුන් 44 දෙනෙකු කරූර් වෙත යවා ඇති බව මාධ්ය වාර්තා පවසයි.
ඉරිදා අලුයම පැවති මාධ්ය හමුවකදී තෙරපීමට හේතුව පිළිබඳව විමසූ විට, ස්ටාලින් පැවසුවේ සිද්ධිය විමර්ශනය කර රජයට වාර්තාවක් ඉදිරිපත් කිරීම සඳහා තමිල්නාඩුව විශ්රාමික විනිසුරු අරුණ ජගදීසන්ගේ ප්රධානත්වයෙන් යුත් කොමිසමක් පත් කර ඇති අතර, ඉන් පසුව වැඩිදුර ක්රියාමාර්ග ගනු ලබන බවයි.
සිද්ධියෙන් මියගිය වින්දිතයින්ගේ පවුල්වලට ඉන්දීය රුපියල් මිලියන 1 බැගින් ප්රදානය කරන බව මහ ඇමතිවරයා මීට පෙර නිවේදනය කළේය.
දැවැන්ත ජනකායක් ඇදී එති
දශක තුනක් තිස්සේ දෙමළ සිනමාවේ වඩාත්ම ජනප්රිය නළුවෙකු වන විජේ, 2024 දී තම දේශපාලන පක්ෂය වන තමිලගා වෙට්රි කසාගම් ආරම්භ කිරීමෙන් පසු ඔහු සිය ප්රසිද්ධ රැස්වීම් සඳහා විශාල ජනකායක් ආකර්ෂණය කර ගත්තේය. එය ප්රාන්ත පාලක පක්ෂය වන ඩීඑම්කේ සහ අගමැති නරේන්ද්ර මෝදිගේ භාරතීය ජනතා පක්ෂය යන දෙකම ඉලක්ක කර ගත් වර්ධනීය තත්ත්වයක් බව නිරීක්ෂණය වී තිබිණි. වර්ෂ 2026 මුල් භාගයේදී පැවැත්වීමට නියමිත ප්රාන්ත මැතිවරණයට පෙර තලපති විජේ මේ වනවිට සිය මැතිවරණ ප්රචාරක කටයුතුවල නිරතවෙමින් ඇත.
වීඩියෝවල දැක්වෙන්නේ විජේ සිටගෙන කතා කරන ආකාරය දැක්වෙන විශාල ප්රචාරක වාහනයක් වට කර ගත් දහස් ගණනක් ජනතාවය.
රැලිය අතරතුර, විජේ ක්ලාන්ත වූ ආධාරකරුවන්ට වාහනයේ ඉහළ සිට වතුර බෝතල් විසි කරන ආකාරය සහ පිරිස පාලනය කළ නොහැකි වූ විට පොලිසියේ උදව් ඉල්ලා සිටින ආකාරය දර්ශනවල දැක්වේ.
“මගේ හදවත බිඳී ඇත; මම දරාගත නොහැකි, විස්තර කළ නොහැකි වේදනාවකින් සහ ශෝකයකින් සිටිමි,” විජේ X හි ලිවීය.
“කරුර්හි ජීවිත අහිමි වූ මගේ ආදරණීය සහෝදර සහෝදරියන්ගේ පවුල්වලට මගේ ගැඹුරු ශෝකය ප්රකාශ කරමි. රෝහලේ ප්රතිකාර ලබන අයට ඉක්මන් සුවය ප්රාර්ථනා කරමි.”
“තමිල්නාඩුවේ කරූර් හි දේශපාලන රැලියක් අතරතුර සිදු වූ අවාසනාවන්ත සිදුවීම අතිශයින් කණගාටුදායකයි,” අගමැති නරේන්ද්ර මෝදි X හි සටහනක සඳහන් කළේය.
විජයගේ රැලිවලට ආරක්ෂක ගැටලු ඇති වූ පළමු අවස්ථාව මෙය නොවේ. පසුගිය වසරේ ඔක්තෝම්බර් මාසයේදී ඔහුගේ දේශපාලන පක්ෂය දියත් කළ පළමු රැස්වීමෙන් පසුව අවම වශයෙන් මරණ හයක් මාධ්ය විසින් වාර්තා කරන ලදී.
එබැවින්ම තලපති විජේ ගේ දේශපාලන රැස්වීම් සඳහා පොලිසිය විසින් පනවන ලද සීමාවන් තිබියදීත් නැවත නැවතත් අති විශාල ජනතාවක් සහභාගී වීම හේතුවෙන් ඒ සීමාවන් ඛණ්ඩනය වීම නිරීක්ෂණය වී ඇති බව විදෙස් මාධ්ය වාර්තා කරයි.
