උපේක්ෂා උඩුවැරැල්ල –
ඩොනල්ඩ් ට්රම්ප් විසින් ප්රකාශිත සටන් විරාමයට එකඟ වීම ඉරානය විසින් ප්රතික්ෂේප කර තිබේ. එය ප්රතික්ෂේප වන්නේ ඊශ්රයාලය වෙත එල්ල කළ ප්රහාර රැළි මගිනි.
ඉරානය සහ ඊශ්රායලය අතර පූර්ණ සටන් විරාමයක් සඳහා එකඟ වී ඇති බව අමෙරිකානු ජනාධිපති ඩොනල්ඩ් ට්රම්ප් ඊයේ (23) රෑ මැදියමේ ප්රකාශ කරන්නේ එක්වරමය. ඒ සිය සමාජ මාධ්ය ඔස්සේ සටහනක් තබමිනි.
අමෙරිකානු ජනාධිපතිවරයා සඳහන් කළේ ඔහු ප්රකාශය කළ මොහොතේ සිට ඉදිරි පැය 6ක කාලය තුළ එම සටන් විරාමය ආරම්භ වනු ඇති බවය. ඊශ්රායලය සහ ඉරානය සාමය සඳහා “එකවරම පාහේ” තමා වෙත පැමිණි බවත්, “ධර්මිෂ්ඨකම සහ සත්යය” යන මාර්ගයෙන් ඉවත් වුවහොත් දෙරටටම අහිමි වීමට බොහෝ දේ ඇති බවත් ට්රම්ප් කීවේය.
ඔහු කීවේ මුලින් ඉරානය සටන් නවත්වන බවය. පසුව ඒ අනුව යමින් ඊශ්රයාලය ද සටන් විරාමය පිළිපදිනු ඇතැයි ඇමරිකාව කීවේය.
මේ කතාව කියා පැය කීපයක් යන්නට පෙර ඉරානය අද (24) අලුයම මිසයිල රැල්ලක් ඊශ්රයාලය වෙත යොමු කළේය ඉරානය එල්ල කළ ප්රහාරයෙන් පුද්ගලයින් තිදෙනෙකු මිය ගිය බව ඊශ්රායල හමුදාව පැවසීය.
දකුණු ඊශ්රායලයේ ටෙල් අවිව් සහ බියර්ෂෙබා අසල පිපිරීම් ඇසුණු බව විදෙස් මාධ්ය වාර්තා කර තිබිණි. ඉරානය විසින් මිසයිල රැළි හයක් දියත් කළ බව ඊශ්රායල හමුදාව පැවසූ අතර ඊශ්රායලයේ ජාතික ගිලන් රථ සේවාව පැවසුවේ බියර්ෂෙබා හි පුද්ගලයින් තිදෙනෙකු මිය ගිය බවය. එල්ල කළ ප්රහාරයකදී ඊශ්රායල හමුදා ඉහළම න්යෂ්ටික විද්යාඥ සෙඩිගි සාබර් ඝාතනය කළ බව ඉරානයේ ප්රෙස් ටීවී කීවේය.
ඊශ්රායලය සහ ඉරානය අතර සටන් විරාම ගිවිසුමක් පිළිබඳ ට්රම්ප්ගේ නිවේදනය පිළිබඳව ඊශ්රායල අගමැති අදහස් දැක්වූයේ නැත.
ජෙරුසලම් පෝස්ට් පුවත්පතට අනුව, නෙතන්යාහු අද (24) අලුයම දක්වා සිටියේ ආරක්ෂක කැබිනට් රැස්වීමකය. . සටන් විරාමය පිළිබඳව ප්රසිද්ධ ප්රකාශ නිකුත් කිරීමෙන් වළකින ලෙසද ඔහු අමාත්යවරුන්ගෙන් ඉල්ලා සිටි බව එහි වාර්තා විය.
මේ අතර ඉරානය කිසිදු බැඳීමක් සහිත සටන් විරාමයක් ප්රතික්ෂේප කළේය. විදේශ අමාත්ය අබ්බාස් අරග්චි අවධාරණය කළේ සටන් විරාමයක් අවශ්ය නම් මුලින්ම ප්රහාර දීම නවත්වා සටනින් ඉවත් විය යුත්තේ ඊශ්රයාලය බවය. එසේ නොමැති නම් ඊශ්රායල ප්රහාර හමුවේ සිය හමුදා මෙහෙයුම් අවසන් මිනිත්තුව දක්වා සිදුකරන බව ද ඉරාන විදේශ අමාත්යවරයා වැඩිදුරටත් සඳහන් කර ඇත.
එමෙන්ම සියලු ඉරාන වැසියන් සමග එක්ව රට ආරක්ෂා කිරීමට අවසන් ලේ බිංදුව දක්වා සටන් කිරීමට සුදානමින් සිටින, සතුරාගේ ඕනෑම ප්රහාරයකට ප්රතිචාර දැක්වීමට නිර්භීතව ඉදිරිපත්ව සිටින සන්නද්ධ හමුදාවන්ට තම ස්තූතිය පිරිනමන බව ද විදේශ අමාත්ය අබ්බාස් අරග්චි වැඩිදුරටත් සිය Xගිණුමේ සටහන් තබා තිබේ.
ඉරානයේ උත්තරීතර නායක කමේනි අවධාරනය කළේ ඉරානය පීඩනයට යටත් නොවන බවය.
