සදෙව් රත්නායක
- මුරලිට රඟපෑවොත් සේතුපතිගේ දුව දූෂණය කරන බව කියා තර්නය කළේ ලංකාවෙ ඉඳන්
- සයිබර් අපරාධ යටතේ විශේෂ විමර්ශයනයක් කරන්න චෙන්නයි පොලිසිය ලංකාවෙන් ආධාර ඉල්ලලා…
- ජනතා උසි ගැන්වීම පසුපස සේතුපතිව අභියෝගයක් වූ තමිල්නාඩු නළු නිළියොත් ඉන්නවා…
- කොටි හිතවාදී දේශපාලකයො මුල ඉඳන් මුරලිට එරෙහි විරෝධයක…
- මම හින්දා වෘත්තීය ජීවිතේ විනාශ කරගන්න එපා… මුරලි විජේ සේතුතිට කියපු නිසා ඔහු ඉවත් වෙලා…
දෙමළ සිනමාවට නැඟෙන මුරලිදරන්ගේ ජීවිත කතාවේ රඟපෑමෙන් විජේ සේතුපති ඉවත්වූවත් මතුවූ උණුසුම තමිල්නාඩුවේ තවම පහවී ගොස් නැත. මේ විශිෂ්ට චරිතාංග නළුවා චිත්‍රපටයෙන් ඉවත්වූත් එහි වැඩ කටයුතු නතර කිරීමට නිෂ්පාදකයන් තීරණය කර නොමැති හෙයින් ගිනි යට අළු පුපුරු සැඟවී ඇති සේ එය නැවත නැවතත් ඇවිලෙනු ඇත. තමිල්නාඩුවේ දේශපාලන ස්වභාවය එවැන්නකි.
චෙන්නායි බෑණාට ඥාතීන්ගේ විරෝධය
ලොවම ආදරය කරන, ජාත්‍යන්තර කීර්තියට පත් මුත්තයියා මුරලිදරන්ට විරුද්ධත්වය ප්‍රකාශ කරනුයේ තමිල්නාඩුවේ වෙසෙන ඔහුගේම ඥාතීන්ය. ප්‍රමාණයෙන් කෝටි සංඛ්‍යාත වූවද ඒ සියළුදෙනාම මුරලිගේ ඥාතින් වන්නේ ඔහු චෙන්නායි නුවරින් විවාහයක් සිදු කරගැනීම නිසා නොව ඔහුගේ සීයා තමිල්නාඩු ජාතිකයකු වීම නිසාය. තේවතුවල රැකියාව කිරිමට දකුණු ඉන්දීය දෙමළ ජාතිකයන් සමග 1920දී මහනුවරට පැමිණි මුරලිගේ සීයා පෙරියසාමි සින්නසාමි පසුකලෙක තම නිජබිම වූ තිරුච්චිවල අවසන් කාලය ගත කිරීමට නැවත තමිල්නාඩුවට ගියත් ගමනට එක්වූයේ ඔහුගේ දියණියන් පමණි. මුරලිගේ පියා මුත්තයියා සින්නසාමි ඇතුළු පෙරියසාමිගේ පුතුන් කන්ද උඩරටම පදිංචි වීමෙන් මුත්තයියා මුරලිදරන් නමැති ලෝක ප්‍රකට ශ්‍රී ලාංකිකයා බිහි වීය.
අනිත් අතට මුරලි ද්විත්ව පුරවැසියෙකි. ඔහුට ඉන්දියාවට යෑමට වීසා අවශ්‍ය නැත. ඔහු ශ්‍රී ලංකාවේ මෙන්ම ඉන්දියාවේද පුරවැසිභාවය හිමිය. ඔහුට ඉන්දියාවේ විදෙස් පුරවැසිභාවය (Overseas Citizenship of India – OCI) හිමිවූයේ සීයාගේ ඉන්දීය සම්භවය නිසාවෙනි. ඒ අතින් බැලූ විට තමිල්නාඩුවේ ජනතාව එරෙහිව යන්නේ ඔවුන්ගේම පුරවැසියකුටය. මුලදි කවුරුත් කටපුරා ආඩම්බරයෙන් ‘චෙන්නායි බෑණා‘ යැයි කී මුරලිට එරෙහිවය.
තමිල්නාඩු වැසියන් උසිගැන්වූ හැටි
තමිල්නාඩුවේ ජනතාව මුරලිට එරෙහිව උද්ඝෝෂණය කරනුයේ ඔහු ශ්‍රී ලාංකිකයකු වීම නිසාම නොව පසුගිය වසරේ මෙරට ජනාධිපතිවරණයේදී ජනපති ගෝඨාභය රාජපක්ෂට සහාය පළ කරමින් සිටියදී කරනු ලැබු එක්තරා ප්‍රකාශයකට වැරදි අර්ථකතනයක් ලැබීම නිසාය. එය ඉස්මතු කොට පෙන්වීමෙන් මුරලිගේ තමිල්නාඩු ගරුත්වය විනාශ කරනු ලැබුවේද තමිල්නාඩුවේ කොටි හිතවාදී දේශපාලකයන් විසිනි. විරෝධතා රැල්ල නිර්මාණය කළේ ඔවුහුය.
ඊට දෙමළ සිනමාවේ බොහෝ නළු නිළියන් ද උඩගෙඩි දුන් අතර, ඉන් වැඩි පිරිසක් සේතුපතිගේ රංගනයේ අභියෝගයට හසුවී පසුබෑමට ලක්වූ නළුවෝ වෙති. කුහකත්වය එතැනින්ම පැහැදිලිය. ශ්‍රී ලංකාවේ මෙන්ම තමිල්නාඩු සිනමාවේදී ද එලෙසය. එකාට එකා නැත.
සේතුපතිට මුරලි දුන් අවවාදය
සැබැවින්ම මුරලිගේ භූමිකාව රඟ දැක්වීමට ලැබීමෙන් සේතුපති පසූවූයේ නොමඳ ආශ්වාදයකිනි. චරිතයට අන්තිම සාධාරණය ඉෂ්ට කිරීමටත් ඔහු සැදෑ පැහැදී සිටියේය. ඔහුම කියන පරිදි ක්‍රිකට් ක්‍රීඩාව ඔහුට පෙන්නන්නට බැරි ක්‍රීඩාවකි. කුඩා වියේ වුවද ඔහු ක්‍රිකට් තරග නැරඹුවේ නැත.
‘මේ කතාව මම මුරලි සර්ට කිව්වා. ඒත් මුරලි සර් එකපාරටම කිව්වේ ඒක තමයි මගේ චරිතය රඟපාන්න ඔයාට තියෙන ලොකුම සුදුසුකම කියලා.‘ 800 සිනමා නිර්මාණයට ගිවිසුම් අත්සන් කිරිමේ අවස්ථාවේදී සේතුපති කීවේ මුරලි පිළිබඳ උපන් අසීමිත ගෞරවයෙනි.
අපිට ඇත්තටම පෙනෙන්නේ පන්දුව මුරලිගේ අතින් දඟ කැවී ගිලිහෙන හැටි විතරයි. ඒත් ඒක සිද්ධ වෙන්නේ ඔහුගේ ආත්මය තුලින්. හැමෝම මුරලි ගැන දන්නේ පන්දු යවන්නෙක් විදිහට විතරයි. මට අවශ්‍ය කරන්නේ මේ ශ්‍රේෂ්ඨ ක්‍රීඩකයා තුළ සිටින පුද්ගලයාගේ චරිතය නිරූපනය කිරීමයි.‘
නමුත් මුරලිගේ භූමිකාවට පණ පෙවීමට සිහින මැවූ විජේ සේතුපතිට අවසානයේදී ඉන් ඉවත්වීමට සිදුවිය. තමිල්නාඩුව පුරා පැතිර ගිය මුරලි – සේතුපති විරෝධය ඊට ප්‍රබලතම සාධකය වූවත් දෙලොවක් අතර සිටි සේතුපති ඉන් ඉවත්වූයේ මුරලිගෙන් උපදෙස් ලැබීමෙන් පසුවය.
‘ඉහළ තලයේ මෙවැනි නළුවකුගේ ජීවිතය මම නිසා අවදානමකට වැටෙනවාට මම කැමැති නෑ. ඒ නිසා මේ චිත්‍රපටයෙන් ඉවත් වන්නැයි මම ඉල්ලා සිටිනවා. නළුවකු ලෙස බොහෝ දුරට යාමට සිටින විජේ සේතුපතිට මෙවැනි බාධක හෝ ගැටලු නොතිබිය යුතුයි.‘ මුරලිදරන් දෙමළ බසින් යොමු කරනු ලැබූ එම ලිපිය සේතුපතිගේ ‘ට්විටර්‘ ගිණුමේ ද පළ විය.
චිත්‍රපටයේ සැලසුම
‘ද ලන්ච් බොක්ස්‘ වැනි විශිෂ්ට නිර්මාණ තිරයට ගෙනා ඩාර් මෝෂන් පික්චර්ස් නිෂ්පාදක සමාගම සමග මූවි ට්‍රේන් මෝෂන් පික්චර්ස් සමාගම එක්ව 800ට මුදල් ආයෝජනය කරන අතර, මූවි ට්‍රේන් නිෂ්පාදන සමාගම මැතකදී ආරම්භ කරනු ලැබුවේ මුරලිදරන්ගේ සහාය ඇතිවය. සන් ටීවී සමාගමේ හා ඔවුන්ගේ අනුග්‍රාහකත්වය ලබන අයිපීඑල් කණ්ඩායමක් වන සන්රයිසස් හයිද්‍රබාද් කණ්ඩායමේ ප්‍රධාන විධායක නිලධාරී කේ. ෂන්මුගම් මූවි ට්‍රේන් නිෂ්පාදන සමාගම ප්‍රධානියා ද වේ.
මුරලිගේ සමීපතම හිතවතකු වන ‘කනිමෝසි‘ චිත්‍රපටයෙන් ජනප්‍රියත්වයට පත් එම්.එස්. ශ්‍රීපති මෙම චිත්‍රපටයේ අධ්‍යක්ෂකවරයා වන අතර තිර රචනයටද ඔහුගේ දායකත්වය ලැබී තිබේ. වඩාත් කැපී පෙනෙන සිදුවීම වන්නේ තමිල්නාඩුව කෝප ගැන්වූ 800 නිර්මාණයේ තිර රචනය ශ්‍රී ලාංකිකයකුගේ වීමය. ඔහු මෙරට ඉංග්‍රීසි සාහිත්‍යධරයකු වන ශෙහාන් කරුණාතිලකය. 2016 දී පොදු රාජ්‍ය මණ්ඩලයීය සාහිත්‍ය සම්මානය හිමිවූයේ ඔහු විසින් රචිත Chinaman: The Legend of Pradeep Mathew කෘතියටය.
කවුද මේ විජේ සේතුපති
මෑත කාලයේ දෙමළ සිනමාවේ වඩාත්ම සාර්ථක නළුවා බවට අවිවාදිත විජේ සේතුපති මුරලිගේ භූමිකාව රඟ දැක්වීමට එක්වූවා නම් එම චිත්‍රපටයේ සාර්ථකත්වය වඩාත් තීව්‍ර වනු ඇතැයි මැදහත් විචාරකයන්ගේ අදහස විය. කලක් ගිණුම් ලිපිකරුවකු ලෙස ඩුබායි නුවර රැකියාවේ නිරතව සිටි සේතුපති නැවත තමිල්නාඩුවට පැමිණියේ කළකිරීමට පත්වීමෙනි.
ඔහු නළුවකු වන්නේ අහම්බයෙනි. මුලදී සුළු චරිත රඟපෑ ඔහුට ප්‍රධාන චරිතයකට අවස්ථාවක ලැබුණේ 2010දීය. ගතවූ දශකයේදී ඔහු දෙමළ සිනමාවේ ආධිපත්‍යය පතුරුවාලමින් විශිෂ්ට චරිතාංග නළුවකු ලෙස පෙරමුණට පැමිණ සිටී. මේ වසරේ පැවැති ෆිල්ම්ෆෙයාර් සම්මාන උළෙලේ හොඳම දෙමළ නළුවා ලෙස ඔහු සම්මානයට පාත්‍ර වූයේ ‘96‘ චිත්‍රපටයේ රඟපෑමෙනි. ඊට පෙර 2018දීත් ඔහු ෆිල්ම්ෆෙයාර් සම්මානයෙන් පිදුම් ලැබීය. එවර එම සම්මානය ඔහුට හිමිවූයේ මෑත ඉතිහාසයේ පාතල ලෝකය කේන්ද්‍ර කරගත් විශිෂ්ටතම දෙමළ සිනමා නිර්මාණය ලෙස සැළකෙන ‘වික්‍රම් වේදා‘ චිත්‍රපටයේ වේදා නමැති පාතාල නායකයාගේ භූමිකාව රඟපෑමෙනි. ඉන්දීය රුපියල් මිලියන 110ක් වැය කරමින් 2017දී නිර්මාණය වූ මේ චිත්‍රපටයේ ආදායම මිලියන 600 ද ඉක්මවා ගියේය.
ශ්‍රී ලංකාවට ජාත්‍යන්තර කීර්තියක් ගෙන දුන් මුරලිදරන්ගේ ජීවිත කතාව සිනමාවට නැඟීමේ වගකීම හා යුතුකම ඇත්තේ ශ්‍රී ලාංකිකයන් අතය. වානිජ පරමාර්ථය මත තමිල්නාඩු සිනමාවේ එය නිර්මාණය වීමේ පසුබිම සකස් වූවත් සැබැවින්ම මුරලි අයිති ශ්‍රී ලංකාවටය. නමුත් එවැන්නකට ශ්‍රී ලාංකේය සිනමාකරුවන්ගේ අවධානය යොමුනොවීම ගැටලු සහගතය.
දුව දූෂණය කරන බවට ලංකාවෙන් තර්ජන
මුරලිගේ චිත්‍රපටයේ රඟපෑමෙන් ඉවත්වෙන ලෙස සමාජ වෙබ් අඩවි මගින් විජේ සේතුපතිට විරෝධය පා තර්ජනය කළ පුද්ගලයන් අතර එම චිත්‍රපටයේ රඟපෑමෙන් ඉවත් නොවන්නේ නම් දියණිය දූෂණය කරන බවට සේතුපතිට තර්ජනය කරමින් යොමු කළ සටහනක් ද තිබිණි.
ඒ සම්බන්ධව මේ වනවිට චෙන්නායි පොලිස් විමර්ශන ආරම්භ වී තිබේ. කනගාටුවට කරුණ නම් එම තර්ජනය සිදුවී ඇත්තේ ශ්‍රී ලංකාවේ අයි.පී. ලිපිනයකින් වීමය. එය (IP address) මෙරට එක්තරා නගරයක් කේන්ද්‍ර කරගත් අන්තර්ජාල ලිපිනයක් බව සොයා ගෙන තිබීමය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
එය පසුගිය 20 වැනිදා රාත්‍රී 11.30 දක්වා සක්‍රීයව පැවැති අයි.පී.ලිපිනයකි. සයිබර් අපරාධ ගනයට වැටෙන මෙම සිදුවීමට අදාළ පුද්ගලයා මෙරට රජයේ ද සහාය ඇතිව සොයා ගැනීමට චෙන්නායි පොලිස් නිලධාරීන් බලාපොරොත්තු වෙයි.