දිනේෂ් විතාන –
ඇය යොහානි සිල්වා. මේ යුවතිය සම්බන්ධව අද කුහක කමක් නැති සියලුම ලාංකිකයන් කතා කරන්නෙ ආඩම්බරයෙන්. ඇය අසල්වැසි ඉන්දියාව කුල්මත් කළ අපේ යොවුන් ගායිකාව. ඇයගේ මැණිකේ මගේ හිතේ ගීතය විවිධ වර්ණයන්ගෙන් දැන් අන්තර්ජාලයේ රැළි පිට රැළි නගනවා. අමිතබ්භච්චන් ඇයගේ ගීතය මෝහනය වුනු රසිකයෙක්.
කොළඹ විශාඛා විද්‍යාලයීය ආදිශිෂ්‍යාවක් මෙන්ම එංගලන්තයේ සහ ඔස්ට්‍රේලියාවේ දි කළමනාකරණය පිළිබඳ උපාධියක් හා පශ්චාත් උපාධියක් සහිතව සිවිඥානිකව සංගීත ක්ෂේත්‍රයට පිළිපන් ඇය අප කවුරුත් එක හෙළා ගරු කරන ගෞරවනීය හමුදා නායකයෙක් වූ මේජර් ජනරාල් ප්‍රසන්න සිල්වාගේ දියණිය.
ඉන්දියාවේ රැළි සරැළි නන්වන කෝටි හතරක් බැලූ මැණිකේ ගීතය සම්බන්ධව යොහානි දිවයින මීවිත සමග කළ පිළිසඳරක සංක්ෂිප්ත සංස්කරණයක් ලංකාසර වෙනුවෙන් අප උපුටා ගත්තා.
ගීතය අහලම සංවාදයට යමු….
“මැණිකේ මගේ හිතේ “ ගීත හැදුනෙ කොහොම ද ?. අපි යොහානිගෙන් මුලින්ම ඇහුවෙ එහෙම.
මේ ගීතය අහපු සැනින්ම මම කැමති වුනු ගීතයක්. චමත් සංගීත්ගේ තනු කොහොමත් හිතට දැනෙන ඒවා. ඔහු මම සංගීත ගමන පටන් ගත් මුල් කාලයේ ඉඳන් මට උදව් කරල තියෙන කෙනෙක් සහ හොඳ මිත්‍රයෙක්.
මම දවසක් මෙම ගීතයේ කොටසක් TikTok එකේ ගායනා කළා. චමත් ඒක දැකල මට කිව්වා ස්ටුඩියෝ එකට ඇවිත් මේකේ Official Cover එක කරමු කියල.
ඉතින් මං ගියා. එතනට සතීශාන්නුත් වීඩියෝ කිරීමට පිරසකුත් ඇවිත් හිටියා. චමත් කිව්වා වැඩිය හිතන්න දෙයක් නෑ , සින්දුව කියන්න… ඒ ගමන් අපි වීඩියෝ කරන්නම් කියල. ඔන්න ඔහොම අහම්බෙන් තමයි අපි මේ නිර්මාණය කළේ.
ඒත් මේ වෙනකොට මේ ගීතය හිතාගන්න බැරි තරමට ජනප්‍රිය වෙලා. ඇය ඒ ගැන කියන්නෙ මේ විදිහට.
ඔව්, ඇත්තටම මේ ගීතයට නොහිතපු ආකාරයෙන් ප්රතිචාර ලැබෙනවා. ඉතින් සංගීත නිර්මාතෘ චමත්ටත් , මුල් ගායනය සහ මගෙත් එක්ක රැප් එක ගයනා කල සතීෂාන්ටත්, පද රචනා කළ දුලාන්ටත්, සින්දුව නැවත නිර්මාණය කිරීමට සහ බෙදා හරින්න අවසරය දුන් හසිත්ටත්, මගේ පිටිපසින් සෑම මොහොතේම ඉන්න දිලංජන් ඇතුළු පෙටා ඉෆෙක්ට් (Pettah Effect) කණ්ඩායමටත් මෙහි ගෞරවය හිමි වෙන්න ඕනේ. මෙහි මුල් ගායනය කළේ සතීශාන්, දුලාන් සහ ARX. නිර්මාතෘ චමත් සංගීත්.
මේ වනවිට මේ ගීතය යූ ටියුබ් වීව්ස් කෝටි හතරක් පැනලා. අප ඇයට කිව්වම ඇය උත්තර දුන්නෙ කලබලයකින් තොරව.
ඇත්තටම විවුස් ගැන නම් මම එච්චර හිතන්නේ නෑ. මම හැමතිස්සෙම උත්සාහ කරන්නේ අලුත් දෙයක් ඉගෙන ගන්න සහ හොඳ නිර්මාණයක් කරන්න. එහෙම කරන සමහර නිර්මාණ රස විඳින්නේ ටික දෙනෙක් වුනත් ගැටලුවක් නැති නිසා විවුස් ගැන නම් මම එච්චර හිතන්නේ නෑ.
දැන් අමිතාබ්භච්ඡන් පවා ට්විටර් ගිනුමේ මේ ගීතටය සුබ පැතුම් පණිවිඩයක් එවලා තිබුණා නේද?. කොහොමද අමිතාභ් ඔබේ රසිකයෙක් වීම දැනෙන්නේ…
ඒක නම් මගේ සංගීත දිවියේ විතරක් නෙමෙයි. මගේ ජීවිතයෙම විශේෂ සංධිස්ථානයක් කියල හිතනවා. ඔහු වැනි විශ්ව කීර්තිමත් රංගන ශිල්පයෙක් රසවිඳින බව දැන ගන්න ලැබුණු එකම විශ්වාස කළ නොහැකි මහා විශාල දෙයක්.
එම ආරංචිය දැනගත්තු ගමන් මොකද ඔබට හිතුණෙ.
මම සාමාන්‍යයෙන් දුරකථනය ලඟින් තියාගන්නේ නෑ. ගොඩක් වෙලාවට ඉන්නේ ස්ටුඩියෝ එකේ. පෙටා ඉෆෙක්ට් (Pettah Effect) කණ්ඩායමෙන් තමයි කතා කරලා කිව්වේ මෙහෙම දෙයක් වෙලා කියලා. මම හිතුවෙ විහිලුවට කියනවා කියලා. ඉතින් මම පණිවිඩය දැක්කේ ටිකක් පරක්කු වෙලා. එතකොට ගොඩ දෙනෙක් කතා කරලා සුබ පතල එහෙම තිබුණා. ඒ මොහොතේ හිතුන දේවල් විස්තර කරන්න නම් මට තේරෙන්නේ නෑ
මේ ගීතය රූප රචනය ගැනත් කතා කරමු ද?
Pasindu Kaushalya පසිඳු කෞශල්‍ය තමයි වීඩියෝ එක කලේ. මේක දවසකින් වගේ කරලා අවසන් කරපු වැඩක්. . ඔහූ ඉතා දක්ෂයෙක්.
තාත්තා මේ ගීතය ගැන මොනවද කිව්වෙ.
නැරඹුවා. කීප වතාවක්ම. ඔහු එහෙම ප්රතිචාර දක්වන හෝ කතා බහ කරන කෙනෙක් නෙමේයි. නමුත් මම දන්නවා ඔහු මේ ගැන ආඩම්බර වෙන බව නම් දන්නවා. තාත්තා හැම තිස්සෙම හැම වැඩකටම දිරි ගන්වනවා. තාත්තගේ රිං ටෝන් එකත් මගේ සින්දුවක්.
අලුත් වැඩකට ඔබ ලෑස්ති වෙනව ද?.
ඔව්. සැප්තැම්බර් 17 මගේ අලුත් නිර්මාණයක් එලි දැක්වෙනවා. ඒක අපි සෑහෙන මහන්සි වුනු වැඩක්. මගෙ ගීත 12 මේ වනවිට අවසන් කරලා තියෙන්නේ. ලබන අවුරුද්දේ covid තත්වේ ඉවර වුනු ගමන් සජීවී ප්‍රසංගයක් සමග එළි දක්වන්න සැලසුම් කරලා තියෙන්නේ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
( ඉරිදා දිවයින මීවිත අතිරේකයෙන් උපුටාගෙන සංස්කරණය කර පළ කෙරනි)