ආණ්ඩු ක්රම ව්යවස්ථාවේ 21 වැනි සංශෝධනයට විරුද්ධව ආණ්ඩුව තුළ කණ්ඩායමක් කඳවුරු බඳිමින් සිටින බවත් 21 කඩාකප්පල් කරදමා රට ඒකාධිපති ගමනකට තල්ලු කර විදේශි පුරවැසියන්ට මෙරට තනතුරු ලබා දෙන්නට යම් අයෙක් කටයුතු කරනවා නම් එවැනි මහජන නියෝජිතයින්ට එරෙහිව නැගී සිටින ලෙස තමා රටේ ජනතාවගෙන් ඉල්ලා සිටින බවත් ශ්රී ලංකා නිදහස් පක්ෂ මහලේකම් දයාසිරි ජයසේකර පවසයි.
මහලේකම්වරයා මේ බව පැවසුවේ අද (31) කොළඹ දී පැවති විශේෂ මාධ්ය සාකච්ඡාවකට එක් වෙමිනි. එහිදී තවදුරටත් අදහස් දැක්වූ දයාසිරි ජයසේකර මෙසේ ද කීවේය.
“පසුගිය කාලය පුරා ඉන්ධන විදුලිය ඖෂධ ආදී අත්යාවශ්ය භාණ්ඩ හිඟය නිසාත් මිල ඉහළ යෑම නිසාත් විශාල අර්බුදයක් රට තුළ නිර්මාණය වුනා. අවිහිංසාවාදී උද්ඝෝෂණ ව්යාප්ත වුනා. එම උද්ඝෝෂණ දින පනස් ගණනක දැවැන්ත අරගලයක් බවට පත්ව ජනවතාව වීදී බසින තැනට පත් වුනා.
අරගලයේ නියුතු වූවන්ගේ ප්රධානතම අරමුණ වුනේ රට ප්රජාතන්ත්රීකරණය කිරීමයි. එහිදී ඔවුන් කල්පනා කළේ ඇතිවී තිබෙන තත්ත්වට රාජපක්ෂ පවුල වගකිව යුතු බවයි. ඒ නිසා රාජපක්ෂ පවුල් පාලනයෙන් රට බේරා ගත යුතුය යන සටන් පාඨය ඉදිරියට ආවා.
එහි ප්රතිඵලයක් ලෙස රාජපක්ෂවරු රාජ්ය පාලනයේ කිසිදු තනතුරක් නොදැරිය යුතුය යන විරෝධය ඇති වුනා.
පසුගිය කාලය පුරා මතුවූ ආර්ථික හා සමාජ ප්රශ්න අදවනවිට දේශපාලන අරගලයක් වෙලා. ඒ නිසා තමයි ජනාධිපතිවරයාට සිදුවුනේ අගමැතිවරයාට තනතුරින් ඉල්ලා අස්වන ලෙස දැනුම් දීමට.
පසුව එය මහා ඛේදවචාකයකින් අවසන් වුනා.
මේ තත්ත්වයෙන් පසු සර්ව පාක්ෂික ආණ්ඩුවක් ගැන අපි කතා කළා. ශ්රී ලංකා නිදහස් පක්ෂය මූලික වශයෙන් කරුණු 14කින් සමන්විත ලිපියක් ජනපතිට භාර දුන්නා. ඉන් පසු සර්ව පාක්ෂික සමුළුවක් කැඳවන්න කටයුතු යොදනවා කිව්වා. ඒ අනුව කටයුතු කරන ලද සමුළුවට අපි කරුණු 22ක ලියැවිල්ලක් ඉදිරිපත් කළා.
අපේ ඉල්ලීම්වලට සුබවාදී ප්රතිචාර නොමැති නිසා පක්ෂ 11ක් අපි ඒකාබද්ධව මහින්ද රාජපක්ෂ ප්රමුඛ ආණ්ඩුව ඉවත් විය යුතු බවටත් ඉන් පසුව සියලු පක්ෂවලින් සමන්විත සර්ව පාක්ෂික ආණ්ඩුවක් පිහිටුවිය යුතු බවටත් යෝජනා කළා.
ඒ අනුව සර්ව පාක්ෂික ආණ්ඩුවට එකතුවන පක්ෂ නායකයින්ගේ එකමුතුවෙන් අග්රාමාත්යවරයෙක් කැබිනට් මණ්ඩලයක් අමාත්යාංශ ලේකම්වරුන්ගෙන් සමන්විත ජාතික සභාවක් පිහිටුවන්න කටයුතු කළ යුතුය යන්න අපේ ඉල්ලීම වුනා.
තවමත් ඒ ඉල්ලීම එලෙසම තිබෙනවා. මොකද මේ තිබෙන ආණ්ඩුව සර්ව පාක්ෂික ආණ්ඩුවක් නොවෙයි. වෑල්ඩින් කළ ආණ්ඩුවක්. එක එක පක්ෂවලින් කෑලි කඩාගෙන අලවාගෙන තියනවා
සර්ව පාක්ෂික ආණ්ඩුවක් පිහිටුවනවා නම් ශ්රීලංකා නිදහස් පක්ෂය ලෙස ඇමති තනතුරු භාර ගන්නත් එසේ නොවනවා නම් විපක්ෂයේ සිට සහාය වන්නත් අපි තීරණය කළා.
තවමත් ශ්රී ලංකා නිදහස් පක්ෂ ස්ථාවරය එයයි.
මෙම ක්රියාවලියේ එක් පියවරක් ලෙස ආණ්ඩුක්රම ව්යවස්තාවේ 21වැනි සංශෝධනය ගෙනත් තියනවා. මේ සම්බන්ධව රටේ විවිධ පාර්ශව සමග අප සාකච්ඡා කළා. ඒ අනුව 20වැනි සංශෝධනයේ නොතිබුනු ව්යවස්ථාදායක සභාව 21ට ඇතුළත් කළා.
රටේ වැදගත් තනතුරු සියල්ල මේ ව්යවස්ථා දායක සභාවෙන් පත් කරනවා. මීට සමගාමීව තවත් කොමිෂන් සභා ගණනාවක් පත්වෙනවා. ඒ අනුව රජයේ වංචා දූෂණ අවම කිරීම සඳහාවන විගණන කොමිසම, ප්රසම්පාදන කොමිසම, භෞතික සැලසුම් දෙපාර්තමේන්තුව ස්ථාපිත කිරීම වැනි වැදගත් කාරණා රැසක් තියනවා.
සමගි ජනබලවේගයෙන් ඉදිරිපත් කළ විධායක ජනාධිපතික්රමය අහෝසි කළ යුතුයි යන යෝජනාව 21 වැනි සංශෝධනයට ඉදිරිපත් කර තිබෙනවා
නමුත් මා ඉල්ලා සිටින්නේ මේ අවස්ථාවේ දී මේ දෙක පටලවා ගත යුතු නැති බවයි. අද අප කළ යුත්තේ 19 වැනි සංශෝධනයේ කරුණු මුලින්ම 21 වැනි සංශෝධනය හරහා ගෙනැවිත් විධායක ජනාධිපති ක්රමය අහෝසි කිරීම දෙවැනි පියවර ලෙස ගෙනා යුතු බවයි.
21ට එරෙහිව ආණ්ඩුව තුළ යම් පිරිසක් කඳවුරු බඳිමින් සිටිනවා. මේ තත්ත්වය මත රටේ ජනතාවගෙන් අප ඉල්ලා සිටින්නේ ඔබේ ඡන්දයෙන් පත් කර පාර්ලිමේන්තුවට එවන ලද මන්ත්රීවරයා සමග සාකච්ඡා කරන ලෙසයි.
යම් කෙනෙක් 21ට පක්ෂව ඡන්දය නොදී මෙය කඩාකප්පල් කරලා නැවත 20 යටතේ ජනාධිපති පාලනයකට පාර කපලා විදෙස් පුරවැසියන්ට තනතුරු ගන්න මාවත විවර කරනවා නම් එවැනි අයට එරෙහිව නැගී සිටින ලෙස මා ඉල්ලා සිටිනවා.
