තරීෂා අබේවික්රම –
ලෝක ව්ද්යා ඇකඩමියෙන් පිරිනමන ෆයාස් අල් කරාෆි සම්මානය 2020 ශ්රී ලාංකික විද්යාඥවරියකට හිමිවී තිබේ.
ඇය ශ්රී ජයවර්ධනපුර විශ්වවිද්යාලයයේ ව්යවහාරික විද්යා පීඨයේ පාරිසරික විද්යාව ආශ්රිත පර්යේෂණාගාර මධ්යස්ථානයේ අධ්යක්ෂ මහාචාර්ය මෙත්තිකා විතානගේ ය.
කසළ ජෛව ස්කන්ධ ජෛව අඟුරු බවට පරිවර්තනය කිරීම හා එය පරිසර දූෂණය අවම කිරීම සඳහා යොදාගැනීම සම්බන්ධයෙන් ඇය විසින් සිදු කරන ලද විද්යා පර්යේෂණය සඳහා මෙම සම්මානය හිමිව තිබේ.
මෙම සම්මානය දිනා ගත් පළමු ශ්රී ලාංකිකයා වන්නේ ද ඇය යි.
වසරකට ලෝකයෙන් ම එක් කාන්තා විද්යාඥයෙක් සඳහා පිරිනැමෙන මෙම සම්මානයේ දී විද්යා හා තාක්ෂණය සඳහා අඩු පහසුකම් සහිත රටවල සිටින කාන්තා පර්යේෂිකාවන්ගෙන් කෙනෙක් තෝරගැනීම විශේෂත්වයකි.
ඉදිරි පර්යේෂණ කටයුතු සාර්ථක කර ගැනීම උදෙසා මෙම සම්මානය සමග ඩොලර් 4000 ක් ද මහාචාර්ය මෙත්තිකා වෙත ලැබී තිබේ.
ලෝකයේ දියුණු වෙමින් පවත්නා රටවල්වල විද්යා පර්යේෂණ ඉහළ නැංවීමට උදව් කිරීම සඳහා 1983 පිහිටවූ ජාත්යන්තර සංවිධානයක් වන ලෝක ව්ද්යා ඇකඩමිය පිහිටුවා ගන්නා ලද්දේ නොබෙල් සම්මාන ලාභී පකිස්තාන ජාතික අබ්දුස් සලාම් නම් සුප්රසිද්ධ මහා විද්යාඥයා හා තවත් පර්යේෂකයන් කිහිපදෙනෙකුගේ එකතුවෙනි.
මේ පිළිබඳ ව මහාචාර්ය මෙත්තිකා “ලංකසරට” පැවසූවේ මෙසේ ය.
“ලෝකයේ වසරකට එක් අයෙකුට පමණක් ලැබෙන සම්මානයක් ලංකාවට ගෙන ඒමට ලැබීම ලොකු ගෞරවයක්.
ලෝකයේ බොහෝ කාන්තා විද්යාඥයන් නාමයෝජනා මේ සඳහා ඉදිරිපත් කෙරෙනවා. ඒ අතරින් ජයග්රහණය ලබාගන්න ලැබීමත්, අද පැවති ලෝක ව්ද්යා ඇකඩමියේ වාර්ෂික සැසියේදී ශ්රී ලංකාවේ නාමය ලෝක පිළිගැනීමකට ලක්කරවීමට ලැබීමත් ගැන මම සතුටු වෙනවා. මෙම සැසියේදී ප්රධාන දේශනය සිදුකරනු ලබන්නේ නොබෙල් සම්මාන ලාභීයෙක් විසිනුයි. එවන් විද්වතුන් ඉදිරියේ මෙවන් වටිනා සම්මානයක් ලැබීම ජීවිතයේ එක්වරක් පමණක් හිමිවන සුවිශේෂී අවස්ථාවක්.”
ඇමෙරිකා එක්සත් ජනපදයේ ස්ටැන්ෆර්ඩ් විශ්වවිද්යාලය හා එල්සිවයර් ප්රකාශන ආයතනය එක්ව ප්රකාශයට පත් කරන ලද 2020 වසරේ ලෝකයේ හොඳ ම විද්යාඥයින්ගේ 2% ලැයිස්තුවට ඇතුළත් කෙරුණු ශ්රී ලාංකික විද්යාඥයින් 24 දෙනා අතර පළමු ස්ථානයේ සිටින්නේ ද මහාචාර්ය මෙත්තිකා විතානගේ ය.
