නීතිඥ සංගමයේ සභාපතිවරයා විපක්ෂ නායකවරයා හමුවී බස්නාහිර පළාත් මහ ඇමති ධූරය ඉල්ලා සිටි බවට එල්ල වන චෝදනා සම්පූර්ණයෙන්ම ප්රතික්ෂේප කරන බවත්, හැකිනම් පාර්ලිමේන්තු වරප්රසාදවලට මුවා නොවී එම ප්රකාශය පාර්ලිමේන්තුවෙන් පිටතදී සිදු කරන ලෙසත් ශ්රී ලංකා නීතිඥ සංගමයේ සභාපති, ජනාධිපති නීතිඥ රජීව් විජේසූරිය දන්වා තිබේ.
මේ බව අද පාර්ලිමේන්තුවේ දී ප්රකාශ කරමින් නීතිඥ සංගමයේ සභාපතිවරයා වෙනුවෙන් ආණ්ඩුවට අභියෝග කළ විපක්ෂ පාර්ලිමේන්තු මන්ත්රී නීතිඥ රවුෆ් හකීම් කීවේ මේ පිළිබඳ ආණ්ඩු පක්ෂයේ මන්ත්රීවරයා ප්රකාශ කළ වහාම තමන් නීතිඥ සංගමයේ සභාපතිවරයා දුකරථනයෙන් සම්බන්ධ කරගත් බවය.
එහිදී රවුෆ් හකීම් ප්රකාශ වුන ආකාරයට සභාපතිවරයා සජිත් ප්රේමදාස හමුවී මහ ඇමති ධූරය සඳහා තරග කිරීමට අපේක්ෂකත්වය ඉල්ලූ බවත්, නීතිඥ සංගමය කැඳවා කටයුතු කරන්නේ ඒ පදනම මත සිට බවත් කියන කතාව සම්පූර්ණයෙන්ම අසත්යයක් සේ ඔහු ප්රත්ක්ෂේප කළ බවය.
ආණ්ඩුවේ සිටින වෙනත් ඕනෑම මන්ත්රීවරයෙකුට පාර්ලිමේන්තු වරප්රසාදවලින් බැහැරව සමාජය ඉදිරියට පැමිණ මෙම ප්රකාශය සිදු කරන ලෙස සභාපතිවරයා අභියෝග කළ බව රවුෆ් හකීම් මන්ත්රීවරයා පාර්ලිමේන්තුවට දැන්වූයේය. එසේ වුවහොත් ඊට එරෙහිව නීතිමය පියවර ගැනීමට ඔහු සූදානම් බවද මන්ත්රීවරයා කීවේය.
නීතිඥ සංගමය යනු අතීතයේ සිටම නීතිඥ වෘත්තියේ අභිමානය සහ අයිතිවාසිකම් වෙනුවෙන් සෘජුව පෙනී සිටි ආයතනයක් බවත් ජනතා විමුක්ති පෙරමුණේ තරුණයින් සිය ගණනක් අත්අඩංගුවට ගෙන වදහිංසා පමුණුවන සමයක, ඒ වෙනුවෙන් පෙනී සිටිමින් ජීවිතය පූජා කළ විජේදාස ලියනආරච්චි වෙනුවෙන් දිවයින පුරා අධිකරණ වර්ජනයක් දියත් කරමින් සාධාරණය ඉටු වන තෙක් සටන් කළේ ද මෙම සංගමය බවත් මන්ත්රිවරයා සිහි කළේය.
එවැනි ඉතිහාසයක් ඇති නීතිඥ සංගමයේ වත්මන් සභාපතිවරයා, රටේ යුක්තිය පසිඳලීමේ ක්රියාවලියට එරෙහිව සිදුවන බාධා කිරීම් සහ නීතිඥ වෘත්තියට බලපාන බරපතළ කරුණු සම්බන්ධයෙන් හඬ අවදි කර ඇති බවත්, එබැවින් නඩු තීන්දු ප්රමාද වීම් හෝ නඩු ගොඩගැසීම් වැනි වෙනත් කරුණු පටලවමින් මඩ ප්රහාර එල්ල නොකර, රජට සැබෑ ගැටලුවට මුහුණ දිය යුතු බවත් මන්ත්රීවරයා අවධාරණය කළේය.
මේ සම්බන්ධයෙන් මහාධිකරණ නීතිඥ සංගමය ද සියලු කරුණු පැහැදිලි කරමින් සහ මෙම පියවර නොගත යුත්තේ මන්දැයි පෙන්වා දෙමින් ජනාධිපතිවරයා වෙත දීර්ඝ ලිපියක් යොමු කර ඇති බවද මන්ත්රිවරයා පැවසුවේය. .
