-
අමූලික බොරැ ප්රකාශ කරමින් ජාතියට ද්රෝහි වෙන්න එපා… පාර්ලිමේන්තුව තුළ අපේ දේශපාලනය කරමු… රට ගැන කල්පනා කර ලෝකය හමුවේ රට විනාශ නොකර වගකීම් සහගත වෙමු… ජනපති විපක්ෂයට කියයි…
ඉරානය තම නාවික හමුදා යාත්රාවලට ශ්රී ලංකාවට පැමිණීමට අවසර ඉල්ලා සිටි දිනම, ඇමෙරිකා එක්සත් ජනපදය ද තම හමුදා ගුවන් යානා දෙකක් සඳහා අවසර ඉල්ලා සිටි බව ජනාධිපති අනුර කුමාර දිසානායක අද (20) පාර්ලිමේන්තුවේ දී අනාවරණය කළේය.
ජනාධිපතිවරයා කීවේ මෙය මෙරට දිගුකාලීන මධ්යස්ථ විදේශ ප්රතිපත්තිය පිළිබඳ පැහැදිලි පරීක්ෂණයක් බඳු වූ අවස්ථාවක් බවය.
මෙම කරුණ සම්බන්ධයෙන් අදහස් දැක්වූ ජනාධිපති අනුර කුමාර දිසානායක කියා සිටියේ, ශ්රී ලංකාව සෑම විටම ස්ථාවර මධ්යස්ථ ප්රතිපත්තියක් පවත්වාගෙන ගොස් ඇති බවත්, කිසිදු ආකාරයක බලපෑමක් හමුවේ එය අත්නොහරින බවත්ය. ජාතියේ අභිමානය, යුක්තිය ඉටුකිරීම සහ ජාත්යන්තර වශයෙන් රටකට හිමිවන පිළිගැනීම සුරක්ෂිත කළ හැක්කේ මෙම මධ්යස්ථභාවය දැඩි ලෙස ආරක්ෂා කිරීමෙන් පමණක් බව ඔහු අවධාරණය කළේය.
සමහර පාර්ලිමේන්තු මන්ත්රීවරුන් සහ මහජන මතයේ ඇතැම් කොටස් රජය එක් පාර්ශවයකට පක්ෂපාතී වන බවට හෝ නියමිත වේලාවට තීරණ ගැනීමට අපොහොසත් වන බවට චෝදනා කළ බවත්, එම චෝදනා සම්පූර්ණයෙන්ම අසත්ය බව දැඩිව අවධාරණය කරමින් ඒවා තරයේ ප්රතික්ෂේප කළේය.
සිදුවීම් පෙළගැසුණු ආකාරය පිළිබඳ සවිස්තරාත්මකව කරුණු පැහැදිලි කළ ජනාධිපති අනුර කුමාර දිසානායක මෙසේ පැවසීය:
“2026 පෙබරවාරි 26 වන දින ශ්රී ලංකාවට ඉරානයෙන් ඉල්ලීමක් ලැබුණා. ඒ සහයෝගීතාව ශක්තිමත් කිරීමේ සංචාරයක කොටසක් ලෙස නාවික යාත්රා තුනකට මාර්තු 9 සහ මාර්තු 13 යන දිනවල මෙරටට සුහද සංචාරයක් සඳහා පැමිණීමට අවසර ඉල්ලා සිටිමිනුයි. එම අවස්ථාවේදී බලධාරීන් එම ඉල්ලීම අධ්යයනය කරමින් සහ යෝජිත දින සඳහා අනුමැතිය ලබා දීමේ ක්රියාවලිය පිළිබඳව සලකා බලමින් සිටියා.”
“එදිනම සවස් වරුවේ ශ්රී ලංකාවට ඇමෙරිකා එක්සත් ජනපදයෙන් තවත් ඉල්ලීමක් ලැබුණා. ඒ ජිබුටි වරාය ආසන්නයේ ස්ථානගත කර ඇති ඇමෙරිකානු නාවික හමුදාවට අයත් නාවික ප්රහාරක ගුවන් යානා දෙකකට මත්තල ජාත්යන්තර ගුවන්තොටුපොළට ගොඩබැස්වීමට අවසර ඉල්ලා දෙමින්.
“ඒ මොහොතේ අපේ මේසය මත ලේඛන දෙකක් තිබුණා,” යැයි ජනාධිපතිවරයා පැවසීය. “එක් ඉල්ලීමක් ඉරානයෙන්, මාර්තු 9 සහ 13 යන දිනවල නාවික යාත්රාවලට ඇතුළු වීමට අවසර ඉල්ලා සිටිමින්. අනෙක් ඉල්ලීම ඇමෙරිකා එක්සත් ජනපදයෙන්, ප්රහාරක ගුවන් යානා දෙකක් මත්තලට ගොඩබැස්වීමට අවසර ඉල්ලා සිටිමින්.”
ජාත්යන්තර වශයෙන් මිලිටරි ගැටුම් උත්සන්න වීමේ සලකුණු දැනටමත් මතු වෙමින් පවතින බැවින්, රජයේ තීරණය ඉතා පැහැදිලිව ගනු ලැබූ බව ජනාධිපති අනුර කුමාර දිසානායක පැවසීය. ශ්රී ලංකාවේ මධ්යස්ථභාවය ආරක්ෂා කිරීම සඳහා මෙම ඉල්ලීම් දෙකම ප්රතික්ෂේප කිරීමට රජය පියවර ගත් බව ජනාධිපතිවරයා හෙළි කළේය.ෙ
“ඒක තමයි මධ්යස්ථභාවය කියන්නේ,” ඔහු පැවසීය.
ඉරාන යාත්රාවලට අවසර දීම ප්රතික්ෂේප කිරීම සම්බන්ධයෙන් එල්ල වූ විවේචනවලට පිළිතුරු දෙමින් ජනාධිපතිවරයා ප්රශ්න කළේ, එම අවසරය ලබා දුන්නේ නම් ඇති විය හැකි ප්රතිවිපාක මොනවාද යන්නය. එක් පාර්ශවයකට පක්ෂග්රාහී වීමක් පෙන්නුම් කිරීමෙන් හෝ අනෙක් පාර්ශවයට ද ඒ හා සමාන ප්රවේශයක් ලබා දීමට සිදුවීමෙන් ශ්රී ලංකාවේ මධ්යස්ථභාවය බිඳ වැටෙනු ඇතැයි ඔහු අනතුරු ඇඟවීය.
එවැනි පියවරක් මගින් මත්තල ජාත්යන්තර ගුවන්තොටුපොළ සහ කොළඹ වරාය සම්බන්ධ කර ගනිමින්, දුරස්ථව පවතින ගැටුමක් ශ්රී ලංකාවට සමීප කරවීමට ඉඩ තිබූ බව ඔහු පෙන්වා දුන්නේය.
“අපි එය කරන්නේ නැහැ,” යැයි පවසමින් ජනාධිපති අනුර කුමාර දිසානායක අවධාරණය කළේ, කිසිදු බලපෑමක් යටතේ ශ්රී ලංකාව මෙතෙක් ආරක්ෂා කළ මධ්යස්ථ ස්ථාවරය පාවා නොදෙන බවයි.
එමෙන්ම කිසිම පදනමක් නැති අමූලික මුසාවාදා පාර්ලිමේන්තුව තුළ ප්රකාශය කරමින් රටට අනතුරට ඇද දමන ප්රතිගාමීන් ලෙස නොහැසිරෙන ලෙස ජනාධිපතිවරයා විපක්ෂයෙන් ඉල්ලා සිටියේය.
