දිනසේන රතුගමගේ –
ලංකාවෙන් තුරන් කළ බවට සහතික කළ මැලේරියා රෝගය වැළදීමෙන් යාපනයේ පුද්ගලයෙකු යාපනය ශික්ෂණ රෝහලේ ප්රතිකාර ලබමින් සිටියදී 10 දා මියගොස් තිබේ.
මියගිය පුද්ගලයා යාපනයේ ඩෙල්ෆ්ට් ප්රදේශයේ පදිංචි 34 හැවිරිදි පුද්ගලයෙකි.
ඔහු පසුගිය කාලයේදී විදෙස් ගත වීමක නිරත වී නොමැති අතර ඔහුට මැලේරියාව වැළදුණු ආකාරය සෙවීම පිණිස සෞඛ්ය නිලධාරීන් පරීක්ෂණ කීපයක්ම ආරම්භ කොට තිබේ.
යාපනයේ මැලේරියා මර්දන කටයුතුවල නිරත වෛද්යවරයෙකු කියා සිටියේ 2012 වසරේ ඔක්තෝබර් මාසයේදී ශ්රී ලංකාවෙන් අවසාන මැලේරියා රෝගියා හමුවීමෙන් පසුව එම වසරේ නොවැම්බර් මාසයේ සිට ශ්රී ලංකාව මැලේරියා රෝගයෙන් තොර රටක් බවට ප්රකාශයට පත් වු බවයි.
ලෝක සෞඛ්ය සංවිධානය මගින් ඒ පිළිබදව 2016 වසරේදී සහතිකයක් ලබා දී තිබේ.
නමුත් වන්දනා කිරීම පිණිසත් වාණිජ කටයුතු පිණිසත් ඉන්දියාවට ගොස් ආපසු පැමිණෙන පුද්ගලයිනුත් ඉන්දියාවේ ඇති මැලේරියා රෝගය ශ්රී ලංකාව වෙත රැගෙන එන බව එම වෛද්යවරයා පැවසීය.
ඉන්දීය ධීවරයින් අත් අඩංගුවට ගෙන රඳවා තබා ගැනීමද මේ රටට මැලේරියා රෝගය යළි පැමිණීමට තවත් හෙතුවක් බව ඔහු පෙන්වා දුන්නේය.
ශ්රී ලංකාවෙන් මැලේරියා රෝගය තුරන් වූ බවට නිවේදනය කිරීමෙන් පසුවද එවැනි රෝගීන් හමුවන්නට පටන් ගෙන ඇතැයි කී වෛද්යවරයා මෙය ඉතා අවදානම් සහගත තත්ත්වයක් බවද කියා සිටියේය.
ඉන්දියාවට අමතරව බංගලාද්ශය, නේපාලය, පකිස්තානය, සුඩානය වැනි රටවලින්ද ශ්රී ලංකාවට මැලේරියා රෝගය පැමිණේන බව කී වෛද්යවරයා එම රෝගීන් හදුනාගෙන සෙසු පිරිසට මැලේරියා රෝගය බෝවීමට ඇති අවස්ථා අවම කිරීමට පියවර ගෙන ඇති බවද සඳහන් කළේය.
ශ්රී ලංකාවේ මැලේරියා රෝගය මර්දනය කිරීම පිණිස වසරකට රුපියල් මිලියන 640 ක මුදලක් වැය වූ නමුත්ලෝක සෞඛ්ය සංවිධානය ශ්රී ලංකාවෙන් මැලේරියාරෝගය තුරන් වූ බවට නිවේදනය කිරීමත් සමගම ලැබෙන විදේශ ආධාර මුදල් ප්රමාණය අඩුවී ඇති බව වෛද්යවරයා පැවසීය.
මේ තත්ත්වය නිසා රෝගය මර්දනය කිරීම සඳහා දැන්වැය කළ යුතුව ඇත්තේ ශ්රී ලංකාවේ මුදල් නිසා ජනතාව මැලේරියා රෝගය පිළිබඳව දැණුවත්ව සිටියයුතු බවද කියා සිටියේය.
