දිනසේන රතුගමගේ –
තමන් ජනාධිපතිවරයා වශයෙන් ජයග්රහණය කළහොත් දෙමළ ජනතාවගේ ප්රශ්න සියල්ලම විසදා දෙන බවට විපක්ෂ නායක සජිත් ප්රේමදාස දෙමළ පක්ෂ නියෝජිතයින්ට කොළඹදී පොරොන්දු වූ බව දෙමළ ජාතික සන්ධානයේ වන්නි දිස්ත්රික් පාර්ලිමේන්තු මන්ත්රී සෙල්වම් අඩෙයිකලනාදන් මන්ත්රීවරයා අද ( 14 ) පැවසීය.
මන්ත්රීවරයා එසේ ප්රකාශ කළේ දෙමළ පක්ෂ කීපයක මන්ත්රීවරු හා නායකයින් පිරිසක් කොළඹදී ජනාධිපතිධූර අපේක්ෂක විපක්ෂ නායක සජිත් ප්රේමදාස හමුවීමෙන් පසුවය.
තමන් මේ දක්වා රටේ අගමැති තනතුර හෝ ජනාධිපති තනතුර හොබවා නොමැති බවත් පලමු වතාවට ජනාධිපතිවරයෙකු වීම පිණිස නාම යෝජනා ලබා දි ඇති බවත් සජිත් ප්රෙමදාස දෙමළ මන්ත්රීවරුන්ට පවසා ඇත.
කෙසේ හෝ තමන් ජයග්රහණය කලහොත් මේ රටේ දෙමළ ජනතාවට ඇති සියලුම ප්රශ්න ශ්රී ලංකාවේ ආණ්ඩුක්රම ව්යවස්ථාවට හානියක් නොවන අන්දමට විසඳා දෙන බවට ඔහු පොරොන්දු වී තිබේ.
දෙමළ ප්රශ්න විසදීම පිණිස පළාත් සභා ක්රමය ප්රයෝජනයට ගෙන එම පළාත් සභා වලට වැඩි බලතල ප්රමාණයක් ලබා දීමට තමන් අපේක්ෂා කරණ බව සජිත් ප්රේමදාස සඳහන් කළ බවද අඩෙයිකලනාදන් මන්ත්රීවරයා පැවසුවේය
දෙමළ ජනතාව මුහුණ දෙන ගැටලු සඳහා විශේෂ කාර්ය බළකායක් පිහිටුවා තම සෘජු අධීක්ෂණය යටතේ සියලු ගැටලුවලට විසඳුම් ලබා දෙන බවට ද ඔහු පොරොන්දු වූ බව පැවසූ මන්ත්රීවරයා තමා ජාතිවාදියෙකු නොවන බවත් දෙමළ ජනතාව ගැන සලකා බැලිය යුතු බවත් ඔහු ප්රකාශ කළ බවද කියා සිටියේය.
මේ නිසා ජනාධිපතිරණයේදී තමන්ට සහය ලබා දෙන මෙන් සජිත් ප්රේමදාස මහතා ඉල්ලා සිටියත් සහභාගී වූ දෙමළ පක්ෂ නියෝජිතයින් ඔහුගේ එම ඉල්ලීම ගැන මෙතෙක් තීරණයක් ගෙන නොමැති බවද අඩෙයිකලනාදන් මන්ත්රීවරයා ප්රකාශ කළේය.
