මහජන උපයෝගීතා කොමිසමේ සභාපති ජනක රත්නායකගේ මෙහෙයවීමෙන් එම කොමිසමේ උප සභාපති උදේනි වික්‍රමසිංහට සහ කොමිසමේ සාමාජික මොහාන් සමරනායකට පසුගිය 20 දා මැර තර්ජන එල්ල කර ඇතියි පවසන සිද්ධියක් සම්බන්ධව බස්නාහිර පළාත් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්ගේ නියෝගයකට අනුව කොල්ලුපිටිය පොලිසිය විශේෂ විමර්ශනයක් ආරම්භ කර ඇතැයි වාර්තා වේ.
කොමිසමේ මූලික එකඟතාවය බිඳ දමා විදුලි බිල ඉහළ දැමීම සම්බන්ධව කොමිසමේ සමාජිකයන් විසින් කැබිනට් මණ්ඩලයේ තිරණයට එකඟවීමට අදාලව කොමිසමේ සභාපතිවරයාගේ කැඳවීමකට අනුව කොල්ලුපියෙියේ පිහිටි කොමිෂන් සභාවට ගිය අවස්ථාවේ දී වෘත්තීය සමිති ක්‍රියාකාරිකයන් සහ සිවිල් සංවිධාන නියෝජිතයන් එම ස්ථානයේ උද්ඝෝෂණයක් පවත්වමින් සිටි බවත් ඔවුන් මේ පිරිසට බැණ තර්ජනය කර ඇති බවත් අනාවරණය වී ඇත.
කොමිෂන් සභා කාර්යාලය ඇත්තේ කොල්ලුපිටිය ශාන්ත මයිකල් පාරේ පිහිටි මර්චන්ට් ටවර් ගොඩනැගිල්ලේ සිව්වන මහලේය. මහජන උපයෝගීතා කොමිසමේ සභාපති ජනක රත්නායක විසින් මෙම පිරිස කොමිෂන් සභා කාර්යාලයට ගෙන්වාගෙන ඇතැයි කොමිසමේ සාමාජික මොහාන් සමරනායක මේ පිළිබඳව පොලිසියට කටඋත්තරයක් දෙමින් ප්‍රකාශ කර ඇතැයි දැනගන්නට ඇත. පොලිසිය පවසන්නේ තමන්ගේ විමර්ශනවලින් ද මේ කාරණාව සනාථ වන බවය.
විශේෂ අවසරයකින් තොරව මහජන උපයෝගීතා කොමිසම පිහිටි පරිශ්‍රයට පිටස්තර පුද්ගලයින්ට ඇතුළු විය නොහැකි බව ද පොලිසිය කියයි..
සංවිධානාත්මක පිරිසක් කොමිෂන් සභා ගොඩනැගිල්ලට පැමිණ එහි සාමාජිකයින් බිය ගන්වමින් බලපෑම් කිරීම සඳහා කොමිසමේ සභාපතිවරයා කටයුතු කර ඇති බව මූලික විමර්ශනවලින් අනාවරණය වන බව ද පොලිසිය පවසයි.
මේ සම්බන්ධව කොමිසමේ උප සභාපති උදේනි වික්‍රමසිංහගෙන් ද ප්‍රකාශයක් ලබා ගැනීමට නියමිතව ඇතැයි කොල්ලුපිටිය පොලිසිය කියයි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
ඔහුගෙන් ද ප්‍රකාශයක් ලබා ගත් පසු අධිකරණයට කරුණු වාර්තාකර කොමිසමේ සමාජිකයින්ට තර්ජනය කළ පිරිසට එරෙහිව දැඩිව නීතිය ක්‍රියාත්මක කිරීමට බලාපොරොත්තුවන බව වාර්තා වේ.