කොල්ලුපිටිය ප්‍රදේශයේ සුඛෝපභෝගී මහල් නිවාස සංකීර්ණයක චීන ජාතිකයන් පමණක් රැඳී සිටින කොටසක රහසිගත ලෙස පවත්වාගෙන ගිය කැසිනෝ සූදු පොළක් සුරාබදු නිලධාරීන් විසින් ඊයේ වටලා තිබේ.
මෙම සුඛෝපභෝගී මහල් සංකීර්ණයේ 28 වැනි මහලේ මෙම කැසිනෝ සූදු පොළ පවත්වාගෙන ගොස් ඇත්තේ ද චීන ජාතිකයෙක් විසිනි.
බලපත්‍රයක් රහිතව මෙන්ම, කොරෝනා වසංගත තත්ත්වය හමුවේ තවමත් සුදු පොල විවෘත කිරීමට අවසරයක් නොමැති අවස්ථාවක රහසිගතව මෙම කැසිනෝ සූදු පොළ පවත්වාගෙන ගොස් ඇතැයි විමර්ශකයන්ට අනාවරණය වී ඇත.
මේ වසරේ ජනවාරි මාසයේ සිට මෙහි සුඛෝපභෝගී නිවාස දෙකක් අධික මිල ගණන් ගෙවා චීන ජාතිකයා විසින් වෙන් කරගෙන මෙම කැසිනෝ සූදු පොළ පවත්වාගෙන ගොස් ඇත.
නිලධාරීන් සුදු පොල වටලන අවස්ථාවේදී එහි සිටි කාන්තාවන් තිදෙනෙක් ඇතුළු චීන ජාතිකයන් 11 දෙනෙකු එහි කැසිනෝ සූදු සෙල්ලම් කිරීම සඳහා පැමිණ සිට ඇති අතර ඔවුන් සියලු දෙනා අත්අඩංගුවට ගෙන තිබේ.
තීරුබදු නොගෙවූ දේශීය හා විදේශීය මත්පැන් තොග, ආනයනික දුම්වැටි, රුපියල් දෙලක්ෂයකට අධික සුදු සෙල්ලම් කරන උපකරණ, උපාංග සහ කැසිනෝ කාඩ් එහි දී අත්අඩංගුවට ගෙන ඇත.
එමෙන්ම රුපියල් මිලියන 6.5 ක මුදලක් කැසිනෝ සූදු ක්‍රීඩා කිරීම සඳහා එහි පැමිණි අය විසින් ගෙනැවිත් තිබුණි .
කැසිනෝහල් පවත්වාගෙන ගිය චීන ජාතිකයා විසින් මෙම සුඛෝපභෝගී නිවාස දෙක සඳහා රුපියල් ලක්ෂ 7 ක මාසික ගෙවීමක් කරමින් මෙම කැසිනෝ සූදු පොළ පවත්වාගෙන ගොස් ඇත.
එහෙම සුදු පොල පවත්වාගෙන යන බවට අඩුම තරමින් එම මහල් නිවාස සංකීර්ණයේ නිවාස හිමිකරුවන්ට හෝ මොහු දැනුම්දී නොමැත.
කොරෝනා වසංගත තත්ත්වය හේතුවෙන් පසුගිය මාර්තු 18 වැනිදා සිට ලංකාව පුරා සියලුම සියලුම සමාජශාලා, කැසිනෝහල් තහනම් කර තිබේ.
අවසරලත් කැසිනෝ මහලක බලපත්‍රයක් සඳහා වාර්ෂිකව රුපියල් මිලියන 50 ක බදු රජයට ගෙවිය යුතුය.
සැකකරුවන් හා කැසිනෝ සූදු පොළේ දී අත්අඩංගුවට ගත් මත්ද්‍රව්‍ය මත්පැන්, ඔන්ලයින් කැසිනෝ ක්‍රීඩා කරන භාණ්ඩ, කැසිනෝ භාණ්ඩ ආදිය වැඩිදුර විමර්ශන සහ අධිකරණයට ඉදිරිපත් කිරීම සඳහා කොල්ලුපිටිය පොලිසියට බාර දී ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
