පසුගිය මැයි 09 වැනිදා සිදුවූ ප්‍රචණ්ඩ ක්‍රියාවලිය අතරේ කඩා බිඳ විනාශ කර දැමුණු හම්බන්තොට පිහිටි රාජපක්ෂවරුන්ගේ කෞතුකාගාරය සහ ජනාධිපතිවරයාගේ දෙමාපියන්ගේ ස්මාරක යළි ගොඩනැගීම සහ ප්‍රතිසංස්කරණය සඳහා අවශ්‍ය මුදල් සහ ද්‍රව්‍ය එකතු කිරීම එම දිස්ත්‍රික්කයේ පොලිස් ස්ථාන වෙත පැවරීම හේතුවෙන් පොලිස් නිලධාරීන් විශාල අපහසුතාවකට ලක්ව ඇති බව වාර්තා වේ.
හම්බන්තොට දිස්ත්‍රික්කයේ ඉහළ නිලයක් දරන පොලිස් නිලධාරියකු විසින් මීට අදාළ නිල නොවන නියෝගයක් පොලිස් ස්ථානාධිපතිවරුන් වෙත ලබා දී ඇති අතර ඒ අනුව ගල් වැලි සිමෙන්ති, දැව සහ මුදල් ආධාර කවර ආකාරයින් හෝ ලබාගෙන ඊට දායක විය යුතු බවට අවධාරණය කර ඇත.
හිටපු අගමැති මහින්ද රාජපකෂ ට සහය පළ කිරීම සඳහා අරලියගහ මන්දිරයට පැමිණි පිරිස විසින් ගාලු මුවදොර පැවැති රජයට එරෙහි සාමකාමී අරගලයට ම්ලේච්ඡ මැර ප්‍රහාරයක් එල්ල කිරීමෙන් පසුව කෝප වූ ජනතාව විසින් විනාශ කරන ලද දේපළ අතරට මෙම කෞතුකාගාරය සහ ස්මාරකද අත් විය.
එම දේපළ ආරක්ෂා කර ගැනීමට නොහැකි වීම හේතුවෙන් රජයේ ප්‍රබලයන්ගේ උදහසට ලක්ව ඇතැයි පැවසෙන මෙම ඉහළ නිලධාරියා සිය ස්ථාන මාරුව වළක්වා ගැනීමේ අරමුණින් මෙසේ කටයුතු කරමින් සිටින බව තතු දත් ආරංචි මාර්ග සඳහන් කරයි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
කෙසේ වුවද පවතින ආර්ථික දුෂ්කරතා සහ සමාජයීය ගැටලු හේතුවෙන් මෙම ද්‍රව්‍ය සහ මුදල් එකතු කිරීම පොලිසියේ නිලධාරීන්ටද අසීරුවී ඇති අතර මෙම කටයුත්ත වළක්වා දෙන ලෙස දන්වමින් පොලිස්පතිවරයාටද නිර්නමික ව මේ බව දැන්වීමට කටයුතු කර ඇති බව ආරංචි මාර්ග අනාවරණය කළේය.