සටහන – නතාෂා නෙත්මිණි
- එන්නත ලබා දීමේ අරමුණ රෝගයේ බරපතලම තත්වයන් පාලනය කරගැනීම…
- රටෙන් අඩකට එන්නත් ලබා දීම තමයි ජාතික ඉලක්කය…
- චීනයෙන්, රුසියාවෙන් සහ ලෝක සෞඛ්‍ය සංවිධානයෙන් කරන ප්‍රදානයන් බලා මිලදී ගත යුතු එන්නත් ප්‍රමාණය හා වෙන් කරන මුදල තීරණය කරනවා…
රට තුළ කොවිඩ් මර්ධන එන්නත්කරණය දැන් ආරම්භ වී තිබේ. ඒ ඉන්දියානු ජනරජය දිනය වෙනුවෙන් ලද එන්නත් ලක්ෂ තුනක ප්‍රදානයකිනි. කෝටි දෙකකට අධික ජනගහණයෙන් සියයට පනහකට එන්නත ලබා දීමට සැලසුම් රජට සතුව ඇතැයි පැවසේ. මාත්‍රා දෙක බැගින් ලබා දීමට එන්නත් කෝටි දෙකක් පමණ අවශ්‍යව ඇත. ප්‍රදානයක් ලෙස ලැබුණු එන්නත් ලක්ෂ තුනකින් ආරම්භවන කොවිඩ් මර්දන ජාතික එන්නත් කරණ වැඩපිළිවෙළේ අද සහ හෙට සම්බන්ධව නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් සමග ලංකාසර පැවැත් වූ සාකච්ඡාවකි මේ.
- ප්‍රශ්නය – එන්නත් ගැන වැඩියෙන්ම දැනුවත් භාවයක් තියෙන්නේ සෞඛ්‍ය ක්ෂේත්‍රයේ නියැලෙන්නන තුළයි. ඔවුන් තමයි එන්නත් පිලිබඳව වැඩියෙන්ම ඉගෙන ගෙන තියෙන්නේ. එහෙම තිබිලත් ඉන්දියාවෙන් ගෙන් වූ කොවිඩ් මර්දන එන්නත විදගැනීමට සෞඛ්‍ය ක්ෂේත්‍රයේ ඇතමෙක් බියක් දක්වනවා. මෙයට හේතුව කුමක්ද?
පිළිතුර – මේ එන්නත අපිට විතරක් නොවෙයි මුළු ලෝකයටම අලුත්. මේ පිලිබඳව රැස්කර තිබෙන තොරතුරු ඉතාමත් ස්වල්පයක් විතරයි. ඖෂධ නියාමන අධිකාරිය වුවත් අපට ලබා දුන්නේ තාවකාලික අවසරයක්. අපේ විතරක් නොවෙයි, ලෝකයේ අනිකුත් රටවල්වලටත් මේ පරිසරයම තමයි තිබෙන්නේ. ඒ නිසා සෞඛ්‍ය සේවකයින් තුළ මේ සම්බන්ධයෙන් යම් කුකුසක් පැවතිම පුදුමයට කරුණක් නොවෙයි,
- ප්‍රශ්නය – සෞඛ්‍ය සේවකයින් තුළ පවතින කුකුස නැති කිරීමට අමාත්‍යංශය මට්ටමින් යම් කිසි වැඩපිළිවෙළක් දියත් කරන්න බලාපොරොත්තු වෙනවාද?
පිළිතුර – ලෝකයේ සෑම රටකම ඇතිවෙලා තියෙන තත්ත්වය මේකයි. කුකුසක් සෑම වෘත්තීය තලයකම සමාජ තලයකම තියනවා. මොකද මේ එන්නත අලුත්. රෝගය අලුත්. මුළු ලෝකයේ ම පර්යේෂකයෝ මේ එන්නත පිළිබඳව මේ වන විටත් කුරුණු රැස්කරමින් සිටිනවා. කෙසේ නමුත් අපි කිසිම පුද්ගලයෙකුට මේ ඒන්නත ගැන නිවැරදිව කියන්න පුලුවන්කමක් නැහැ. ඒ නිසා කෙනෙකුගේ හිතේ කුකුසක් ඇතිවීම පුදුමයක් නොවේ.
- ප්‍රශ්නය – එන්නත ලබා ගැනීමට අකමැත්තක් දක්වන පුද්ගලයන් කැමති කරවා ගැනීම සඳහා යම් වැඩපිළිවෙලක් ක්‍රියාත්මක කිරීමේ සුදානමක් තිබෙනවාද?
පිළිතුර – කිසිම පුද්ගලයෙකුට මේ එන්නත බලෙන් විදින්නේ නැහැ. හැමකෙනෙකුම ස්වෙච්ඡාවෙන් ඉදිරිපත් වෙන්නයි අවශ්‍ය . මොකද එන්නත ලබා ගන්නා පුද්ගලයාට පමණයි රෝගයෙන් බේරි ඉන්න පුළුවන් වෙන්නේ. ඒ නිසා තම තමන්ගේ ආරක්ෂාව ගැන හිතලා මේ එන්නත ලබාගන්නවාද නැද්ද කියලා තීරණය කරන්න ඕනේ ඒ අයමයි.
- ප්‍රශ්නය – ඇස්ට්‍රා සෙනිකා එන්නත ලබා දිමෙන් රෝගය කොයිතරම් දුරට පාලනය කර ගත හැකිවෙයි කියලා හිතනවාද?
පිළිතුර – රෝගය පැතිරීම වැළැක්වීමට කොයිතරම් දුරට මේ එන්නත ක්‍රියාත්මක වෙනවාද කියන්න තවමත් පුලුවන් කමක් නැහැ. නමුත් අපි මේ එන්නත ලබා දීමෙන් බලාපොරොත්තු වන්නේ රෝගයෙන් බරපතල තත්වයට පත්වීම අවම කර ගැනීමයි. දැඩිසත්කාර වෙත ඇතුළත් කරන සංඛ්‍යාව අවම කරන්න හා මිය යන පුද්ගලයින්ගේ සංඛ්‍යාව අවම කිරීම තමයි මූලික අරමුණ
- ප්‍රශ්නය – සාමාන්‍යයෙන් රටකට එන්නත් ගෙන ඒමේදී ජාතික ඖෂධ නියාමන අධිකාරියට වගකීම් රැසක්ම පැවරෙනවා. ඒ සඳහා සැලකිය යුතු කාලයක් ගතවෙනවා. නමුත් කොවිඩ් මර්දන එන්නත ගෙනඒමේදී ඖෂධ නියාමන අධිකාරිය සැලකිය යුතු කාලයක් ගතකළේ නැහැ නේද?
පිළිතුර – සාමාන්‍යයෙන් ඖෂධයක් මෙරටට ගෙන ඒමේදී අදාල එන්නත හෝ ඖෂධය සම්බන්ධයෙන් වූ ලියකියවිලි විශේෂඥ කමිටුවක් මගින් දින 15ක් පුරා පරික්ෂාවට ලක් කරනවා. නමුත් කොවිඩ් එන්නත හදිසි භාවිතය සඳහා ලෝක සෞඛ්‍ය සංවිධානය මගින් ලෝකයේ සියලුම රටවල් සඳහා අවසර ලබා දී තිබෙනවා. ඒ අවසරයට අනුකූලව ජාතික ඖෂධ නියාමන අධිකාරියේ විශේෂඥ කමිටුව මගින් දින 7ක් පුරා මෙම ලියකියවීලි පරික්ෂාවට ලක්කලා
- ප්‍රශ්නය – ජාතික ඖෂධ නියාමන අධිකාරියේ තීරණයද අවසාන තීරණය වන්නේ?
පිළිතුර – ජාතික ඖෂධ නියාම අධිකාරියේ අවසර ලබා දුන් පසුව රජයක් හැටියට මේ එන්නත ජනතාවට දෙනවාද නැද්ද කියලා තීරණය කරන්නේ බෝවන රෝග පිළිබඳ උපදේශන කමිටුවේ තීරණයන්ට අනුවයි. ඒ කමිටුවේ විශේෂඥවරුන් විශාල පිරිසක් සිටිනවා. ඒ සෑමකෙනෙකුම මේ පිලිබඳව හොඳ අධ්‍යනයක් කරලා අවසානයේ ලබා දෙන තීරණය තමයි රජයක් හැටියට ක්‍රියාත්මක කරන්නේ.
- ප්‍රශ්නය – මුල් වටයේදී සෞඛ්‍ය සේවකයින් සදහා භාවිත කරන්නේ ඉන්දියාවෙන් අපට ප්‍රධානයක් වශයෙන් ලැබුණ එන්නත ලක්ෂ 5ක ප්‍රමාණයක්. නමුත් රටේ සමස්ත ජනතාවට ඉදිරියේදී එන්නත ලබා දීම සඳහා අපිට මිලදී ගැනීම් සිදුවිය යුතුයි නේද?. ඒ සදහා කොපමණ මුදලක් වැයවෙයි කියලා මේ වන විට ඇස්තමේන්තු ගත කර තිබෙනවාද?
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
පිළිතුර – අපි බලාපොරොත්තු වන්නේ රටේ ජනගහනයෙන් සියයට 50ක ප්‍රමාණයකට මේ එන්නත ලබා දීමටයි. අපිට චීනයෙන් එන්නත් ලක්ෂ 3ක ප්‍රමාණයක් ලබා දෙන්න පොරොන්දු වෙලා තියනවා. ඒ හැරුණු කොට ලෝක සෞඛ්‍ය සංවිධානයෙන් හා රුසියාවෙනුත් ප්‍රදානයන් ලබා දීමට කැමැත්ත පළ කර තිබෙනවා. ඒ අනුව තව කොපමණ ප්‍රමාණයක් මිලදීගත යුතුද යන්න තවමත් ඇස්තමේන්තුගත කරලා නැහැ. ඉදිරියේදී එය සිදුවේවි.