ඊයේ (31) ඔමික්‍රෝන් ආසාදිතයින් 41 දෙනෙකු වාර්තා වූ බව ශ්‍රී ජයවර්ධනපුර විශ්ව විද්‍යාලයේ ආසාත්මිකතා ප්‍රතිශක්ති හා සෛල ජෛව විද්‍යායතනයේ අධ්‍යක්ෂ ආචාර් වෛද්‍ය චන්දිම ජීවන්දර කීවේය. සෞඛ්‍යය අමාත්‍යාංශ බලධාරීන් කීවේ රටේ සියයට 12ක් ඔමික්‍රොන් අවදානමක බවය. මෙවන් තත්වයක් තුළ බොහෝ දෙනා බූස්ටර් එන්නත මගහැර යෑම රටේ කොවිඩ් සුනාමියක් ඇතිවීමට පාර කපන බව විද්වත් සෞඛ්‍යය වෘත්තිකයෝ අපට කියමින් සිටිති. මේ සම්බන්ධයෙන් ශ්‍රී ජයවර්ධනපුර විශ්ව විද්‍යාලයේ ආසාත්මිකතා ප්‍රතිශක්ති හා සෛල ජෛව විද්‍යායතනයේ අධ්‍යක්ෂ වෛද්‍ය චන්දිම ජීවන්දර විමසුවෙමු. අප ඇසූ ප්‍රශ්නවලට ඔහු දුන් පිළිතුරු පහත දැක්වේ.
- ප්‍රශ්නය – ඔමික්‍රෝන් ආසාදිතයින් කී දෙනෙකු මේ වන විට රට තුළින් සොයාගෙන තිබෙනවාද?
පිළිතුර – ආසාදිතයින් 41ක් ඊයේ 931) සොයා ගත්තා. මීට පෙර ආසාදිතයින් 5ක් සොයා ගත්තා.
- ප්‍රශ්නය – මේ ආසාදිතයින් සියලුම දෙනා විදේශයන්ගේ සිට පැමිණි අයද?
පිළිතුර – අපට ආසාදිතයින්ගේ නිදර්ශක ලැබෙන්නේ රසායනාගාරයන් හරහා. විශේෂයෙන්ම ගුවන්තොටුපල පරිශ්‍රයේ තියෙන රසායනාගාරයෙන්, ගම්පහ සහ කොළඹින් තමයි මේ නිදර්ශක ලැබුණේ. ඒ නිසා මේවා විදේශගතව සිට පැමිණි අයගේද යන්න අප කියන්න දන්නේ නැහැ. ඒ බව තහවුරු කරන්නේ වසංගත රෝග විද්‍යා අංශය මගින්.
- ප්‍රශ්නය – ජාන ජාන විශ්ලේෂණ පර්යේෂණ වාර්තාවක් වාර්තාවන් සෞඛ්‍ය අමාත්‍යංශයට බාරදීමක් සිදුවෙන්නේ කොපමණ කාලයක් තුළදීද?
පිළිතුර – සෑම සතියකට වරක්ම ජාන විශ්ලේෂණ පර්යේෂණ වාර්තාවක්අප සෞඛ්‍ය සේවා අධ්‍යක්ෂ ජනරාල්වරයා හා ලේකම්වරයාට බාරදෙනවා. ඊයේ (31) දිනයේදී මේ සතියට අදාල වාර්තාව ඔවුන්ට භාරදුන්නා.
- ප්‍රශ්නය – වාර්තාව සකස් කිරීමේදී කොපමණ නියැදි ප්‍රමාණයක් පරික්ෂාවට ලක්කරනවාද?
පිළිතුර – සාමාන්‍යයෙන් නියැදි 96ක් වගේ තමයි පරික්ෂාවට ලක්කරන්නේ නමුත් සෞඛ්‍ය අමාත්‍යංශයේ ඉල්ලීම පරිදි ඔමික්‍රෝන් වයිරසය මෙරට තුළ පැතිර පවතින්නේද යන්න සොයා බැලීම සදහා නියැදි 176ක් පරික්ෂා කළා.
- ප්‍රශ්නය – වසර 2021 අවසාන දිනයේදී නව වසර උදාවීමත් සමග කොරෝනා අවසන් වේවිද?
පිළිතුර – කොරෝනා අවසන් වෙන එකක් නැහැ. කොරෝනාත් සමගයි අපිට ජීවත් වෙන්න වෙලා තියෙන්නේ. මොකද වසර ආරම්භ වෙන විටට ඔමික්‍රෝන් ආසාදිතයින් හමුවෙලා තියෙනවා. විශේෂයෙන්ම මේ වන විට එංගලන්තය, එක්සත් රාජධානිය , ඇමරිකාව වැනි රටවල් වල කොවිඩ් වයිරසය සීඝ්‍රයෙන් පැතිරලා. දකුණු ආසියානු රටවල් වෙත එවැනිම බලපෑමක් ඉදිරියේදී එල්ල කරයි. මොකද ඩෙල්ටා ප්‍රභේදය පැතිර ගිය අවස්ථාවේත් වුණේ මේ දේමයි.
- ප්‍රශ්නය – වයිරසයට සාර්ථකව මුහුණ දීම සදහා ඇති හොදම ක්‍රමය එන්නත ලබා ගැනීමද?
පිළිතුර – ඔව් . එන්නත් මාත්‍රා දෙකම ලබාගෙන ඇති පුද්ගලයින් බූස්ටර් එන්නත ලබා ගැනීමට කටයුතු කිරිමෙන් ඔමික්‍රෝන් වයිරසයට සාර්ථකව මුහුණ දීමට පුළුවන් වෙන බව පර්යේෂණයන්ගෙන් සොයාගෙන තිබෙනවා. ඒ නිසා සුදුසුකම් සපුරා ඇත්නම් බූස්ටර් එන්නත ලබා ගන්න.
වයස අවුරුදු 60ට වැඩිනම් අවදානම වැඩියි. දරුණු රෝග තත්තවයන් ඇතිවීමට තිබෙන ඉඩකඩ වැඩියි. මරණයට පත්වීමේ ඉඩකඩ වැඩියි. ඒ නිසා එන්නත් ගන්න.
- ප්‍රශ්නය – බූස්ටර් එන්නත ඔමික්‍රෝන් වයරසය සම්බන්ධයෙන් ක්‍රියාත්මක වන්නේ කෙසේද?
පිළිතුර – අපි විද්‍යාඥයින් විදිහට විද්‍යාත්මක දත්ත තමයි අධ්‍යනය කරන්නේ. මේ වන විට ඊශ්‍රයලයේ කරන ලද පර්යේෂණයන්ගෙන් හෙලිව තිබෙනවා බූස්ටර් මාත්‍රාව ලබාගත් පුද්ගලයින්ට ඔමික්‍රෝන් ප්‍රභේදයෙන් විශේෂ රැකවරණයක් ලැබෙන බව. නැවත කොවිඩ් 19 වයිරස් රෝගය වැලදීමේ හැකියාව අඩු වන බව. බූස්ටර් එකෙන් කරන්නේ ප්‍රතිදේහ වැඩිකර දීමක්. ඒ නිසා අනිවාර්යයෙන්ම තුනවන මාත්‍රාව ලබා ගැනීම හොඳයි.
- ප්‍රශ්නය – ඔමික්‍රෝන් ප්‍රභේදයේ බලපෑම කොයිවගේද?
පිළිතුර – දැනට දත්ත වාර්තාවන් අනුව තහවු කර තිබනවා රෝග ලක්ෂණ පෙන්වීමට දින දෙකකට කලින් තමයි වයිරසය පිටකරන්නේ . රෝග ලක්ෂණ පෙන්වා දින දෙක තුනක් යන විට වයිරස පිටවිම අවම වෙනවා.
ඔමික්‍රොන් ප්‍රභේදය ප්‍රතිශක්තියට ප්‍රතිරෝධීබවක් දක්වනවා. එනම් අපේ ප්‍රතිශක්තිය ලබා ගත හැකි ක්‍රම දෙකයි. රෝගය සෑදීමෙන් ලැබෙන ප්‍රතිශක්තිය. නැතිනම් එන්නත්කරණය මගින් ලැබෙන ප්‍රතිශක්තිය. මේ ක්‍රම දෙකෙන්ම ප්‍රතිශක්තිය ලබා ගත්තත් එය මගහැරීමේ අවස්ථාවක් තියෙනවා
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
ඩෙල්ටාවලට සාපේක්ෂව මෙයට ප්‍රතිශක්තිය මගහැරයාමේ හැකියාවක් තියනවා. ඔමික්‍රොන් හැදුන කෙනෙකුට ඉන් ලැබෙන ප්‍රතිශක්තියෙන් ඩෙල්ටා ආසාදනය විම මගහරයවා ගැනීමේ හැකියාවක් පවතින බව පර්යේෂණ වාර්තාවන්ගෙන් හෙළිව තිබෙනවා.