පිටකොටුව වෙනත් දේවල මෙන්ම විවිධාකාරයේ රූප ලාවන්‍ය නිෂ්පාදනවලද තොග වෙළෙඳාමේ මර්මස්ථානයයි. එහි ඇති රූපලාවන්‍ය නිෂ්පාදන සහ උපකරණ තොග පිටින් අලෙවි කෙරෙන වෙළෙඳසැල් ගණනාවක් පවතින අතර ඔවුන්ගෙන් භාණ්ඩ මිලදී ගන්නේ බොහෝවිට විට සිල්ලර ව්‍යාපාරයේ හෝ බෙදා හැරීමේ කටයුතුවල නිරත වන්නන් හෝ සැලෝන් පවත්වාගෙන යන අය සැලොන්වලට නිෂ්පාදන බෙදා හරින අයයි.
ඔවුන්ට මේ නිෂ්පාදනවල වෙළෙඳ නාම පවා හුරුය. පුරුදුය. මේ නිෂ්පාදන අතරේ වැඩියෙන් ම ජනප්‍රිය නිෂ්පාදන පෙළක් වන්නේ සම සුදු කිරීමේ ආලේපනයි. විශේෂයෙන් මෙම සම සුදු කිරීමේ ආලේපන වැඩිපුර ගල්වන්නේ තරුණියන්ය. එය සිදුවීම් පෙළක දිග හැරුමකි. ළඟදී විවාපත් වීමට සිටින තරුණියන් තම විවාහ නැකත බැලීමෙන් පසුව මුලින්ම කරන කාර්යයක් වන්නේ ඒ දවස තම සිත් ගත් රූපලාවන්‍ය ශිල්පියා හෝ ශිල්පිනියගේ හමුවීම් වෙන් කර ගැනීමය.. ඔවුන්ගෙන් ඇඟ පත හදා ගැනීමේ සිට සමේ පැහැය ගැනද විවධ උපදෙස් ලැබෙයි. “නංගි ටිකක් හම සුදු වුණානම් හරි. අහවල් වයිට්නින් ක්‍රීම් එක පාවිච්චි කරන්න. කඩේ නැත්නම් ඔයා ෆේෂල් එකක් දාන්න එන දවසට මම දෙන්නම්.“
අමුතු වයිට්නින් ක්‍රීම්
මෙය බොහෝ විය සිදුවන දෙයකි. මෙලෙස කඩෙන් සොයා ගන්න බැරි අමුතු ආකාරයේ සන්නාමවලින් ඇති වයිට්නින් ක්‍රීම් අපේ තරුණ තරුණයියන් අතට පත්වන්නේ ඒ අනුවය. එහෙත් මෙහි පවතින භයානකකම වන්නේ කිසිදු ප්‍රමිතියකින් තොරව විවිධ විෂ සහිත බැර ලෝහ සහිත මෙම වයිට්නින් ක්‍රිම් මෙරට වෙළෙඳපොලට හොර රහසේ පැමිණීමය.
පසුගියදා පොලිසියේ විශේෂ විමර්ශන කණ්ඩායමක් සහ පරිභෝගික කටයුතු පිළිබඳ අධිකාරියේ නිලධාරීන් කණ්ඩායමක් එක්ව පිටකොටුව් කූට තොග ව්‍යාපාරිකයන් විසින් මෙරට විකිණීම සඳහා ගෙන්වා තිබූ එවැනි සම සුදු කිරීමේ ක්‍රීම් වර්ග ඇතුළු ප්‍රමිතියකින් තොර රූපලාවණ්‍ය නිෂ්පාදන තොගයක් සමග එම ජාවාරම සිදු කළ ව්‍යාපාරිකයන් වැටලුවේය.
මෙරට ක්‍රියාත්මක වන ඖෂධ සහ සුවඳ විලවුන් පනත අනුව මෙම රූපලාවණ්‍ය නිෂ්පාදන පිළිබඳව තත්ත්ව සහතිකයක් ලබා ගැනීම අත්‍යවශ්‍ය කරුණකි. එහෙත් ගෑවොත් ටක්කටෙම සුදු වෙන මෙම ක්‍රිම්වර්ගවලට එවැනි නිල ලියාපදිංචියක් හෝ මෙරට අලෙවි කිරීමට හෝ භාවිතය සඳහා කිසිදු අවසරයක් නැත.
ගෙනත් තිබුණෙ පකිස්ථානයෙන්
පිටකොටුවේ සිදු කරන ලද වැටලීමේදී අත්අඩංගුවට ගත් මෙම සම සුදු කිරීමේ ආලේපන සියල්ලම මෙරටට ගෙනවිත් තිබුණේ පාකිස්ථානයෙනි. ඒවා ගෙනවිත් තිබුණේ මෙරට වෙළෙඳ ප්‍රදර්ශනයකට ඉදිරිපත් කරන බව පවසමිනි. මෙම සම සුදු කිරීමේ ආලේපන අතර රසදිය, ආසනික් කැඩ්මියම් වැනි විෂ සහිත බැර ලෝහ අන්තර්ගත බවත් ඒවා පිළිකා ජනක මෙන්ම තවත් අර්බුද ගණනාවක් නිර්මාණය කරවන ආලේපන බවත් පාරිභෝගික අධිකාරිය සඳහන් කළේය. මෙම පුද්ගලයන් සමඟ භාණ්ඩ අත්අඩංගුවට ගෙන නීතිය හමුවට ඉදිරිපත් කළද ඔවුන් අදාල දඩය හෝ දඬුවම විඳීමෙන් පසුව යළිත් කරන්නේ මේ ව්‍යාපාරයමය.
හම සුදු වන්නේ කෙසේ ද?
කාර්මික තාක්ෂණ ආයතනයේ ප්‍රධාන ශාකසාර නිෂ්පාදන පිළිබඳ පර්යේෂණ විද්‍යාඥයකු වන ආචාර්ය ටී.ඩී එම්.සීකේ විජේවර්ධන පවසන්නේ සම සුදු කිරීමේ ආලේපනවල ඊට බලපාන ප්‍රධානතම සංඝටකය වන්නේ රසදිය බවයි. එහෙත් එය සම්මත අගයයන්ට අනුව තිබිය යුත්තේ මෙම ආලේපන කිලෝ ග්‍රෑම් එකකටය මිලි ග්‍රෑම් 1කි. එහෙත් ඉක්මනින් අත්දුටු ප්‍රතිඵල දෙනවා යයි කියන මෙම වයිට්නින් ක්‍රීම් ඇතැම් වර්ගවල එම සම්මත අගය මෙන් නව දහස් (කිලෝ ග්‍රෑම් එකක මිලි ග්‍රෑම් 9000ක්) ගුණයක්ද පැවැති අවස්ථා පර්යේෂකයන් විසින් හඳුනාගනු ලැබ ඇත. මෙම අගය කිලෝ ග්‍රෑමයට මිලි ග්‍රෑම් පහක් 10ක් තරම් වීම පවා සෞඛ්‍යයට අහිතකර බවට පිළිගැනුණද මෙලෙස මිලිග්‍රෑරම් දහස් ගණනින් හමුවීම කෙතරම් අනාරක්ෂිත තත්ත්වයකදැයි වටහා ගැනීම අපහසු නැත. ඒවා භාවිතය සමට මෙන්ම සමස්ත සෞඛ්‍යයටම දැඩි සේ අහිතකරය.
බොහෝ විට මෙම අත්දුටු සම සුදු කිරීමේ ක්‍රීම් එන්නේ ඉන්දියාවෙන්, පාකිස්ථානයෙන් බංග්ලාදේශයෙන් හෝ තායිලන්තයෙනි. මෙම රටවල ඇතැම් විට කුඩා පරිමාණයේ ගෘහ නිෂ්පාදන ලෙසින් පවා මේවා සැකසෙන අතර ඒවායේ නිෂ්පාදන ප්‍රමිතිය පවතින්නේ ඉතා අවම මට්ටමකටය.
වයිට්නින් ක්‍රිම්වලට අමතරව මෙසේ වෙළෙඳපොලට එන තවත් නිෂ්පාදනවලද ඊයම්, ආසනික් කැඩ්මියම් වැනි බැර ලෝහ පවතින බව හඳුනාගෙන තිබේ. විශේෂයෙන් මේක් අප් බාම්, ක්ලෙන්සින් ක්‍රිම්, මොයිචරයිස් ක්‍රිම් සහ සන්ස්ක්‍රින් ක්‍රීම් මෙන්ම ලෝෂන් වර්ගවලද එම බැර ලෝහ නියමිත අගයය්ට වඩා වැඩි වන අවස්ථා ඇත. මෙම තත්ත්වයෙන් බේරීමට නම් වෛද්‍යවරුන් දෙන පළමු උපදෙස වන්නේ පිරිසිදු සිතින් යුතුව තමන්ට ලැබුණු ශරීර වර්ණය පිළිබඳව සෑහීමකට පත්ව ක්‍රියා කිරීමය. මෙවැනි රූපලාවන්‍ය නිෂ්පාදන භාවිත කරනවා නම් ඒවා GMP (Good Manufacturing Practises) නිෂ්පාදන ක්‍රමවේදවලට අනුගතව නිපදවා ඇතිද යන්න තහවුරු කර ගත යුතුය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
කෙසේ වුවද පාරිභෝගික අධිකාරිය පවසන්නේ විශේෂයෙන් රූපලාවණ්‍යාගාරවලදී ඔබේ අවසරයකින් ඇතිව සහ නැතිව ගල්වන ආලේපන පිළිබඳව විමසිලිමත් වන ලෙසය. ඊට හේතුව මෙම වංචනිකයන් තම නිෂ්පාදන වැඩි හරියක් රට පුරා පවතින සැලුන්වලට මුදා හරින නිසාය.