ජ්‍යෙෂ්ඨ මනෝ උපදේශිකා
එෂාමා කාරියකරවන –
ආදරණීය විදුහල්පතිවරුන්, ගුරුවරුන් ගෙන් , පාසල් බලධාරීන්ගෙන් කරන්නට ඉතාම කාරුණික ඉල්ලීමක් මාහට ඇත.
පසුගිය කාලයේ පාසල් දරුවන් සහ දෙමව්පියන් හට උපදේශනාත්මක පසුබිමක් සහිත දේශන කරන්නට අවස්ථාව මට උදාවිය.
ඔවුන්ගේ දුක්ගැනවිලි රාශියක් ඔවුහු මා වෙත ඉදිරිපත් කළහ. ඒවායින් 90% ක් පාසල් මට්ටමින් ඉතා පහසුවෙන් විසඳිය හැකි දේ බව මාහට තේරුම් ගිය බැවින් මෙය ලියමි.
පාසල් පොත් උපකරණ ඉතා මිල අධික කාලයකි. එමනිසා පාසල් බලධාරීන්ට පහත දැක්වෙන කරුණු ගැන සානුකම්පිතව බැලිය හැකි නම් මව්පියන්ට විශාල අස්වැසිල්ලකි.
- පොත් ලයිස්තුව පාසලෙන්ම අනිවාර්යයෙන් ගතයුතු බව විදුහල්පතිවරුන් කරන බලකිරීම නැවැත්වීම.
මන්ද යත්. සමහර පවුල්වල දරුවන්ට තෑගි සහ පරිත්‍යාග ලෙස පොත් පත් ලැබෙන බැවිණි. ඔවුන්ට ඒවා ප්‍රයෝජනයට ගත හැකිය. සමහර පාසල් මෙසේ බලකරන බව දනිමි - කවර දැමීමට අසවල් වර්ණ කඩදාසි භාවිතා කළ යුතුය. පාසල් ලොගෝව සහිතව මුල්පිටුවේ නම , පංතිය, නිවාසය සඳහන් මුද්‍රිත නේම් ටැග් ඇලවිය යුතුය යන නීතිය ඉවත් කිරීම. දරුවන්ට හැකි දෙයකින් කවර දමා පිරිසිදුව පොතපත පාවිච්චියට උපදෙස් දීම. මා කුඩා කළ මගේ පංතියේ සිටි යෙහෙළියක් පොත්වලට කවර දැමුවේ පත්තර කඩදාසි සහ කැලැන්ඩර කොළ වලිනි. අද ඇය කැනඩාවේ ජ්‍යෙෂ්ඨ මහාචාර්යතුමියකි. කවරය ඇයගේ අධ්‍යාපනයට වැදගත් වූයේ නැත
- විෂය ලිවීම සඳහා CR පොත්, 200 pages පොත් ඉල්ලා නොසිටිම. සටහන් ලිවිය හැකි ඕනෑම අභ්‍යාස පොතක් භාවිතයට අවසර දීම. නිවසේ දරුවන් දෙදෙනෙකු සිටී නම් එම වියදම කෙසේ දරන්නද? අනෙක අඩු බර පොත්පත් දරුවාගේ පාසල් බෑගයේ බර අඩුකිරීම දරුවාට කෙතරම් සහනයක්ද?
- සාමූහිකත්වය, බෙදාහදා ගැනීමත්, සම්පත් නාස්තියත් වළක්වාලීමටත් මව්පියන්ගේ පසුම්බියටත් පහසු වනු පිණිස පාට පෙට්ටි, ක්ලේ, මැටි, සෙලෝ ටේප්, ගම්, විවිධ ඇට වර්ග, කඩදාසි වර්ග, සායම් තැවරූ පොල්කුඩු, රිබන් ආදිය පංතියටම සෑහෙන ප්‍රමාණය පමණක් ගැනීමට අවශ්‍ය වියදම මව්පියන් ගෙන් එකතු කිරීම. සමහර පාසල්වල සෙලෝ ටේප් , රිබන්, වැනි දේවල් එක ළමයාට එක බැගින් ඉල්ලන බව මව්පියන් කියති. එසේ ඉල්ලා සිටින ගුරුවරුද සිටිති. අඟල් එකක පළල සෙලෝ ටේප් ලොකු ප්‍රමාණයේ එක බැගින් පංතියේ ළමුන්ට රැගෙන එන්න කියූ ගුරුවරයෙක් ගැන මව්වරු මට කීහ.
- විවිධ දේවල් සඳහා රූප කොළ , රැගෙන එන්න නොකියා ඒවා දරුවන්ට අඳින්නට උපදෙස් දෙන්න. අපි පොඩි කාලේ සියලු විද්‍යාඥයින්ගේ, ජාතික වීරයින්ගේ, ශාක පත්‍රයන්ගේ රූප අපිම ඇන්ඳෙමු. දරුවන්ගේ කුසලතා වර්ධනයට එය ඉවහල් වනු ඇත.
- පංති කාමරය පවිත්‍ර කිරීම , තීන්ත ගෑම මේ වසරේ නොකරන්න. ලොකු පංතිවල ළමුන්ගේ මව්පියන් නොකැඳවා දරුවන් ලවා ඒවා කරවාගන්න
- පාසලේ ආපනශාලාවේ දරුවන්ට ගුණදායක නොවූ ආහාර පාන විකිණීමෙන් වළකින්න
- වට්සැප් ගෘප් වලට පණිවුඩ නොදමා කොවිඩ් සමයට පෙර මෙන් ගෙදර වැඩ පණිවිඩ පොත නැවත භාවිතයට ගන්න. ජංගම දුරකථනයට ගොදුරුවූ දරුවන් බේරා ගැනීමට මේ පියවර ඉතා වැදගත් බව සලකන්න
ජීවිතේ කම්කටොළු ඇති කාලයක, රටක් ආර්ථික ආගාධයකට වැටී ඇති කාලයක ඔබට කළ හැකි දෙයකින් මව්පිය දරුවන්ට සහනයක් දෙන්න.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
ස්තුතියි