වෛද්‍ය, නීතිඥ පාලිත බණ්ඩාර සුබසිංහ –
කොවිඩ් 19 වසංගතය මේ වනවිට අපේ රටේ මැනවින් පාලනය කොට ඇති බවට සමාජයට ඒත්තු ගන්වන ආකාරයට සියලු හැසිරීම් පෙළ ගැසී ඇත. පොලිස් නීති කොට්ඨාශය භාර නියෝජ්‍ය පොලිස්පති අජිත් රෝහණට අනුව නම් සියලුම “කොවිඩ් පොකුරු” මේ වන විට අක්‍රිය කර හමාරය. සමාජයට පැතිරීමක් නොමැත. නමුත් වැලිසර නාවික හමුදා කඳවුරේ “කොවිඩ් පොකුර” පමණක් ක්‍රියාකාරීව තිබේ. ඊයේ බත්තරමුල්ලේ රණවිරු ස්මාරකය අභියස පැවැත්වීමට නියමිතව තිබූ රණ විරු උළෙල සැලසුම් සහතග ලෙස පවත්වා ගැනීමට නොහැකි වූ ප්‍රධානම කාරණාව වූයේ එතෙක් පුහුණු වීම් කටයුතු වලට පැමිණි නාවික හමුදා සෙබලුන් දෙදෙනෙක් කොවිඩ් ආසාදිතයන් බවට තහවුරු වීමය. රණ විරු උළෙලේ සැලසුම් අවුල් සහතග වූවා සේම පොලිසියේ 122 හා නාවික හමුදාවේ විශාල සංඛ්‍යාවක් නිරෝධායනයට යොමු කිරීමට සිදුවිය.
මේ වනවිට රට තුළින් හමු වී ඇති කොවිඩ් ආසාදිතයන්ගෙන් සියයට 50 ක් නාවික හමුදා සාමාජිකයන්ය. මේ පවතින තත්වය පිළිබඳව කෙරෙන විමසුමකි.
පසුගිය 17 දා මෙරටින් කොවිඩ් 19 ආසාදිතයින් 21 දෙනෙකු හඳුනා ගැනුණා. ඉන් 19 දෙනෙකුම නාවික හමුදා සමාජිකයින් වනවා.
නාවික සෙබලුන්ට රෝගය බෝවුනේ අප්‍රේල් 8වෙනිදා හෝ ඒ ආසන්න දිනක ජා ඇල සුදුවැල්ල ප්‍රදේශයේ මත්ලෝලී පුද්ගලයන් කිහිපදෙනෙක් අල්ලාගැනීමට උත්සාහ කිරීමේදී බවයි කියවෙන්නේ. එසේ ආසාදනයවූ අයෙකුගෙන් අප්‍රේල් 22 දින රෝග ලක්ෂණ මතුවී කොරෝනා ආසාදිතයෙකු බවට පරීක්ෂණ මගින් තහවුරු වූ වහාම වැලිසර නාවික හමුදා කඳවුර නිරෝධායන මධ්‍යස්ථානයක් බවට පත්කොට නිවාඩු ලබාගිය සෙබලුන්ද වහාම එහි කැඳවනු ලැබුවා.
අප දන්නා පරිදි ලෝකයේ ඉතාමත්ම විනයගරුක හමුදාවක් ලෙස පවසන ශ්‍රී ලංකාවේ නාවික හමුදාව නිරෝධායන නීති සහ සෞඛ්‍ය උපදෙස් එලෙසින්ම පිළිපදිනු නිසැකයි. නොඑසේ නම් සාමාන්‍ය ජනතාවගෙන් එවන් හැසිරීමක් කෙසේවත් බලාපොරොත්තු වන්න බැහැ. එවිට මහජනයා අතර “කොවිඩ් පොකුරු” සෑදෙන විට ඒ අයගේ වගකීම් විරහිත නොසැලකිළිමත් හැසිරීම ලෙසින් චෝදනා කරන වගකිවයුත්තන්, නාවික කඳවුර තුළ රෝගය පැතිරයාමේදී ඔවුන් එය දකින්නේ වෙනත් ආකාරයකින්.
වැලිසර නාවික කඳවුරෙන් දිනපතා අඛන්ඩව රෝගීන්..
අප්‍රේල් 22 සිට නාවික කඳවුර නිරෝධායන කඳවුරක් කළේ නම්, එතුළ රෝගය බෝවීමේ අවසානය ආරමභ වන්නේ එදිනයි. ඒත් එතැන් සිට අද දක්වා දින 26 ක් ගත වී තිබෙනවා. අප්‍රේල් 22 දින රෝග කාරකය ආසාදනය වුවෙකුට වුවත් ඉන් දින 14ක් ඇතුළත එනම් මැයි මස 06 දින වන විට රෝග ලක්ෂණ මතුවිය යුතු වනවා. උපරිම වුනොත් දින 21 ක් එනම් මැයි 13 වන විට හෝ ඔවුන්ගෙන් රෝග ලක්ෂණ මතුවිය යුතු වනවා. මුලින් දින 14 ක් ව තිබූ, පසුව දින 21ක් දක්වා දිගුකරනු ලැබූ නිරෝධායනයේ පදනම වන්නේද මෙයයි.
නමුත් ගැටලුව වන්නේ එම එම කාල පරාසයන් පසුවී තිබුණත් තවදුරටත් වැලිසර නාවික කඳවුරෙන් දිනපතා අඛන්ඩව රෝගීන් වාර්තාවීමයි.
නිවාඩු ගොස් පැමිණි සෙබලුන්ගෙන් අනෙක් අයට රෝගය බෝවීමට ඇති හැකියාව ඉතා අඩු වන්නේ, එසේවූවේ නම් ඔවුන්ගේ නිවසේ සාමාජිකයන්ට ද රෝගය ආසාදනය වී ඔවුන් ද රෝගීන් ලෙස හඳුනාගත තිබිය යුතු වීමයි.
එසේනම් විය හැකි වන්නේ නාවික කඳවුර තුළින්ම මෙය පැතිරයමින් පැවතීමයි. එය එසේනම් ඒ සඳහා නාවික හමුදා වෛද්‍ය බලකාය ඇතුලු නාවික හමුදා බලධාරීන් වගකිව යුතු වනවා. කඳවුර තුළට සියලුම නාවික සෙබලුන් කැඳවා, ඉන් පිටතට යා නොදී රඳවාගෙන, රෝගයට ගොදුරුවීමට අවකාශ සැලසීමක් සිදුවන්නේ නම් එය දැන දැනම එම සෙබලුන්ගේ ජීවිත අනතුරට ලක්කිරීමක් වනවා. එය දන්ඩ නීති සංග්‍රහය අනුවත් දඬුවම් ලැබිය හැකි වරදක්.
සෙබලුන් තරුණ සහ ශක්තිමත් අය නිසා රෝගයට ගොදුරු වී එයට ප්‍රතිශක්තිය ඇතිවේ යයි සිතාගෙන එලෙස රෝගය පැතිරීමට ඉඩදෙන්නේ නම්, අතීතයේ වසංගත රෝග මර්දනය කළ ක්‍රමවේදය නාවික කඳවුර තුළ ක්‍රියාත්මක කිරීමක් වෙනවා. එය එසේනම් ආණ්ඩුක්‍රම ව්‍යවස්ථාවේ දක්වා ඇති මූලික අයිතිවාසිකම් උල්ලංඝනය කිරීමක් ද වනවා.
සමහරවිට නාවික කඳවුර තුල භාවිතා කරනවා යැයි ප්‍රචාරය කරන “හෙල ඔසු” දුම් හට්ටි, කැඳ හැලි සහ වෙනත් “ඖෂධීය පානයන්” මෙන්ම විවිධ පුද්ගලයන්ගේ බෙහෙත් වට්ටෝරු, යම් හෙයකින් එතුළ සත්‍ය වශයෙන්ම භාවිතා කරන්නේ නම් ඒවා නිසාද මෙම තත්වය ඇතිවීමේ හැකියාව තියෙනවා. එසේ වන්නේ එම දේවල් වලට රෝගයේ බීජෞෂණ කාලය එනම් රෝගය ආසාදනය වී රෝග ලක්ෂණ මතුවීමට ගතවන කාලය දිගුවීමේ හැකියාවක් තිබිය හැකි වීමයි.
පැතිරෙන්නේ ප්‍රමාණවත් ඉඩක් නැති නිසා ද
නාවික කඳවුර තුළ නිරෝධායනය සඳහා ප්‍රමාණවත් ඉඩක් නොමැති නිසා රෝගය පැතිරෙන්නේ නම් එහි වගකීම අදාල නාවික බලධාරීන් විසින් භාරගත යුතු වනවා. එසේ වූවේ නම් සෙබලුන්ගේ ජීවිත අනතුරේ නොදා පරීක්ෂණ සිදුකොට නිරෝගී පුද්ගලයන් නිවෙස් වලට යැවීමට හෝ වෙනත් නාවික කඳවුරු වලට යැවීමට පියවර ගත හැකිව තිබුණා. නොඑසේ නම් වෙනත් ස්ථානයක රඳවා තැබීමට තිබුණා.
දිනෙන් දින අලුතින් රෝගය කඳවුර තුළ පැතිරයාමට හේතූන් සොයා වහාම එය නවතාගැනීමට කටයුතු කළ යුතු වනවා. රාජ්‍ය බුද්ධිඅංශ ප්‍රධානියා මීට දින කිහිපයකට කලින් ජන මාධ්‍යට ප්‍රකා ප්‍රකාශ කළේ ඇතිවන ඕනෑම “කොවිඩ් පොකුරක්” සුනු විසුනු කර “සීරෝ” කිරීම තමන්ට ඉතා සුලු දෙයක් බවයි. එසේ නම් මේ එයට සුදුසු වේලාව නොවේද? ඇයි තවම නොකර ඉන්නේ?
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
ඉන්දීය සාගරයේ විශාලතම “කොරෝනා පොකුර” බවට පත්ව ඇති වැලිසර නාවික හමුදා කඳවුර වෙත දැඩි සහ ඉක්මන් අවධානය යොමු කොට නාවික සෙබලුන් රෝගයට ගොදුරුවීම වහාම වලක්වාලීමට පියවර ගතයුතු වනවා