මුස්ලිම් කිව්වත් අරාබි කිව්වත් මැලේ කිව්වත් ඒ වචන ටික ඇ‍හෙද්දිම මතක් වෙන්‍‍නේ එක්‍‍කො වටලප්පම්… නැත්නම් බිරියානි. හැබැයි ඉතින් අපි නොදන්නව වුණාට මේ මුස්ලිම්වරු අතරේ ජනප්‍රිය කෑම ගොඩක් ති‍යෙනවා. අද අපි කියලා දෙන්‍‍නේ ඔවුන්ට ආවේනික, ඒ නිවෙස්‌වල නිතර සැකසෙන හෝ උත්සව අවස්‌ථාහිදී සාදා ගන්නා සාම්ප්‍රදායික කෑම වර්ග කිහිපයක්.
1. නෝම්බු කන්ජි
කන්ජි කියන්‍‍නේ කැඳවලට. මේ කැඳ වර්ගය මුස්ලිම්වරු හදා ගන්නේ නෝම්බි කාලෙට එ‍හෙම නැත්නම් නිරාහාරව ගත කරන වකවානු‍වේදි.
අවශ්‍ය ද්‍රව්‍ය
- සම්බා හාල් කෝප්ප 1/2
පියලි කරගත් මුං ඇට කෝප්ප 1/2
ඔලිව් තෙල් මේස හැඳි 2
කුරුඳු පොතු/ එනසාල්/ කරාබුනැටි
සූදුරු පින්ච් එකක්
සුදුලූනූ බික් 2
කපාගත් ලූනූ ගෙඩියක්
කපාගත් තක්කාලි ගෙඩියක්
අමුමිරිස් කරල් 2
කලා ගත් මින්චි කොළ හා කොත්තමල්ලි කොළ ටිකක්
කටු ඉවත් කර අඹරා ගත් එළුමස් ග්‍රෑම් 100
වතුර කෝප්ප 5
මිටිකිරි කෝප්ප 1/2
ලුණු
පළමුව හාල් සහ මුං ටික විනාඩි 10ක් පමණ පෙඟෙන්න තබන්න. රත් වූ තෙල සහිත බඳුනකට කුරුඳු පොතු, එනසාල්, කරාබුනැටි හා සුදු ලූනූ දමා බැද ගන්න. ලූනූ, තක්කාලි හා අමුමිරිස්, මින්චි කොළ හා කොත්තමල්ලි කොළ දාගන්න ද දැන එයට එකතු කර මිශ්‍ර කරගන්න. හොඳින් තෙම්පරාදු වූ පසු එළුමස් එක් කර කලවම් කරගන්න. දැන් පෙඟෙන්න දැමූ හාල් සහ මුං ටික එයට එක් කර වතුර කෝප්ප 5ක් දමා බාජනය වසා පි‍සෙන්න හරින්න. විනාඩි 20කටපසු පියන හැර මිටිකිරි හා ලුණු දමා ගන්න. කැඳ ගතිය මදිනම් තවත් වතුර එකතු කරගන්න් පුළුවන්. හොඳින් උකු වූ පසු ලි‍පෙන් බා ගන්න.
2. මල් ගෝවා මැල්ලුම
මල් ගෝවා (Cauliflower)කියන්‍‍නේ මැලේවරුන්ගේ ආහාර විශේෂයක්‌. ඉතින් මැලේ ගෘහණියන් අතින් නිතර දෙ‍වේ‍ලේ සැකසෙන කෑම වට්‍ටෝරුවක් තමයි මල් ගෝවා මැල්ලුම කියන්‍‍නේ.
අවශ්‍ය ද්‍රව්‍ය
- පෙති කැපූ මල් ගෝවා ග්‍රෑම් 150 ක්
කැබැලි කපා ගත් ලොකු ලූනු ගෙඩි 1/2 ක්
සිහින්ව කැපූ අමු මිරිස් කරලක්
වියළි මිරිස් කැබලි තේ හැඳි 1/2 ක්
අබ ඇට තේ හැඳි 1/4 ක්
හොඳින් අඹරා ගත් උම්බලකඩ හෝ වියළි ඉස්‌සන් කැබලි තේ හැඳි 1/2 ක්
පොඩි කර ගත් දුරු තේ හැඳි 1/4 ක්
දුරු ඇට තේ හැන්ඳක්
පෙති කැපූ සුදු ලූනු බික් 02 ක්
කහ මේස හැඳි 1/4 ක්
දෙහි යුෂ තේ හැඳි 1/4 ක්
කරපිංචා කොළ 6-8 ක් පමණ
සිහින්ව ගා ගත් පොල් කෝප්ප 1/2 ක්
වතුර කෝප්ප 1/4 ක්
ගම්මිරිස් සහ ලුණු ස්වල්පයක්
තෙල් ස්වල්පයක්
සුදු ලූණු , කරපිංචා, ලුණු, අමු මිරිස්, අබ ඇට, දුරු, වියළි මිරිස් තෙලට දමා රන්වන් පැහැවන තෙක් බැදගන්න. ඉන්පසු එයට උම්බලකඩ හෝ වියළි ඉස්‌සන් කුඩු සහ කහ එකතු කරන්න. මල් ගෝවා, දුරු වර්ග ද එක් කරන්න. බැද ගන්නා ලද පොල් ද එකී මිශ්‍රණයට එකතු කරගන්න. දැන් මිශ්‍රණය සුදුසු බඳුනකට දමා වතුර එක්‌කොට පියනකින් බඳුන වසා මිශ්‍රණය මෙළෙක්‌ වන තෙක් තත්පර කීපයක්‌ ලිප මත තිබෙන්නට හරින්න. පසුව ගම්මිරිස් සහ ලුණු එක්‌කොට දෙහි යුෂ ස්වල්පයක් ද පිස ආහාරයට ගන්න.
3. බීෆ් කබ්සා
මැලේ කෑම කිව්‍වොත් මතක් වෙන්‍නෙම බුරියානි නේ… මේ කියන්න යන්නෙත් බුරියානි හදන විදිහ ගැන නම් නෙ‍වෙයි. ඒ වගේ තවත් රසවත් බත් වර්ගයක් ගැන
අවශ්‍ය ද්‍රව්‍ය
- බාස්මතී හාල් කෝප්ප 3
තලා ගත් ලූනූ ගෙඩි
තලා ගත් සුදුලූනූ
කුරුඳු කොළ 3
කරදමුංගු 3-4
කුරුඳු පොතු කෑලි 2
සුදු ගම්මිරිස් තේ හැන්ඳක්
දෙහි ඇඹුල් මේස හැන්ඳක්
තක්කාලි පියුරි කෝප්ප 2
කෑලි කපාගත් බීෆ් ග්‍රෑම් 500 ලුණු
සෝදා ගත් හාල් වතුරෙ විනාඩි 15ක් පෙඟෙන්න තබන්න. බත උයාගන්න ප්‍රමාණවත් භාජනයකට තෙල් දමා ලූණු ටික රන්වන් පැහැ ගැන්‍නෙව තෙක් බැඳගන්න. ලූනූ බැඳි ගෙන එන විට එයට මස් කැබැලි එකතු කරන්න. සුදු ලූණු, කුරුඳු කොළ, කරදමුංගු, කුරුඳු පොතු, දෙහි ඇඹුල්, සුදු ගම්මිරිස් හා තක්කාලි පියුරි ද එක් කරගන්න. දැන් රස අනුව ලුණු ද වතුර කෝප්පයක් ද එක්කර විනාඩි 25ක් පමණ මද ගින්දරේ පිසගන්න. ඉන්පසු තවත් වතුර කෝප්ප බාගයක් වගේ එක් කර හාල් ටික දමා බත පිසගන්න
4. නිවිති කොළ බැඳුම (Stirfry Spinach)
අවශ්‍ය ද්‍රව්‍ය
- නිවිති මිටි 01ක්
පෙති කපා ගත් ලොකු ලූනු ගෙඩි 1/2
කපා ගත් අමු මිරිස් කරල් 1/2 ක්
පෙති කපා ගත් තක්කාලි ගෙඩි 1/2 ක්
පොඩි කරගත් වියළි මිරිස් තේ හැඳි 1/2 ක්
අබ ඇට තේ හැඳි 1/4 ක්
උම්බලකඩ කැබලි මේස හැන්ඳක්
කහ කඩු මේස හැඳි 1/4ක්
රස ගැන්වීම පිණිස ලුණු ස්වල්පයක්
තෙල් ස්වල්පයක්
වතුර කෝප්ප 1/4 ක් (අවශ්‍ය නම්)
නිවිති මිටි‍යේ කොළ සහ මෙලෙක්‌ දඬු කැබැලි කර හොඳින් සෝදා පිරිසුදු කර ගන්න. ලොකු ලූනු, අමු මිරිස්, තක්කාලි, කහ, අබ ඇට සහ උම්බලකඩ තෙලෙහි දමා රන්වන් පැහැ ගැන්වෙන තෙක් බැදගන්න. දැන් කැබලි කරගත් නිවිති එක්‌කරන්න. ලුණු ස්වල්පයක් ද එක් කොට මද වේලාවක්‌ ලිපේ තබන්න. නිවිති කොළ වල පැහැය වෙනස් වීමට පෙර ලි‍පෙන් බා ගත යුතුය. යම් හෙයිකින් ව්‍යංජනය වියළි ස්‌වභාවයක්‌ ගන්නේ නම් පමණක්‌ වතුර කෝප්ප 1/4 ක ප්‍රමාණය එකතු කර ගන්න. අර අපි කලින් හදපු ගෝවා මැල්ලුමයි, බීෆ් කබ්සා එක්කයි මේ හදපු නිවිති කොල බැදුම කදිමට ගැල‍පෙනවා.
5. ගෝවා ව‍ඩේ
අවශ්‍ය ද්‍රව්‍ය
- කපා ගත් ගෝවා කෝප්ප 2
කඩල පරිප්පු ¾
තෝර පරිප්පු ¼
උලුඳු ¼
සිහින්ව කැපූ මිරිස් කරලක්
කොත්තමල්ලි තේ හැදි 2 ක්
කරපිංචා කොළ 4-5 ක්
බේකිං සෝඩා ස්වල්පයක්
තුනපහ තේ හැන්දක්
ලුණු ස්වල්පයක්
තෙල් ස්වල්පයක්
විනාකිරි ස්වල්පයක්
දුරු තේ හැඳි 1/2
ජලය වතුර කෝප්පයක්
පළමුව, භාජනයකට කඩල පරිප්පු, තෝර පරිප්පු, උලුඳු ඇට දමා පැය 2 ක් පමණ ජලයේ පොඟවා ගන්න. හොඳින් පෙඟුණු පසු වතුර සම්පූර්ණයෙන්ම ඉවත් කර තවත් විනාඩි 10 ක් පමණ තබන්න. දැන් ඒ සියල්ල බ්‍ලෙන්ඩරයකට දමා වතුර එකතු නොකර අ‍තේ නොඇ‍ලෙන තරමට මිශ්රණයක් සකසා ගන්න. එම මිශ්‍රණය බඳුනකට දමා එයට බේකින් සොඩා කලවම් කරන්න. දැන් ගෝවා, මිරිස්, කොත්තමල්ලි, කරපිංචා කොළ, දුරු, තුනපහ, විනාකිරි සහ ලුණු එක් කර හොඳින් මිශ්‍ර කර හොඳින් මිශ්‍ර කරන්න. මිශ්රණයේ දියර ගතිය වැඩි වූ‍වොත් සහල් පිටි තේ හැඳි 2 ක් එකතු කර මෘදු පිටි ගුලියක් සාදන්න. දැන් එයින් කුඩා පිටි ගුලි කඩා ගෙන එයට තෙල් ආලේප කර අල්‍ලේ තබා සමතලා කරගන්න. දැන් එය ගැඹුරු තෙ‍‍ලේ රන්වන් පැහැයක් ගන්නා බැද ගන්න.
6. ඔරොට්ටි
අවශ්‍ය ද්‍රව්‍ය
- බැදගත් හාල්පිටි කෝප්ප 2
ගාගත් පොල් කෝප්ප 3/4
බේකින් සෝඩා සුවල්පයක්
ඔලිව් තෙල් ස්වල්පයක්
ලුණු
හාල්පිටිවලට පොල් එකතු කර ලුණු රස අනුව දමා කලවම් කරගන්න. එයට උණු වතුර ටික ටික එකතු කරමින් ඩෝ එක සාදා ගන්න. සාදා ගත් ඩෝ එක පැය 1/2ක් පමණ හොඳින් වසා තබා ගෙන. ඊට පස්සෙත් තව ටිකක් හොඳට අනලා තෙල් ගාගත් තැටියකට තුනී කරලා, රොටිය පුච්චගන්න.
7. බීට් හුම්මස්
අවශ්‍ය ද්‍රව්‍ය
- තම්බා වතුර ඉවත් කර වේලා ගත් කඩල කෝප්ප 1/4
රෝස්ට් කර පොඩි කර ත් ගත් බීට් ගෙඩියක්
තල පේස්ට් තේ හැඳි 1/4
තල ඇට ස්වල්පයක්
ඔලිව් තෙල් කෝප්ප 1/4
තලා ගත් කරාබු නැට්ටක්
තලා ගත් සුදුළූණු බික් 2 ක්
ලෙමන් යුෂ කෝප්ප 1/3
දුරු තේ හැන්ඳක්
ලුණු ස්වල්පයක්
කළු ගම්මිරිස් කුඩු ස්වල්පයක්
කරපිංචා , කොත්මල්ලි, මිංචි කොළ කිහිපයක්
කඩල, බීට්, තල පේස්ට්, ඔලිව් තෙල්, සුදු ළූණු, ලුණු, ගම්මිරිස්, කරාබු නැට්ටක්, දුරු, කරපිංචා, කොත්මල්ලි, මිංචි කොළ සහ ලෙමන් යුෂ බ්ලෙන්ඩරයට දමා විනාඩි 5ක් පමණ තරමක් දියාරු මිශ්රණයක් සකසා ගන්න. බ්ලෙන්ඩරයට දැමූ සියල්ල කෑලි නොහැ‍පෙන සේ හොඳින් තලපයක් සේ විය යුතුය. පසුව එම මිශ්‍රණය බඳුනකට දමා ඔලිව් තෙල් බින්දු කිහිපයක් උඩින් දමා පිළිගන්වන්න. අපි කලින් හදන්න කියලා දුනුනු රොටි වර්ගයක් මේ හුම්මස් එක්ක් තවරලා කන්න රාත්‍රී ආහාරයට ගන්න පුළුවන්. ශීතකරණයේ දින හතක් විතර කල් තබා ගන්නත් පුළුවන්.
8. පීසාං ගෝරෙං (Pisang Goreng)
අවශ්‍ය ද්‍රව්‍ය
- පෙති ගැසූ හෝ දිගැටියට කපා ගත් හොඳින් ඉදුණු කෙසෙල් ගෙඩි 4-6 ක්
පාන් පිටි ග්‍රෑම් 150 ක්
සීනි මේස හැඳි 02ක්
වැනිලා යුෂ තේ හැඳි 1/2 ක්
එළකිරි මි. ලී. 125 ක් (කෝප්ප 1/2 ක්)
බිත්තරයක්‌
මෙළෙක්‌ කළ බටර් ග්‍රෑම් 40 ක්
රම් තේ හැඳි 01 ක්
තෙල් කෝප්ප 02 ක්
සාදා ගන්නා ක්‍රමය
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
පාන්පිටි, සීනි සහ වැනිලා සුදුසු විශාල බඳුනකට දමා හොඳින් මිශ්‍ර කර එයට එළකිරි, බිත්තර, මොළොක්‌ වු බටර් සහ රම් වත්කර මෘදු මිශ්රණයක් වන තෙක් හොඳින් කලවම් කරන්න. එකී මිශ්‍රණය කෙසෙල් පෙතිවල හොඳින් දැවටෙන තෙක් පෙති ගැසූ කෙසෙල් එකී මිශ්රණයේ ගිල්වා තබන්න.ඉන්පසු උදුනක තෙල් රත්වන්නට හැර ඉහත මිශ්‍රණය හොඳින් ආලේප කළ කෙසෙල් පෙති, තෙලට දමා රන්වන් පැහැ ගැන්වෙන තෙක් බැදගන්න. ඉන්පසු කෙසෙල් පෙති සියල්ල තෙලෙන් බා, උණු උණුවේම හෝ සිසිල් කර “පීසාං ගෝරෙං” රස බලන්න.