නුවන් ජයසේකර –
දෙහිවල ප්රදේශයේ ප්රමුඛ පෙළේ ව්යාපාරිකයෙකු ඝාතනය කිරීමේ කුමන්ත්රණයකට සම්බන්ධ 18 හැවිරිදි තරුණයෙකු ගිනි අවියක් සහ ජීව උණ්ඩ තොගයක් සමඟ ගල්කිස්ස ප්රදේශයේදී පොලිස් විශේෂ කාර්ය බලකාය (STF) විසින් අත්අඩංගුවට ගෙන තිබේ.
ගල්කිස්ස පොලිස් වසමේ ගුණවර්ධන පාරේ අංක 1/බී නිවස ඉදිරිපිට ඊයේ (18) රාත්රියේ සිදුකළ විශේෂ වැටලීමකදී මෙම සැකකරු හසු වූ බව පොලිසිය පවසයි.
අත්අඩංගුවට ගන්නා අවස්ථාවේදී සැකකරු සන්තකයේ තිබී මිලිමීටර් 09 උණ්ඩ යෙදිය හැකි මෙරට නිෂ්පාදිත ‘ගල්කටස්’ වර්ගයේ ගිනි අවියක්, ටී-56 ගිනි අවි සඳහා භාවිත කරන මැගසිනයක්, ටී-56 ජීව උණ්ඩ 30ක් සහ පිස්තෝල ගිනි අවි කොටස් කිහිපයක් සොයාගෙන ඇත.
ප්රශ්න කිරීම්වලදී අනාවරණය වී ඇත්තේ, මෙම සැකකරු දැනට විදේශගතව සිටින සංවිධානාත්මක අපරාධකරුවෙකු සහ මහා පරිමාණ මත්ද්රව්ය ජාවාරම්කරුවෙකු වන ‘බඩෝවිට අසංක’ යන අයගේ ප්රධාන අනුගාමිකයෙකු වන කුරුවිට ආරච්චිගේ කවිදු ධනංජය නොහොත් ‘සැන්ඩෝ’ නමැත්තාගේ සමීපතම ගෝලයෙකු බවය.
‘සැන්ඩෝ’ නැමැත්තා විසින් බඩෝවිට අසංකගේ මෙරට අපරාධ ජාලය මෙහෙයවන බවද හෙළි වී තිබේ.
සැකකරු වැඩිදුරටත් පාපොච්චාරණය කර ඇත්තේ ‘සැන්ඩෝ’ විසින් ලබාදුන් සැලසුමකට අනුව දෙහිවල ප්රදේශයේ පදිංචි ‘ලැරී’ නමැති ප්රමුඛ පෙළේ ව්යාපාරිකයා ඝාතනය කිරීම සඳහා මෙම අවි ආයුධ ළඟ තබාගෙන සිටි බවය.
අත්අඩංගුවට ගත් සැකකරු සහ අවි ආයුධ තොගය වැඩිදුර විමර්ශන සඳහා ගල්කිස්ස මූලස්ථාන පොලිසිය වෙත භාර දී ඇත.
