චතුර රුවන් වීරක්කොඩි
-
දශක කීපයකට පෙර නාග්පූර් දුම්රියපල ලඟ දොඩම් විකිණූ කොල්ලෙක්…
-
අද ඉන්දියානු රුපියල් කෝටි 400ක වත්කම් සහිත ප්රවාහන සමසාගම් කරුවෙක්…
-
වෛද්ය ප්රතිකාර සඳහා භාවිතා කරන ද්රව ඔක්සිජන් මෙට්රික් ටොන් 400ක් නොමිලේ බොදා හැරලා…
-
ඔහුගේ ව්යාපෘතියට ඉන්දියාව පුරාම සහාය පල කරන්න පටන් අරන්…
මහාරාෂ්ට්රයේ ප්රධාන නගරයක් වන නාග්පූර්හි පෞද්ගලික ප්රවාහන සමාගමක් පවත්වාගෙන යන ප්යාරේ ඛාන් ( Pyare Khan) නැමැත්තෙක් මේ දිනවල සුපිරි වීරයෙක් බවට පත් වී තිබේ.
නම වගේම වැඩෙනුත් ආදරයෙහි අරුත සමාජයට ඒත්තු ගැන්වූ ප්යාරේ ගැන තව නොබෝ දිනකින් ලොවම කතාබස් කරනු ඇත.
ඔක්සිජන් කන්නදැයි අසමින් වනාන්තර විනාශ කර කාන්තාර බිහිකරන හිපාටු දේශපාලුවන් ගැන ඇසෙන වටපිටාවක මෙවැනි මිනිසුන් ගැන කලාතුරකින් හෝ අසනන්ට ලැබීම වාසනාවකි.
රජයේ රෝහල්වල සහ නාග්පූර් නගරයේ අනෙකුත් ප්රතිකාර මධ්යස්ථානවල මරණාසන්නව සිටින කොවිඩ්-19 රෝගීන් සංඛ්යාව ගණනය කළ නොහැකි තරම් විශාලය. ගෙවීගිය පැය 24 තුළ පමණක් මියගිය කොවිඩ් රෝගීන් සංඛ්යාව 3500 ඉක්මවා ඇත.
මේ රෝගීන් සඳහා කළ හැකි යමක් තිබේනම් එය සිදුකරන්නට දෙපාරක් නොසිතූ ප්යාරේ ඛාන් සිය පෞද්ගලික ධනයෙන් ඉන්දියානු රුපියල් මිලියන 8.5ක් වැය කරමින් එම රෝගීන්ට අවශ්ය කරන වෛද්ය ප්රතිකාර සඳහා භාවිතා කරන ද්රව ඔක්සිජන් මෙට්රික් ටොන් 400ක් සම්පාදනය කරන්නට කටයුතු කළේය.
මේ දිනවල ඉන්දියාව තුළ පිරිසිදු වාතය සදහා ඇත්තේ අති විශාල ඉල්ලුමකි. ඔක්සිජන් සපයන සමාගම් අසීමාන්තික ලාභ උපයන්නට මෙය අවස්ථාවක් කරගෙන තිබේ. නමුත් ප්යාරේ ඛාන් ඔහුගේ සේවා සැපයීම වෙනුවෙන් කිසිදු මුදලක් අයකිරීම ප්රතික්ෂේප කරයි. මේ නිසාම “ඔක්සිජන් මෑන්” ලෙසින්ද ඔහුව හැඳින්වීමට පටන්ගෙන තිබේ.
සියලුම රෝහල් සදහා ඔහු මේ වනවිට ඔක්සිජන් පිරවූ සිලින්ඩර බෙදාහැර අවසන්ය.
ඉස්ලාම් භක්තිකයෙක් වන ප්යාරේ ඛාන් ඒ පිළිබඳව පවසා ඇත්තේ එය තමාට පැවරී ඇති වගකීමක් බවයි. උතුම් වූ රාමදාන් සමය තුළ සිදු කළ යුතු “ෂකත් (Zakat) නම් අනෙකාට උපකාර කිරීමේ චාරිත්රය මෙම අසරණ රෝගීන් උදෙසා සිදු කරන්නට ලැබීම ගැන සතුටුවන බව හේ දුරටත් පවසා තිබේ..
මේ වනවිට නොමිලේ ඔක්සිජන් ලබාදීමේ සේවාව සඳහා විශාල ඉල්ලුමක් ඇතිවෙමින් පවතින අතර අනෙකුත් ප්රාන්තවලින්ද ඔහුව මුණගැසී ඒ පිළිබඳ සාකච්ඡා කිරීමට හා සහයෝගය ලබාදීමට අපේක්ෂාවෙන් සිටින බව ආරංචි මාර්ග පවසයි.
1995 වසරේදී නාග්පූර් දුම්රිය ස්ථානය අසළ කරත්තයක් මත තබාගෙන දොඩම් විකුණූ ප්යාරේ ඛාන් අද ඉන්දියානු රුපියල් කෝටි 400ක වත්කම් සහිත Amshi Transport සමාගමේ හිමිකරුවාය. එම සමාගම සතු ට්රක් රථ සංඛ්යාව 300කි.
ඇත්තෙන්ම ප්යාරේ ඛාන් වැනි උතුම් මිනිසුන් අද සමාජයේ විරලය. අමිලය. ඔහු දෙවියන් උදෙසා කළ ශුද්ධ වූ උපවාසය ජීවිත රැසක් රැකගන්නට හේතු සාධක වී තිබේ. සතුන් මරා ලේ හැලීම වෙනුවට ඔක්සිජන් දී ජීවිත රැකීම දේව වචනය ලෙස විශ්වාස කළ ප්යාරේ ඛාන් වැනි මිනිසුන් තවත් අතලොස්සක් හෝ හිඳී නම් ලෝකය මනරම් තැනක් වනු ඇත.