එෂාමා කාරියකරවන –
ජ්‍යෙෂ්ඨ මනෝ උපදේශිකා.-
කොළඹ ජාතික රෝහලේ අතිකාල දීමනා සඳහා රැගෙක ආ මුදල් එහි සේවය කරන වෛද්‍යවරයකු විසින් මංකොල්ලා කන්නට ගත් උත්සහය ව්‍යර්ථ වී ඔහු දැන් පොලිස් අත්අඩංගුවේ පසුවේ. මෙම වෛද්‍යවරයා කායික රෝග විශේෂඥ වෛද්‍යවරයකු වීමට විදෙස් පුහුණූව අවසන් කර පැමිණ අවසන් පුහුණු කටයුතුවල යෙදී සිටියදී මෙය සිදුවී ඇත. අත්අඩංගුවට පත්වන අවස්ථාවේ ඔහු බීමත්ව සිට ඇති බවද පැවසෙයි.
ඔහුගේ ප්‍රකාශයට අනුව ලක්ෂ 25ක් පමණ වූ ණය මුදලක්ගෙ වා ගත නොහැකිව විශාල පීඩනයක ඔහු සිට ඇති අතර විශාදය සඳහා ප්‍රතිකාර ලබාගනිමින් සිට ඇත. ඔහු රාජකාරියේ යෙදුනු අන්ද , රෝගීන් සහ කාර්ය මන්ඩලය සමග ගණුදෙනු කළ ආකාරය හෙළිදරව් වී නැත. මේ කාරණා සලකා බැලීමේ දී ඔහු පත්ව ඇති මානසික විඩාව හේතුවෙන් ඔහුට අත්වූ අලාභය සහ හානිය විශාලය.
එම කරුණූ එකින් එක සලකා බැලුවහොත් ඔහු පිළිබඳ කිසියම් චිත්‍රයක් මවා ගත හැකිය.
වෛද්‍යවරයකුට ලක්ෂ 25 ක ණයක් යනු එතරම් විශාල ගණනක් නොවේ. ඕනෑම බැංකුවකින් වෛද්‍යවරුන්ට ණය ලබාගැනීමේ අසීරුවක් නැත. බැංකුවලට වී ඇති ණයවලට අමතරව වෙනත් අයකුගෙන් හදිසියේ ගත් ණයක් දිය යුතු දිනය පසු වූවාද? යන පැනය එවිට මතුවෙයි.
ඔහු ණය කාරයකු වී ඇත්නම් ණය හිමිකරු මුදල් ඉල්ලා කරදර කරන්නේ නම් නැතහොත් ගෙවිය යුතු දිනය පසුවී ඔහුගේ වත්කමක් අහිමිවීමේ අවදානමක් ඇතිවී නම් ඔහු ආතතියට පත්වීමේ ඉඩකඩක් ඇත. එම ආතතිය විශාදය දක්වා වර්ධනය විය හැකිය.
ඔහුගේ විශාද තත්වයට ඔහු නිසියාකාර වෛද්‍ය ප්‍රතිකාර ලබාගත්තාද? නැතහොත් ඔහුගේ වෛද්‍ය දැනුම අනුව ඔහුම ඖෂධ තෝරාගෙන ලබාගත්තාද? යන පැනය නැගෙයි. එමනිසා විශාදය සුව නොවී හෝ පාලනය නොවී පැවතුනාද යන්නත් විමසීම වැදගත්ය.
විශාදය හේතුවෙන් ඔහුගේ තාර්කික හෙතුවාදී චින්තනය යටපත් වී අතාර්තික ඍණාත්මක මෙන්ම අහේතුවාදී චින්තනය මතුවීට ඉඩ ඇත. ගැටලුව තුළ හිඳිමින් ගැටලුවට බිය වෙමින් ඉදිරියේ මුහුණ දීමට නියමිත අභියෝගයන් සිහිකරමින් සිටින විට ගැටළුව විසඳා ගැනීමට ඇති සැබෑ මාර්ග පෙනීම අවහිර වෙයි. එසේ තිබියදී ප්‍රශ්නය තනිව විසඳාගැනීමට උත්සාහ කිරීම නිසා තවත් අසරණ වෙයි. අවසානයේ තමාට ඒ මොහොතේ පෙනෙන විසඳුම තෝරාගනී. විශාදය බලවත් වීමෙන් හොඳ නරක පිළිබඳව හෝ ආත්ම අභිමානය, තමා කව්ද යන්න නෙදැනෙයි. පෙනෙන එකම දෙය තම ගැටලුව විසඳා ගැනීමට තමා තෝරා ගත් මාර්ගයයි. පවුලේ අයකු හෝ මිතුරකු සමග හෝ මේ ගැටළුව සාකච්ඡා කළේද නැතහොත් ඔවුන් සමග කතා කීරීම පළක් නැති දෙයකැයි ඔහු තීරණය කළේද යන්නත් සෙවිය යුතුවෙයි.
සොරකම සිදුකරන මොහොතේ බීමත්ව හිඳීම පිළිබඳව සලකා බැලුවහොත් ඔහු නිතර බීමත්ව සිටින අයෙකු විය හැකිය. ඔහු මත්වතුර පානය නොකරන නමුත් කරන්න යන අනීතික ක්‍රියාවට හෘද සාක්ෂිය කරන එරෙහිවීමෙන් බේරෙන්නට බීමත් වූවාද විය හැකියි.
මේ සොරකම දෙස බලන විට ඔහු සොරකමට ආධුනිකයකු බව පෙනෙයි. තමා සේවය කරන ආයතනයෙන්ම මහ දහවල් ප්‍රසිද්ධියේ මුදල් කොල්ලයක් කිරීමට මෙබඳු මට්මක බුද්ධියක් ඇති අයෙකු යහපත් සිහියෙන් පෙළඹේ යැයි සිතිය නොහැකිය. ඔහුගේ සැලසුම්ද සොරකමට ආධුනික සේ පෙනෙයි. මුදල් බෑගය රැගෙන දිවයන්නේ තුවක්කුව අතේ ප්‍රදර්ශනය කරගනිමිනි. එසේම රෝහල් පරිශ්‍රයෙන් පිටත විත් පළා යන්නේ ත්‍රීරෝද රියකිනි.
අවසානයේ සියලු සැලසුම් අසාර්ථක ව , මෙතෙක් ඔහු මහත් වැරවෑයම් කොට ලබාගත් අධ්‍යාපනයෙන් පළක් නොවුනි. ගරුකටයුතු වෘත්තියෙන්ද ඔහු නෙරපා හැරිනි. ඉදිරි ජීවිතය සමාජය තුළ පීඩාකාරී, අවප්‍රමාණ එකක් වීමට ඔහුම මග පාදා ගෙන ඇත.
අතිශයින්ම කණගාටුදායක ඉරණමකට මේ තරුණ වෛද්‍යවරයාගේ ජීවිතය පත්වූයේ ඇයි දැයි සිතන්නට නීතිය පමණක් නොව සෞඛ්‍ය වෛද්‍ය ක්ෂේත්‍රයද කටයුතු කළ යුතුවෙයි. රෝගීන් සුවපත් කරන්නට සිටින වෛද්‍යවරුන්ගේ කායික මානසික තත්වය නිරෝගී නොවි නම් එය වහාම ප්‍රතිකර්ම යෙදිය යුතු අඩුපාඩුවකි. වෛද්‍යවරයකුවීම ලෙහෙසි නැත. අතිශය පීඩාකාරී වසර පහක් වෛද්‍ය විද්‍යාලයේද ඉන්පසු ඊටත් වඩා පීඩාකාරී වසරක් සීමාවාසික පුහුණුවේද ගතකරන ඔවුන්ගේ මානසික සෞඛ්‍ය, සමාජ ජීවිතය, පිළිබඳ යම් විමසා බැලීමක් කළයුතු බව මෙම වෛද්‍යවරයාගේ ක්‍රියාවෙන් සෞඛ්‍ය වෛද්‍ය ක්ෂේත්‍රය තේරුම් ගත යුතුවෙයි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
ඔහු අවලංගු කාසියක් නොකර දෙවන අවස්ථාවක් ජීවිතයට ලබාදී රටට වැඩක් ගත හැකි වුවහොත් යහපති.