ශ්‍රි ලංකාව කොවිඩ් මර්දනය අතින් සිටියේ හොඳ තැනකය. මාර්තු මාසයේ 11 වැනිදා පළමු ශ්‍රි ලාංකික කොරෝනා රෝගියා වාර්තා වීමෙන් පසු දියත් කරන ලද කොරෝනා මර්දන මෙහෙයුමේ යම් අඩුපාඩු සිදුරු තිබුණද අපේ සෞඛ්‍ය අංශ ,පොලිසිය සහ ආරක්ෂක හමුදා එක්ව සිදු කළ සාමූහික ප්‍රයත්නය රෝගීන් ගණන 1047කින් මේ වන විට සීමා කර ගැනිමට සමත් වී ඇත්තේ මරණ 09කට සීමා කරගෙනය.
එහෙත් මෙලෙස රෝගීන් දහසේ සීමාව පන්නන්නට වැඩිම දායකත්වයක් දැක්වූයේ නාවික හමුදාවය.මේ වනවිට සිටින අසාදිතයන්ගෙන් අඩක් පමණම නියෝජනය වන්නේ නාවික හමුදාවෙනි. අමිහිරි වුවද එය අප පිළිගත යුතු කතාවකි. කොවිඩ් 19 මර්දනයට එක් වූ සෞඛ්‍ය සේවකයන්, පොලිසිය සහ යුධ සහ ගුවන් හමුදාව තම පිරිස් රෝගයෙන් ආරක්ෂා කර ගනිද්දී නාවික හමුදාවට පමණක් මෙසේ වූයේ ඇයිද යන්න රටම කතා කරන ගැටලුවකි. ඉතා හොඳ චිත්ත සහ කාය ශක්තියක් සහිත සෙබළ පිරිසක් නියෝජනය වන නාවික හමුදාවට මේ අපකීර්තිය කැඳවූයේ කෙසේද යන්න පිළිබඳව නාවික හමුදාව තුළද විවිධ විවේචන ඇත.
දෙදහස් විස්සේ අප්‍රේල් මස 22 වැනිදායින් පසුව දිනෙන් දින නාවික හමුදා සෙබලුන් හට කොවිඩ් 19 වෛරසය ආසාදනය වීම අද වනතුරුත් නතර වී නැත. පළමුව නාවික හමුදා සෙබලුන් හතකට ආසාදන ය වු මෙම වෛරසය මේ වන විට නාවික සෙබලුන් 578 දක්වා පැතිර ගොස් ඇති බව නිල වාර්තා පෙන්වා දෙයි.
වැලිසර නාවික හමුදා කඳවුරේ මහසෙන් බලකායේ සාමාජිකයන් කිහිප දෙනකුට මුලින්ම වැලඳුණු කොවිඩ් 19 වෛරසය , දෙවනුව ගැමුණු බලකායටද තෙවනුව තක්ෂිලා බලකායටද අනතුරුව නාවික හමුදා තාක්ෂණ පුහුණු ඒකකය සහ නාවික හමුදා රෝහල් කාර්යය මණ්ඩලය දක්වා ම ව්‍යාප්ත වී ඇත. ඒ අනුව මේ වන විට රෝගය වැලඳුණු බවට තහවුරු කර නොගත් එහෙත් රෝග ලක්ෂණ සහිත සහ රහිත විශාල පිරිසක් නාවික හමුදා කඳවුරු තුළ සිටින බව වාර්තා වේ.
රෝගය මේ තරම් නාවික සෙබළුන් අතර පැතිරීමට බලපා අති කාරණය ලෙස නාවික හමුදා ආරංචි මාර්ග පෙන්වා දෙන්නේ කඳවුරේ සිටින ඉහළ පෙලේ නිලධාරීන් මෙම රෝගය ව්‍යාප්ත වීමේදී ඇති අවදානම් සහගත තැන් පිළිබඳව නොසැලකිලිමත්ව විවිධ පිලිවෙත් අනුගමනය කිරීමය. එයින් එක ආසන්න හේතුවක් බවට පැවසෙන්නේ දේශීය වෛද්‍ය කුමයට අනුව දුම් ඇල්ලීමේ වැඩපිලිවෙළයි. සෙබළුන් 1800ක් පමණ සිටින කඳවුරට මුට්ටි දෙසියක් පමණ ගෙන්වා එක මුට්ටියකින් 45 දෙනකුට පමණ දුම් ඇල්ලීමට කටයුතු කර තිබේ. ආචාර පෙළපාලි පුහුණු ක්‍රීඩාංගනය වෙත කැදවා මෙසේ එක් මුට්ටියකින් හතලිස් පස් දෙනකු බැගින් යොදවා දුම් ඇල්ලිම සිදු කර ඇත.
මෙම වැඩසටහනට මුල් තැන ගත්තේ කඳවුරේ ඉහළ නිලධාරියෙකි. ඔහුගේ අදහසක් අනුව, අප්‍රේල් මස විසි අට වැනි දින සිට මෙම බෙහෙත් දුම් ඇල්ලීම ගැමුණු බලකායේ නාවික සෙබලුන් දහසකට වැඩි පිරිසකට සිදු කර ඇත. එහි පැවැති අවිදිමත් බව සහ අනාරක්ෂිත බව සෙබලුන් අතර රෝගය ව්‍යාප්ත වීමට යම් බලපෑමක් කරන්නට ඇතැයි ඇතැමකුගේ මතය වී තිබේ.
වැලිසර කදවුරු පරිශුයේ වෛරස පාලනය කිරිමේ වගකීම නාවික හමුදාපතිවරයා විසින් දෙන ලද්දේ කඳවුරේ බලධාරින් වෙතය. ඔවුන් තම වගකීම නිසි පරිදි සිදු කරනු ඇති බවට විශ්වාසය තබා නැවත නැවත ඒ සම්බන්ධයෙන් සොයා බැලීමක් නොකල බවත් දැනගන්නට තිබේ. එසේ වුවද ඔවුන් වගකීම් විරහිත ආකාරයෙන්ක්‍රියා කර ඇති අතර ඇතැම් සෙබලුන්ද මේ අයුරින් සෞඛ්‍යාරක්ෂාව පිළිබඳව දැඩි තැකීමක් නොමැතිව ක්‍රියා කොට තිබේ.
නාවික හමුදා රෝහලේ කාර්යය මණ්ඩලයේ කිහිප දෙනකුටද මේ වනවිටත් රෝගය අසාදනය වී ඇති අතර ඔවුන්ගෙන් තවත් පිරිසකට රෝග ලක්ෂණ පහළ වී ඇත. මේ වන විට පීසීආර් පරික්ෂණයට ලක් කොට නැති බව අභ්‍යන්තර ආරංචි මාර්ග පවසයි. දැනට පීසිආර් පරික්ෂණ සදහා සාම්පල ලබා ගන්නේ පලපුරුද්දක් නැති පිරිසක් ද යොදවා ඇත්තේ පළපුරුදු වෛද්‍ය තාක්ෂණ ශිල්පීන් ද සිටියදී ය.
කඳවුරේ රෝගීන් සහ නිරෝධායනය වන්නන් අසලින් බැහැර කෙරෙන අපද්‍රව්‍ය නිසි පරිදි විනාශ කිරීමකට ලක් නොවීමද කඳවුර තුළ කතා බහට ලක්ව ඇති කරුණකි. මෙම අපද්‍රව්‍ය කසළ වළකට බැහැර කෙරෙන අතර ඒ ආසන්නයේ භට නිල නවාසද පිහිටා ඇත.මැසි මදුරුවන්ද ගැවසෙන මෙම ප්‍රෙද්ශයෙන් වෙනත් රෝග පවා ව්‍යාප්ත වීමේ අවදානමක් ඇත්තේ එම කසල නියමිත පරිදි බැහැර නොවන නිසාවෙනි.
එමෙන්ම නාවික හමුදාව තුළ නිරෝධායන ක්‍රියාවලියම නිසි පරිදි සෞඛ්‍ය අංශවල මඟපෙන්වීම් මත සිදුව නැති අතර ඔවුන් අතර සිටි ආසාදිතයන් හරහා මෙම නිරෝධායනය වූ සෙබලුන්ටද රෝගය ව්‍යාප්ත වී ඇත.
සෞඛ්‍ය ආරක්ෂිත ඇදුම් කට්ටල වරක් පමණක් පාවිච්චි කොට ඉවත දැමිය යුතු වුවද, එම ඇදුම් කට්ටල වරින් වර ක්ලෝරින් වතුරින් සෝදා පාවිච්චි කරන ලෙස දන්වා තිබු හෙයින් ඇතැම් වෛද්‍යවරු පවා මෙම ඇදුම් නැවත පාවිච්චි කර ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මෙවැනි අවිධිමත් පාලන ක්‍රමවේදයක් සහ නොසැලකිලිමත් බව හේතුවෙන් නාවික හමුදාවට පමණක් නොව රටටම කොවිඩ් අභියෝගය වැඩි කිරීමට හේතු වූ බව පිළිගත යුතුය. දැන් කළ යුත්තේ සිදුවූ වරද ගැනවැටහීමක් ඇති කොටගෙන හැකි ඉක්මනින් නාවික සෙබළුන් මේ අර්බුදයෙන් බේරා ගැනීමය.