රංජිත් රාජපක්ෂ –
හෝර්ටන්තැන්න ජාතික වන උද්යානයේ ලෝකාන්තය නැරඹීමට පැමිණි කොළඹ විශ්ව විද්යාලයේ වෛද්ය පීඨයේ සිසුවියක් සෙල්ෆි ඡායාරූපයක් ගැනීමට යාමේදී අඩි 50ක පමණ ප්රපාතයකට ඇද වැටී තිබේ.
යාපනය ප්රදේශයේ පදිංචි 23 හැවිරිදි මෙම සිසුවිය ප්රපාතයේ අත්තක එල්ලී සිටියදී යුද හමුදාව, පොලිසිය සහ වනජීවී නිලධාරීන් එක්ව සිදුකළ විශේෂ මෙහෙයුමකින් පසු ආරක්ෂිතව මුදාගෙන ඇත.
අද (19) පෙරවරු 9.00 ට පමණ මෙම අනතුර සිදුව ඇති අතර, ඇය ප්රපාතයට ඇද වැටෙන අවස්ථාවේ වාසනාවකට මෙන් ගසක අත්තක රැඳී තිබේ. ඒ අවස්ථාවේ වහා ක්රියාත්මක වූ හෝර්ටන්තැන්න ජාතික වන උද්යානයේ රියදුරෙකු තම ජීවිත අවදානම පවා නොතකා ප්රපාතයට බැස, අත්තක එල්ලී සිටි සිසුවිය බේරාගෙන බෑවුමේ ගලක් මත වාඩි කරවීමට සමත් වී ඇත.
අනතුරුව පට්ටිපොළ පොලිසිය, යුද හමුදාව සහ විශේෂ කාර්ය බලකායේ සහාය ඇතිව දැවැන්ත මෙහෙයුමක් ආරම්භ විය. නුවරඑළිය ශ්රී ලංකා තුන්වන සිංහ රෙජිමේන්තුවේ කමාන්ඩෝ භටයින්, පොලිස් විශේෂ කාර්ය බලකා නිලධාරීන් සහ වනජීවී නිලධාරීන් එක්ව දැඩි පරිශ්රමයක් දරා සිසුවිය ප්රපාතයෙන් ගොඩට ගෙන තිබේ.
අනතුරින් තුවාල ලැබූ සිසුවිය වැඩිදුර ප්රතිකාර සඳහා නුවරඑළිය දිස්ත්රික් මහ රෝහල වෙත ඇතුළත් කර ඇති බව හෝර්ටන්තැන්න ජාතික වන උද්යානයේ කළමනාකරු මංජුල මොනරතැන්න සඳහන් කළේය.
