පොහොර මාෆියාවට කිසිසේත්ම ඉඩක් නොදෙන බවත්, අතාර්කික ලෙස පොහොර තොග ගබඩා කරගෙන සිටින පුද්ගලයන් සම්බන්ධයෙන් විශේෂ විමර්ශනයක් ආරම්භ කර ඇති බවත් නියෝජ්ය කෘෂිකර්ම ඇමති නාමල් කරුණාරත්න අද (19) පාර්ලිමේන්තුවේදී ප්රකාශ කළේය.
නියෝජ්ය ඇමතිවරයා වැඩිදුරටත් සඳහන් කළේ පොහොර සමාගම් සමඟ සාකච්ඡා කර පොහොර සඳහා සාධාරණ මිලක් නියම කර ගැනීමට රජය සමත් වූ බවය.
එහිදී සමාගම් ඉදිරිපත් කළ මිල ගණන්වලට රජය එකඟ නොවූ බවත්, දීර්ඝ සාකච්ඡාවලින් පසු ගොවි ජනතාවට සහනදායී වන ලෙස මිල අඩු කිරීමට පියවර ගත් බවත් ඔහු පැවසීය.
නව වැඩපිළිවෙළ යටතේ සමාගම් සතුව පවතින පොහොර තොග රජය විසින් මිලදී ගෙන, ගොවිජන සේවා මධ්යස්ථාන හරහා කෙලින්ම ගොවි සංවිධාන වෙත ලබා දීමට කටයුතු යොදා ඇත.
මේ හරහා අතරමැදියන් ඉවත් කර ඇති අතර, ගොවි සංවිධාන මැදිහත් වී එම පොහොර ගොවීන් අතට පත් කිරීමේ ක්රියාවලිය දැනටමත් ආරම්භ කර ඇති බව නියෝජ්ය ඇමතිවරයා අවධාරණය කළේය.
පසුගිය කාලසීමාව තුළ අවශ්යතාවක් නොමැතිව යූරියා ටොන් 25,000ක්, ටී.පී.එස්. ටොන් 5,000ක් සහ එම්.ඕ.පී. ටොන් 5,000ක් පමණ තොග පිටවී ඇති බවට අනාවරණය වී ඇති අතර, ඒ පිළිබඳව දැඩි නියාමනයක් සහ පරීක්ෂණ පවත්වන බවද නියෝජ්ය ඇමතිවරයා වැඩිදුරටත් සභාවට දැනුම් දුන්නේය.
