රටට දිනන්නත් පුලුවන්…. ශ්‍රී ලංකා කණ්ඩායමට ලකුණු 246ක විශිෂ්ට ජයග්‍රහණයක්…

ලකුණු 246ක විශිෂ්ඨ ජයග්‍රහණයක් සලකුණු කරමින් ශ්‍රී ලංකා පකිස්ථානු දෙවැනි ටෙස්ට් තරගය නිමා වී තිබේ. තරගාවලිය ජය පරාජයෙන් තොරව නිමා කිරීමට ශ්‍රී ලංකා කණ්ඩායම සමත් වී ඇත.

ලකුණු 508ක ජයග්‍රාහී ඉලක්කයක් හඹා ගිය පකිස්තානු කණ්ඩායම ලකුණු 261කට සීමා කිරීමට ශ්‍රී ලංකා පන්දු යවන්නෝ සමත් වූහ.

යළිත් වරක් ප්‍රභාත් ජයසූරිය සිය විශිෂ්ඨත්වය ප්‍රකට කළේය. ඒ දෙවැනි ඉනිමේ දී කඩුළු 05ක් ලබමිනි. ඔහු ලකුණු 117ට කඩුළු 05ක් ලැබීය. රමේෂ් මෙන්ඩිස් තුන් ඉරියව් ක්‍රීඩකයෙක් සතු විපුලත්වය ප්‍රදර්ශනය කළේය. දෙවැනි ඉනිමේ දී  නොදැවී ලකුණු 45ක් ලැබූ ඔහු ලකුණු 101කට කඩුළු 04ක් ලැබුවේය. මැදපෙළ පිතිකරු ෆවාඩ් අලාම් දුවද්දී දැවී යෑමට හසුවිය.

පකිස්ථානු දෙවැනි ඉනිම වෙනුවෙන් බබාර් අසාම් හුදකලා සටනක නිරත වෙමින් ලකුණු 81ක් ලැබුවේය.  ඉමාම් උල් හක් ලකුණු 49ක් ලබා සිටිය දී දැවී ගියේය.

ඊයේ දෙවැනි ඉනිම ක්‍රීඩා කළ ශ්‍රී ලංකා කණ්ඩායම කඩුළු 08කට ලකුණු 360ක් ලබා සිටිය දී ඉනිම අත්හිටෙව්වේය. පළමු ඉනිමේ වාසියත් සමග පකිස්ථානයට ලකුණු 508ක බෙහෙවින්ම අසීරු ජයග්‍රාහී ඉලක්කයක් ලැබී තිබිණි.

පකිස්තානු කඩුළු දඩයම  ඊයේම ප්‍රභාත් ජයසූරිය  විසින් ආරම්භ කළේය.

ශ්‍රී  ලංකා කණ්ඩායම ජයග්‍රහණයට  ඔසවා තැබීමේ විශිෂ්ටම මෙහෙවර පිත්තෙන් ඉටු කළේ මැදපෙළ පිතිකරු ධනංජය ද සිල්වාය. ඔහු හතරේ පහර 16ක් සහිතව ලකුණු 109ක් වාර්තා කළේය.

ඉනිම ආරම්භ කිරීම දික්වැල්ලට දී මැද පෙළට පැමිණි දිමුත් කරුණාරත්න ලකුණු 61ක් ලබා ගත්තේය. ඔහු සහ ධනංජය අතර ඇතිවූ සම්බන්ධතාවය මේ ඉනිමේ විශිෂ්ටම සම්බන්ධතාවය විය.   ඔවුන් දෙදෙනා එක්ව හත්වැනි කඩුල්ල වෙනුවෙන් ලකුණු  126ක සම්බන්ධතාවයක් ගොඩනැගුවේය.

මීට අමතරව ඉනිම අත්හිටුවීමට අවශ්‍ය ස්ථාවර  පදනම සපයමින්  ශ්‍රී ලංකා කණ්ඩායම වෙනුවෙන් වේගවත් ලකුණු 45ක් රැස් කරගන්නට රමේෂ් මෙන්ඩිස්  සමත් විය. ධනංජය ලකුණු 109කට දැවී යෑමත් සමග ඉනිම අත්හිටවීම නිසා නොදැවී සිටි රමේෂ් මෙන්ඩිස්ට සිය අර්ධ ශතකය සම්පූර්ණ කරගැනීමට නොහැකි විය.

කෙසේ වෙත්ත අසීරු ලකුණු 508ක ඉලක්කය අතර මැදදී බිඳ වැටිණි. මුල් ඉනිම 231කට සීමා වූ  පකිස්තානුවෝ දෙවැනි ඉනිමේ දී  ලකුණු 261කට දැවී ගියහ.