ක්‍රිකට් යනු අපේ අයට ආගමක් බඳුය.
ක්‍රිකට් යනු අපේ අයට ආගමක් බඳුය.ඒ නිසාමදෝ පසුගිය වකවානුවේ බෝන් අගේන් නම් ආගමික නිකායක් ක්‍රිකට් ක්‍රීඩාව තුළට රිංගා මහා කලබගෑනියක් සිදු කළේය.
එක්තරා බෝන් අගේන් පාදිලිවරයකු ක්‍රීඩකයන් මෙන්ම ක්‍රිකට් පරිපාලකයන්ද සූක්ෂම ලෙස බෝන් අගේන්කරණය කරන බවත් තරග දිනන්නේද එක්තරා බෝන් අගේන් ක්‍රීඩකයකු එම පාදිලිවරයාගේ අනුහසින් දක්වන දස්කම් අනුව බවත් කියවිණ.
එහෙත් අදාල ක්‍රීඩකයාට ලෝක කුසලාන තරගාවලියේ කිසිදු දස්කමක් පෑමට නොහැකි වීම තුළ එම ක්‍රීඩකයාත් පාදිලිවරයාත් බලු වී ගියේය.
මේ වන විට අපේ ක්‍රිකට් ක්‍රීඩාව යළි මතබේදාත්මක තත්ත්වයකට පත්ව තිබේ.
එක් අතකින් ක්‍රිකට් ආයතනයේ පරිපාලන නිලධාරීන් හා ක්‍රීඩා ඇමතිවරයා අතර විරසකයක් හටගෙන ඇත.
අනික් අතින් ජාතික ක්‍රිකට් පිළ ජාත්‍යන්තර මට්ටමින් පරාජය වෙමින් ඇත.
බලයේ රැඳී සිටීමට ඕනෑම දෙයක් කිරීමට පසුබට නොවන වත්මන් ක්‍රිකට් බලධාරීන් හා බල පෙරේතයන් පලවා හැරීමට ක්‍රීඩා නීතියට සංශෝධන ගෙනා ක්‍රීඩා ඇමතිවරයාත් ඔවුන් කණ්ඩායමත් අතර හටගෙන තිබෙන අරගලය ක්‍රිකට් ආයතනය තුළ සිදුකෙරෙන වෝහාරික විගණනයේ වාර්තාව නිකුත් කිරීමත් සමග අවසන් වනු ඇතැයි අපේක්ෂා කෙරේ.
මේ අතර මහේල ජයවර්ධන මාසිකව රුපියල් හැට ලක්ෂයකට අධික මුදලක් වැටුප් ලෙස ලබා ගනිමින් කරනු ලබන කාර්‍ය්ය කුමක්ද යන්න මේ දිනවල නවසීලන්තයේ සංචාරය කරන ශ්‍රී ලංකා ක්‍රිකට් පිල මුහුණ දෙන දරුණු පරාජයන් හමුවේ නැවත වරක් මාධ්‍ය තුළ කතා බහට ලක්ව තිබේ
නවසීලන්ත සංචාරයට ශ්‍රී ලංකා පිල ගියේ රදැල්ල ක්‍රීඩාංගණයේ සතියක පුහුණුවක් සහිතව දේශගුණයටද පෙරහුරුවක් ලබමිනි.
නවසීලන්ත සංචාරය ශ්‍රී ලංකාවට අතිශයින් වැදගත් සංචාරයක් විය.
ඒ ටෙස්ට් තරගාවලිය ජය ගත්තේ නම් අයි.සී.සී. ටෙස්ට් අවසන් තරගයට සුදුසුකම් ලබන්නටත් එක්දින තරගාවලිය ජය ගත්තේ නම් මීළඟ එක් දින ලෝක ශූරතා තරගාවලියේ සුදුසුකම් ලැබීමේ තරගාවලියට නොගොස් කෙළින්ම සුපරි වටයට යෑමේ අවස්ථාව ලබන්නටත් ඉඩකඩ තිබුණු නිසාය.
එහෙත් ටෙස්ට් තරග දෙක හා එක්දින තරග දෙකක් අවසානයේ මේ අවස්ථා දෙකම ගිළිහී ගියේය.
එපමණක් නොව නවසීලන්තයේ සාමාන්‍ය ක්‍රීඩකයන් නව දෙනකු රහිත කණ්ඩායම වෙතින් ප්‍රථම එක්දින තරගයේ අලජ්ජී ලෙස ලකුණු 198 ක පරාජයක් අත් කර ගත්තේය.
අපේ ක්‍රිකට් මේ අඩියට පත්වන්නේ නම් ශ්‍රී ලංකා ක්‍රිකට්වල උපදේශක ලෙස මාසිකව රුපියල් ලක්ෂ හැටකට වැඩි වැටුපක් ලබමින් මහේල ජයවර්ධන විසින් කරනු ලබන කාර්ය භාරය කුමක්දැයි මාධ්‍ය කිහිපයක ප්‍රශ්න කරනු ලැබීය.
අයි.පී.එල් හි මුම්බායි ඉන්ඩ්යන්ස් වෙනුවෙන් ඇමරිකාවට ගොස් සිටින මහේල නවසීලන්තයට නොගියේ මන්දැයි ඔවුන් ප්‍රශ්න කර තිබිණ.
බොහෝ මාධ්‍ය වලට නොපෙනුනද මාධ්‍ය කරුවන් කිහිප දෙනෙකු ඉස්මතු කළ මෙම පැනයේ වරදක් නොවීය.
අවසානයේ එසේ ප්‍රශ්න කළ මාධ්‍යවලට ක්‍රිකට් ආයතනයේ පිළිතුර වූයේ සංචාර වලට සහභාගි වීම මහේලගේ රාජකාරියක් නොවන බවය.
එහෙත් 19 න් පහළ යොවුන් ලෝක කුසලානයටත් පසුගිය ලෝක කුසලානයටත් උපදේශක ලෙස මහේල සහභාගිවූයේ ඇයිද යන්න ගැටලුවකි.
මහේල සහභාගි වූ එම සංචාර දෙකද ශ්‍රී ලංකාවට සාර්ථක ඵල ලබා නොදුන් අතර මහේලගේ සම්ප්‍රාප්තිය තුළින් කිසිදු වැඩක් සිදු නොවූ බව පිළිගත යුතුය.
මහේල උඩ දාගෙන සිටින ක්‍රිකට් බලධාරින් දැන්වත් මහේලාගමනයෙන් අපේ ක්‍රිකට් වලට සුගතියක් නොවූ බව හා ඉදිරියට හෝ නොවන බවත් තේරුම් ගත යුතුය.
ටොම් මූඩිව ගෙනාවෙත් සංගා හා මුරලි එක්ව මහේලය. ඒ අයි.පී.එල් යාළු කමටය. මූඩිද වසරකට දින 100 ක් වැඩ කිරීමට පොරොන්දුව පැමිණ දින 50 ක්වත් මෙහි ගත නොකර කෝටි ගණනක් උපදේශක පිං පඩියක් ලබාගෙන ආපසු ගියේය.
දේශීය අන්තර් ක්‍රීඩා සමාජ තරගාවලියේද දින වකවානු වෙනස් කළේ මහේලය.
ප්‍රතිඵලය වූයේ එංගලන්ත කුඩා ප්‍රාන්ත ක්‍රීඩා කිරීමට යන ක්‍රීඩකයන් සියයකට පමණ යන එන මං අහිමි වීමය.
උසස් තාක්ෂණ අංශයේ මෑත කාලයේ පුහුණුකරුවන් තෝරා ගත්තේ මහේලට උවමනා පරිදිය.
නවීඩ් නවාස්, අවිශ්ක ප්‍රනාන්දු, පියල් විජේතුංග, තිළිණ කන්ඩම්බි, රුවන් කල්පගේ මහේලගේ අනුහසින් පැමිණි පුහුණුකරුවන් ය.
දඟ පන්දු යවන්නන් හදනවාට වඩා නැති කිරීමට දක්ෂ පියල් විජේතුංග වසර දහයක් සිට කළ දෙයක් නොවුන බැවින් ගෙදර යැවූ පසු ආපසු පැමිණ දඟ පන්දු යැවීමේ පුහුණුකරු ලෙස සෑම සංචාරයකම යන්නේද මහේලට පිං සිද්ධ වෙන්නය.
පියල්ට පිං සිද්ධ වෙන්න අපේ හොඳම වමත් දඟ පන්දු යවන්නන් තිදෙනාගේම රිදම් ගිහින්‍ ය.
ප්‍රවීන් ජයවික්‍රමට බෝලයක් කෙළින් දා ගන්නවත් බැරිය. ඇඹුලා උතුර දකුණ සොයා ගත නොහැකිව අතරමං වී ඇත.
වේග පන්දු යැවීමේ පුහුණුකරු දර්ශන ගමගේය. අද තරගයේ ගහන වේග පන්දු යවන්නා ඊළඟ තරගයේ ආබාධයකට ගොදුරු වීමෙන් කණ්ඩායමෙන් එළියේය.
මහේලගේ රෙකමදාරුවෙන් කණ්ඩම්බි අතිරේක පිතිකරණ පුහුණුකරුවකු ලෙස නවසීලන්තයට ගියේය. ගිය ගමන් තිබූ පළමු තරගයේ අපේ පිතිකරුවන් සියලු දෙනාම රැස් කළේ ලකුණු 76 කි.
කාටත් පෙනෙන්නේ සිල්වර්වුඩ්වය. ඒ ඔහු ප්‍රධාන පුහුණුකරු නිසාය. කාගෙ කාගෙත් කුණු අවසානයේ යන්නේ ඔහු පිටින්‍ ය.
මහේල කොහොමත් එස්.එස්.සී සපෝටර් ය. ඒ නිසා එස්.එස්.සී අයට වැඩි වැඩියෙන් වාසි ය.
කුසල් මෙන්ඩිස් තහංචි සමයේ සී.සී.සී. සිට එස්.එස්.සී ගෙනවිත් ඔහුට හා ධනුෂ්ක ගුණතිලකගේ තහංචිය අඩු කර යළි කණ්ඩායමට ගෙනාවේද මහේලය.
ප්‍රමෝද්‍ය වික්‍රමසිංහ තේරීම් කමිටු සභාපති වුවත් නොනිල සභාපති මහේල බව බොහෝ දෙනා නොදනිති.
අපේ පුහුණුකරු සෙට් එක දිනුවත් පැරදුනත් එසේමය. ඔවුන්ට ඉලක්ක හෝ කේපීඅයි නොමැත.
ටුවර් ටික නම් ෂුවර් ය.
කොතරම් අසාර්ථක වුණත් එලවනකම් යන්නේද නැත.
මහේල වුවත් මුම්බායි ඉන්ඩියන්ස්වල මුලදී සාර්ථක වුවත් අවසාන තරගාවලියේ අම්බානිටද කට උත්තර නැති වන තරමට මුම්බායි ඉන්ඩියන්ස් නන්නත්තාර විය.
ඒ මහේල ලංකාවේ වැඩේදීත් ෆේල් ය.
ඒ නිසා හොඳම දේ තැන තියාගෙන අයින් වීමය.
නියුට්‍රල් අම්පයර්
