සදෙව් රත්නායක –
කොවිඩ් වෛරසයේ අවදානම මැද ලොව පුරා සියලුම ටෙනිස් තරගාවලි කල් දැමීමට හෝ අවලංගු කිරීමට තරග සංවිධායකයන් පියවර ගනිද්දී සර්බියාවේ අගනුවර වන බෙල්ග්‍රෙඩ් හී ප්‍රදර්ශනාත්මක ටෙනිස් තරගාවලියක් සංවිධානය කිරීමට අත හිත දීමට ද, ඊට තරග කිරීමට ද ඉදිරිපත් වූ ලොව නොම්මර එකේ ටෙනිස් ක්‍රීඩක නොවැක් ඩිජොකෝවික් කොවිඩ් වසංගතය ගෙදරටම ගෙන්වා ගත්තේය. ඔහුට මෙන්ම ඔහුගේ බිරිඳ ජෙලිනාට ද කොවිඩ් වෛරසය ආසාදනය වී ඇතැයි අද තහවුරු විය. වාසනාවකට මෙන් ඔවුන්ගේ දරුවන් ඊට ගොදුරු වී නොමැති බව වාර්තා විය.
ඇඩිරියා ටුවර් නමින් සංවිධානය වූ මේ තරගාවලිය කොවිඩ් වසංගතය නිසා වසා දැමුණු ටෙනිස් පිටියේ හැම අතින්ම පැවැති පළමු තරගාවලිය ද විය. එහි අධ්‍යක්ෂවරයා ලෙස කටයුතු කරනු ලැබුවේ නොවැක්ගේ සොයුරු ඩිජෝඩ්ජි ය.
සර්බියාවේ සහ ඊට යාබදව පිහිටි රට වන ක්‍රොඒෂියාවේ දී අදියර දෙකකින් යුතුව පැවැත්විමට සූදානම් කළ මේ තරගාවලියට දැනට සර්බියාවේ රැඳී සිටින බල්ගේරියානු ක්‍රීඩක ග්‍රිගෝර් දිමිත්‍රොව් ද එක්වූ අතර පළමුව කොවිඩ් වෛරසයට ගොදුරු වූයේ ඔහුය. ඉන් අනතුරුව තරගාවලියේ ඉතිරි තරගත්, ක්‍රොඒෂියාවේ පැවැත්විමට සුදානම් කළ එහි දෙවැනි අදියරේ තරගාවලියත් අවලංගු කිරිමට පියවර ගෙන තිබිණි.
එහෙත් ඒ වනවිට වෛරසය ක්‍රීඩකයන් වෙත සමීපව තිබූ අතර තරගාවලියට ක්‍රීඩා කළ තවත් සර්බියානු ක්‍රීඩකයකු වන බෝර්නා කොවික් ද ඊට ගොදුරු වූ බව වාර්තා විය. මේ සිදුවීම ලොව පුරා බොහෝ ටෙනිස් ක්‍රීඩකයන්ගේ දැඩි විවේචනයට ලක්වූ අතර එවැනි අවදානමක් මැද තරගාවලියකට එක්වීම ගැන ඔවුහු සිය සගයන්ට නොසෑහෙන සේ දෝෂාරෝපණය කළහ. ටෙනිස් තරගාවලිය අතරතුර විනෝදය පිණිස ඉහත කී ක්‍රීඩකයන් බාස්කට් බෝල් ක්‍රීඩාවේ ද නිරතව තිබිණි. ඒ සඳහා එක්වූ තවත් ක්‍රීඩකයකු වන ඇලෙක්සැන්ඩර් ස්වේර්වෝට කොවිඩ් වෛරසය ආසාදනය වූ බවට මෙතෙක් තහවුරු කර නොමැත. කෙසේ වුවත් ඔහුගේ තත්ත්වය ද ඒ හා සමාන වනු ඇතැයි සර්බියානු පුවත්පත් වාර්තා කළේය.
සර්බියාවේ කොවිඩ් ආසාදිතයන්ගේ සංඛ්‍යාව අද වනවිට 13,092ක් දක්වා ඉහළ ගොස් තිබූ අතර සිදුවූ මරණ සංඛ්‍යාව 263කි. එරට තත්ත්වය ක්‍රමයෙන් යහපත් අතට හැරෙමින් පවතින බැවින් සෞඛ්‍ය තහංචි තරමක් ලිහිල් කර තිබිණ. කෙසේ වෙතත් සමාජ දුරස්ථභාවය ආදි උපදෙස් ගණනාවක් එරට සෞඛ්‍ය අංශ මහජනතාවට ලබා දී තිබුණත් මෙම ටෙනිස් තරගාවලියට එක්වූ ක්‍රීඩකයන් මෙන්ම ක්‍රීඩාලෝලීන් ද ඒ පිළිබඳ සැළකිල්ලක් නොදක්වා ඇතැයි ද වාර්තා විය.මෙම ප්‍රදර්ශන තරගාවලිය නැරැඹීමට ක්‍රීඩාලෝලීන් 4,000කට අධික පිරිසක් එක්රොක්වී ඇති අතර තරග නිමාවෙන් පසුව එරට අගනුවර වන බෙල්ග්‍රේඩ් හී රාත්‍රී සමාජශාලාවල ඔවුන් තර්තනයේ යෙදෙමින් විනෝද වූ බව ද වාර්තා විය.
Discussion about this post