අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ එස්එස්පී ශානි අබේසේකරගේ බිරිඳ කමනි අබේසේකර මහත්මිය තම සැමියාගේ ජීවිතයට සිදුවිය හැකි තර්ජන පිළිබඳව අගවිනිසුරු සහ නීතිපතිට ලිපියක් යවා තිබේ.
විමර්ශනවලට අදාළව සාක්ෂි ගොතන ලද බවට චෝදනා ලැබ ශානි අබේසේකර මේ වන විට මහර රක්ෂිත බන්ධනාගාරයේ රඳවා සිටී.
තම ස්වාමිපුරුෂයා ජූලි 31 වන දින අත්අඩංගුවට ගැනීමට පෙර පවා ඔහුට විවිධ පාර්ශවයන්ගෙන් හා බලධාරීන්ගෙන් මරණීය තර්ජන සහ වෙනත් තර්ජන එල්ල වී ඇති බව කමනි අබේසේකර සිය ලිපියේ සඳහන් කර තිබේ.
චෝදනා විමර්ශනය කරන කොළඹ අපරාධ කොට්ඨාසයේ (සීසීඩී) පොලිස් නිලධාරීන් දෙදෙනෙකු වන ඒඑස්පී නෙවිල් ද සොයිසා සහ අයිපී ජගත් නිශාන්ත තම සැමියාට එරෙහිව බොරු සාක්ෂි දෙන ලෙස සාක්ෂිකරුවෙකුට බලපෑම් කර ඇති බව ද ඇය සඳහන් කළාය.
කමනි මහත්මිය සිය ලිපියේ පසුගිය දා මියගිය පාතාල නායකයකු වූ මාකඳුරේ මධුෂ්ගේ මරණය එකම සීසීඩී නිලධාරීන් අතින් සිදුවීම ගැනත්, ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් විසින් එස්එස්පී ශානි අබේසේකරට පාතාල ක්‍රියාකාරකම් සමඟ සම්බන්ධකම් ඇති බවට කරන ලද අසත්‍ය ප්‍රකාශ ගැනත් අවධානය යොමු කර ඇත.
“මගේ ස්වාමිපුරුෂයා ගෞරවනීය පොලිස් නිලධාරියෙක්. ඔහු මිනීමරුවන් 35 දෙනෙකු සහ පාතාල ලෝකයේ සාමාජිකයන් පිළිබඳව සාර්ථකව විමර්ශනය කර ඔවුන්ව යුක්තිය ඉදිරියට ගෙන ආවා.” ඇය සඳහන් කරයි.
වරදට හසු වූ බන්ධනාගාර නිලධාරියෙකුට සහ පොලිස් නිලධාරියෙකුට එරෙහිව පියවර ගෙන ඇති 2012 වැලිකඩ බන්ධනාගාර සංහාරය පිළිබඳව තම ස්වාමිපුරුෂයා විමර්ශනය කර ඇති බව සඳහන් කළ ඇය, තම ස්වාමිපුරුෂයා බන්ධනාගාර නිලධාරීන්ගේ සහ පොලිස් නිලධාරීන්ගේ පාලනය යටතේ තබා ගැනීම ඔහුගේ ජීවිතයට තර්ජනයක් ලෙස විශ්වාස කරන බව පැවසීය.
“එබැවින් ඔහු මේ ආකාරයෙන් අනාරක්ෂිත ලෙස සිරගත කිරීම ඔහුගේ පරීක්ෂණවල ප්‍රතිඑලය කඩාකප්පල් කිරීමක් වන අතර එමඟින් සමහර බලවත් පුද්ගලයන්ට ඔහුගේ ජීවිතයට හානි කිරීමට ඉඩ ඇත.” ඇය කියාසිටී.
“ඒ අනුව, ඉහත කරුණු සලකා බැලීමේදී, මගේ ස්වාමිපුරුෂයා ඔහුගේ ජීවිතයට බරපතල තර්ජනවලට මුහුණ දී සිටින බව මම විශ්වාස කරමි. පවුලේ සාමාජිකයන් නොසලකා මේ රටේ පුරවැසියන්ට සාධාරණය ඉටු කිරීම සඳහා ඔහු සිය වෘත්තීය රාජකාරි ඉතා වගකීමෙන් යුතුව ඉටු කිරීමට වසර 30 ක් සිය ජීවිතය පරදුවට තැබීය. එබැවින් මගේ සැමියාගේ ජීවිතය ආරක්ෂා කිරීම රජයේ වගකීම වන අතර ඔහුගේ ජීවිතයට හානියක් සිදුවීම වැළැක්වීමට රජය අවශ්‍ය සියලු පියවර ගත යුතුය. එමනිසා, මගේ ස්වාමිපුරුෂයා බන්ධනාගාරය තුළ හෝ ඉන් පිටත ඝාතනය වීම වැළැක්වීමට සහ ඔහුගේ ජීවිතය ආරක්ෂා කිරීමට හැකි සෑම පියවරක්ම ගන්නා ලෙස මම නිහතමානීව ඉල්ලා සිටිමි.” යැයි ඇය සිය ලිපිය මගින් වැඩිදුරටත් සඳහන් කර ඇත.
