දිනසේන රතුගමගේ –
උතුරු නැගෙනහිර දෙමළ ප්රශ්නයට හා ජනවාර්ගික ප්රශ්නයට නියම විසඳුමක් ලබා ගැනීමට වත්මන් දෙමළ නායකයින්ට කිසිසේත් හැකියාවක් නොමැති බව ද්රවිඩ එකසත් විමුක්ති පෙරමුණේ නායක ආනන්ද සංගරී හිටපු මන්ත්රීවරයා ඊයේ (11) කිළිනොච්චියේදී පැවසීය.
මාධ්ය හමුවකට එක්වෙමින් ඔහු කියා සිටියේ 1948 වසරේ සිට දෙමළ දේශපාලන නායකයින් මේ ප්රශ්නයට විසඳුමක් ලබා ගැනීමට උත්සහ කළ නමුත් ඒ නායකයින්ගේ යෝජනා හා ඉල්ලීම් ඉතාම බරපතල වූ බැවින් කිසිදු රජයක් ඒ දෙස නොබැලූ බවය.
බුහුවාර්ගිකයින් ජීවත් වන රටවල මෙවැනි අර්බුද විසඳා ගැනීම සඳහා තනි හෝ වෙනම පාලන ක්රමයක් කිසිසේත්ම සුදුසු නොවන බවත් කිසිදු පාලකයෙකුට එවැනි විසඳුමක් ලබා දීමට හෝ ඊට කැමති වීමට නොහැකි බවත් කී ආනන්ද සංගරී දෙමළ ජාතික සන්ධානය විසින් ඒකීය රාජ්යයක් තුළ බලය විමධ්යගත කෙරෙන අන්දමට ඉදිරිපත් කරණ විසඳුම (සමස්ටිය) ඉවත ලා රජයකට ලබාදිය හැකි විසඳුමක් ඉල්ලා සිටිය යුතු බව ද සඳහන් කළේය.
දෙමළ ජාතික සන්ධානයේ පරිණත දේශපාලන නායකයින් කීප දෙනෙකු ඉතිරිව සිටින මෙවැනි අවස්ථාවක රජයෙන් ලබා දෙන යමක් පිළිගෙන කටයුතු නොකරන්නේ නම් ලාබාල දෙමළ දේශපාලනඥයින්ට අනාගතයේදී ලබා ගත හැකි කිසිවක් නොලැබෙන බව ප්රකාශ කළ ආනන්ද සංගරී හිටපු මන්ත්රීවරයා මේ තත්ත්වය නිසා ඉදිරියේදී බිහිවන දෙමළ පුරවැසියන්ට පවා විසඳාගත නොහැකිව මේ ප්රශ්නය ඉතිරි වන බවද ප්රකාශ කළේය.