දිනසේන රතුගමගේ –
ඉලංකෙයි තමිල් අරුසු කච්චි පක්ෂයේ මහ ලේකම් වශයෙන් එම පක්ෂයේ නායක මාවෙයි සේනාධිරාජා 31 දා පත් කිරීමත් සමගම දෙමළ ජාතික සන්ධානයේ හවුල්කාර පක්ෂ අතර විශාල මතභේදයක් හට ගෙන තිබේ.
යාපනයේ මාටින් පාරේ පිහිටි පක්ෂ කාර්යාලයේදී පැවති විශේෂ සාකච්ඡාවකදී මාවෙයි සේනාධිරාජා මෙම තනතුරට පත් කොට ඒ පිළිබදව මැතිවරණ කොමසාරිස් කාර්යාලයට දැණුම් දීමටද පියවර ගෙන තිබේ.
ඉලංකෙයි තමිල් අරුසු කච්චි පක්ෂයේ මහ ලේකම් වශයෙන් කටයුතු කළ එස්.තුරෙයිසිංහම් එම තනතුරෙන් ඉල්ලා අස්වීමෙන් පසුව ඇති වූ පුරප්පාඩුවට මාවෙයි සේනාධිරාජා පත් වී ඇතත් පක්ෂයේ මහ ලේකම් ධූරය හා නායකත්ව එකම පුද්ගලයෙකුට හිමි වීම පිළිබඳව ඉලංකෙයි තමිල් අරුසු කච්චි පක්ෂයේ සෙසු ජේයෂ්ඨ සාමාජිකයින් තුළ දැඩි නොසතුටක් හට ගෙන තිබේ.
ඉලංකෙයි තමිල් අරුසු කච්චි පක්ෂයේ මහ ලේකම්වරයා දෙමළ ජාතික සන්ධානයේද මහ ලේකම්වරයා වශයෙන් කටයුතු කරණ නිසාත් දෙමළ ජාතික සන්ධානය පොරොන්දු වූ පරිදි එහි තනතුරු දෙකක් සෙල්වම් අඩෙයිකලනාදන්ට හා ධර්මලිංගම් සිද්ධාර්ථන්ට මෙතෙක් ලබා නොදීම සම්බන්ධයෙන්ද මේ සාකච්ඡාවේදී විරෝධතාවයන් මතුව තිබේ.
මේ සාකච්ඡාවට ටෙලෝ නායක සෙල්වම් අඩෙයිකලනාදන් සහ ප්ලොට් නායක ධර්මලිංගම් සිද්ධාර්ථන් සහභාගී වී සිටි අතර එම පක්ෂ දෙකේ තවත් නියෝජිතයෝද සහභාගී වී සිටියහ.
දෙමළ ජාතික සන්ධානයේ ප්‍රකාශක තනතුර අඩෙයිකලනාදන් මන්ත්‍රීවරයාටත් පක්ෂයේ ප්‍රධාන සංවිධායක ධූරය ධර්මලිංගම් සිද්ධාර්ථන්ටත් ලබා දෙන බවට කළින් පොරොන්දු වී තිබුණද එය මෙතෙක් ඉටු නොවීම සම්බන්ධයෙන් ප්ලොට් නායක ධර්මලිංගම් සිද්ධාර්ථන් මන්ත්‍රීවරයා මේ සාකච්ඡාවේදී අදහස් දක්වා තිබේ.
දෙමළ ජාතික සන්ධානය පක්ෂයක් වශයෙන් ලියාපදිංචි කළ යුතු බවට මීට වසර ගණනාවකට පෙර ඉල්ලීම් කොට ඇතත් එය මේ දක්වා ඉටු නොවීම සම්බන්ධයෙන්ද කරුණු සාකච්ඡා කොට ඇති අතර ඒ පිළිබඳව දෙමළ ජාතික සන්ධානයේ නායකවරයාගේ ප්‍රධානත්වයෙන් පැවැත්වෙන රැස්වීමකදී තීරණයක් ගැනීමට යපනයේ පැවති සාකච්ඡාවේදී සියලු දෙනා එකග වී තිබේ.
