පුරා දශක හතක් ළමා ලෝකය සැරසූ ආදරණීය ආත්තම්මා නික්ම ගියාය.

සිබිල් වෙත්තසිංහ

අපේ ළමා කාලය රමණීය එකක් කළ ආදරණීය ආත්තම්මා ඊයේ (30) අප අතරින් වෙන්වූවාය.  සිබිල් වෙත්තසිංහ නැමති යුගයක් නිර්මාණය කළ ඒ සුන්දර මාතාව පුරා දින හතරක් තිස්සේ  සිටියේ කොළඹ පිහිටි පෞද්ගලික රෝහලක ප්‍රතිකාර ගනිමිනි. ඊයේ වනවිට ඇය අනූ තුන් වන විය පසුකරමින් සිටියාය.

ඇය අප කාගෙත් සිබිල් නැන්දාය. සිබිල් නැන්දා මැවූ සිතුවම් නිර්මාණශීලී, මනුෂ්‍යත්වයෙන් පිරිණු, පරිකල්පනයෙන් ඉහළ සංවේදී ළමා පරපුරක් ගොඩනැගුවේය. ඒ ආකාරයෙන් බලන විට ඇය චිත්‍ර ශිල්පියෙකුට එපිට ගිය මුණිවර භූමිකාවක් මේ සමාජය තුළ රූපණය කර තිබුණු බව වැටහෙන්නේ ඇයගේ ජීවිත කාලය තුළ ඇය මේ රටට කළ නොගිනිය හැකි මෙහෙවරෙහි ප්‍රමාණය නිසාය.

ගාලූ පුරයේ උපත ලද සිබිල් වෙත්තසිංහ පළමුව අධ්‍යාපනය ලැබුවේ ගින්තොට බෞද්ධ මිශ්‍ර පාඨශාලාවෙනි. දෙවනුව බම්බලපිටියේ ශුද්ධ වූ පවුලේ කන්‍යාරාමයෙනි. එච්. ඩී. සුගතපාලගේ “නවමඟ” පස්‌ වන ප්‍රමාණයේ කියවීම් පොතට සිබිල් වයස අවුරුදු පහළොවේදී චිත්‍ර ඉදිරිපත් කළාය. වයස අවුරුදු දහනවයේදී චිත්‍ර ශිල්පිනියක වශයෙන් පුවත්පත් කලාවට පිවිසියාය. එදා සිට මිය යන මොහොත තෙක්  පුරා වසර හැත්තෑ හතරක කාලයක්‌ ළමයින් උදෙසා චිත්‍ර කතා නිර්මාණය කළාය.

ලංකාවේ ළමා කතාවේ පරිවර්තනීය වෙනස කරමින් ඇය  1956 එළි ඇක්වූ  “කුඩ හොරා” ය. එම කෘතිය කතාවත්, චිත්‍රත් එකට සංකලනය කරමින් සිංහල ළමා කතාව නව මානයකට යොමු කළේය. එතැන් පටන් ඈ විසින් නිර්මාණය කරන ලද ළමා හා යොවුන් කෘති වෙනුවෙන් ජාතික හා අන්තර්ජාතික වශයෙන් බොහෝ සම්මාන හිමි විය. 1965 දී ඇයගේ  “වෙසක්‌ පහන” කෘතියට මහා බ්‍රිතාන්‍යයේ  ඉසොබෙල් හටිං සම්මානය හිමිවීය.  1986 වසරේදී ජපානයේ පළවූ හොඳම විදේශීය ළමා කෘතිය වශයෙන් “කුඩ හොරා” පොත සම්මානයට භාජනය විය.  එම කෘතිය චීනය, කොරියාව, පිලිපීනය, නෝර්වේ, ස්වීඩනය, ඩෙන්මාර්කය, ඇමරිකා එක්සත් ජනපදය, ඇතුළු රටවල් 12ක ප්‍රකාශයට පත් වූයේය.    ටෝකියෝ නුවර ළමා පුස්‌තකාලය මගින් 1987 වසරේ ඉතාම ජනප්‍රිය ළමා පොත ලෙස එය තෝරා ගත්තේය.   හොඳම සැලසුම සහිත ළමා පොත සඳහා 2003 සාක්‌ සම්මානය ඇගේ “දුවන රැවුළ” පොතට හිමි විය.

සිංහල සහ ඉංග්‍රීසි භාෂාවන්ගෙන් සිබිල් නැන්දා ලියු ළමා පොත් ප්‍රමාණය 250කට අධිකය.

ලෝක සම්භාවනාවට පාත්‍ර වූ, යුග ගණනාවක දරුවන්ගේ ආදරණීය මිත්තනිය අවසන් අවධියේ දී  ගිනස් වාර්තා පොතට ද එක් වූවාය. ඇය එසේ වාර්තාගත වන්නේ  දිවයින පුරා ළමුන් 20,000ක් සම්බන්ධ කරගනිමින් “පුදුම පළිඟුව” ළමා කෘතිය රචනා කරමින්ය. මෙහි මූලික අරමුණ වී තිබුණේ දරුවන්ගේ නිර්මාණ උපකල්පන ශක්තිය විදහා දැක්වීමට අවස්ථාවක් ලබාදීමයි. මෙම කෘතියේ විශේෂත්වය වන්නේ සිබිල් වෙත්තසිංහ  විසින් රචිත කතාවල අවසානය දරුවන් විසින් සම්පූර්ණ කිරීමට යොමු කිරීමය. ලෝකයේ දීර්ඝම අවසානය සහිත ළමා කෘතිය වූයේ එම කෘතියය.

මේ රටේ ළමා සාහිත්‍යය ලෝකයට රැගෙන ගිය මේ මුණිවර ශිල්පිනිය, දශක හතක් තිස්සේ ළමා පරපුර වෙනුවෙන් ජීවත්වුණු දයාබර මාතාව, අපේ ආදරණීය ආත්තම්මා පිළිබඳ මේ අවසන් සටහන තැබීමම වේදනාවකි. ඇය වැනි යුග නිර්මාපකයින් නැවතත් මේ රට තුළ බිහි වෙතැයි අප තුළ විශ්වාසයක් නූපදින බැවිනි.

ආදරණිය අත්තම්මේ… නිර්වාණයෙන් සැනසෙන්නට ඔබ කළ කුසලය ප්‍රමාණවත්ය.